Carlos X. Blanco
Entamemos un tiempu de xuntances, y quiera´l destín que sían granibles. Munches d´eses xuntances puen ser desesperaes, sorprendentes, estériles; pero munches otres tamién puen ser un pidal enllén de futuru.
Sicasí, falta la xuntanza fundamental: la d´UN solu partíu nacionalista d´esquierda.
Esti caberu nun ye un problema aisllao nin un enfotu únicu. Munchos pensamos que se pue trabayar nun doble nivel.
D´una banda, la xuntanza qu´atrope a tol nacionalismu d´esquierda, que nesti País nun ye bayurosu pero ye una xuntanza que ye al empar condición de futuru pa qu´espollete d´una vez. D´otra banda, de tou aquel que sienta asturies como Nación, con tal de que nun sía un reaccionariu, ye dicir, una xuntanza interclasista. Les dos xuntances son estremaes pero tienen que se coordinar, articular de dalguna mena si nun queremos qu´esti País escaeza dafechu qu´un día fue nación.
-Xuntura nacionalista de clas con proyeutu social pa la clas trabayadora d´Asturies: tien de ser electoral y orgánica, bien coordinada cola esquierda real llantada n´Asturies magar que nun sía nacionalista.
-Xuntanza interclasista de tol nacionalismu/asturianismu: tien de ser, a lo menos, una unidá d´aición, o construcción d´un frente pola Llingua (Oficialidá) y pol máximu autogobiernu.
Equí nun hai alderiques bizantinos. Equí nun hai idees rares. Equí nun se propón la lluna nin coses imposibles. Caún nel so puestu, y Asturies como casa de toos. Equí cabe l´independentismu, el nacionalismu strictu sensu, el federalismu, inda l´autonomismu que pide polo menos ser autonomía “de primera”, como los catalanes y los vascos. Equí cabemos tolos que pensamos n´Asturies como nación. Toos.
El que nun se mueva, y más teniendo responsabilidá nello, va marcase. Rinse dellos colo de la “xuntanza”. Que nun vivimos nun mundu real, dicen. ¡Que miren ellos alredor!: Un esgoncie, un estrozu, una llaceria. Esa ye la realidá. Si-yos falta patriotismu y altor de mires, yo solo sé que la hestoria los va a barrer, a escorrer a gorrazos. Nun fueron a facer lo que´l tiempu-yos demandaba.
A munchos-yos piquemos a la puerta. A munchos con prestixu y responsabilidá. Ficímoslo con humildá, con voluntá participativa. De parte de dellos nun hebo retruque. Ni pallabra. Ellos sabrán cuálu ye´l so amu real…
Artículu espublizáu en http://carlosxblanco.blogia.com/2009/091501-alborada-de-xuntances.php
1 respuesta a “Alborada de xuntances”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Septiembre 20th, 2009 at 20:52
Yá dixera Simón Bolivar que l’arte de vencer depréndese nes derrotes. D’estes yá tenemos munches, asina qu’agora quédamos peor percorrer el camín de la xuntanza, en coallición o non, con unes variables o con otres, pero nun frente nacional común.