Blog El xanu’l caborniu
La población asturiana avieya cada vuelta más. Nun se remocica y estos díes d’atras aprucíen nos medios de comunicación datos aparrantes de la desproporción ente la xente más vieyo y la más mozo. Somos abenayá una de les poblaciones más allancaes d’Europa.
Arriendes de les torgues qu’esto acarreta en bien de faces, tamién tien una plasmación de mena política y electoral. Una pírámide de población asina empobina hacia l’inmovilismu tanto a la hora de sofitar alternatives sociales nueves a les esistentes como a la hora d’espeyar resultaos electorales. En resultancia repítese eso tán encamentao dayuri de “siempre más de lo mesmo”.
Si tuviere qu’apostar anguaño por qué cantidá de la población podría sofitar dalgún proyectu políticu arreyáu al nacionalismu/asturianismu abúltame qu’andaría alrodiu d’ente venti y trenta mil persones. Nun ye un balagar, miániques, pero tampoco cantidá despreciable. Traducío n’escaños nunes elecciones aseguraríen presencia na Xunta Xeneral, magar non gobernar na mesma.
El problema ye que lo dicho nel párrafu anterior tendría acutáu un sitiu na nuestra sociedá nes condiciones más favoratibles. Y ye agora cuando nos podemos entrugar: ¿Tamos güei delantre d’eses condiciones?. Y la rempuesta podríamos dala nun perfectu tonu coral: non. Porque falamos de condiciones ideales y nel casu de que too se fixere d’una manera axeitada y afechiscada dafechu.
Pero la realidá muéstranos un panorama muncho más solombriegu. El sitiu afayadizu pa ilusionar y mover a toa esa xente ta por andechar. Los proyectos que se presenten anden perlloñe de capiar a aquél que-y prestaría engabitar n’estayes netamente asturianes. Nun fai falta estruyar el cerebru sacando conclusiones nin perdese en grandes rebilicoques mentales. Basta y sobra con sentir lo qu’opina esa xente o con lleer lo qu’escribe. Dende cuantayá quieren “un referente únicu” como finxu qu’oriente nel trabayu ya’l votu. Y tamién dende cuantayá refúguen los “garrapiellos de referentes” que lleven a la confusión y, lo peor de too, a la desmoralización descomanada y qu’avanza col pasu de los años.
Pa detrás el sector que debiere xugar un papel más dinámicu en tol procesu, la mocedá, alcuéntrase escabarriada. Unos pilen pal desdexamientu activista y pa la abstención electoral. Otros siguen la buelga abierta pol pa o’l güelu y participen de la derecha estatal o de la izquierda plural estatal tamién. Pocos s’alluguen nel nacionalismu/asturianismu. Y bastantes de los que tán dispuestos a trabayar atópense enguedeyaos na doctrina de la “guerra permanente” yá endémica nesti tipu de formaciones.
D’esta miente, el panorama que podemos nortiar ye apolmonante. Nun s’atopa per onde s’esmucir d’una situación que ye como’l cuentu de la bona pipa. Nunca acaba y vuelve siempre a entamar. O si lo miramos al vies, sí s’atopó y atopa per onde salir de la llamarga: sentándose a negociar, falando, enterrando l’hachu guerra y enfotándose nel alcuerdu y la xuntanza.
Y asina ta la situacion actualmente. Gobernando esi réximen clientelar que nun pierde veceros por mal que lo faiga, sinón que los gana. Un réximen onde gobiernu y oposición representen la comedia de les desavenencies y, darréu, participen de la pitanza y les prebendes. Y como oposición al mesmu, una xente tresmanao, que nun ve la hora de sestaferiar nun camín claru y común, cola moral embaxo, y col convencimientu que-yos da la testonería de los fechos de que nun hai nada que facer.
Y asina alborez y atapez nesti vieyu país. Ente vieyos movíos pola rutina, agradecíos al réximen de toa frasca, y descontentos desorganizaos de contino. Asina alborez y atapez dende años, dende décades… dende siempre.
Y, por enésima vez, convién repitir que’l tren de la historia nun pasa constantemente. Xugar a nun lu garrar ye enredar con una ruleta rusa de consecuencies imprevisibles.
Artículu espublizáu en http://elxanulcaborniu.blogspot.com/2009/09/vieyos-veceros-y-desorganizaos.html
2 respuestes a “Vieyos, veceros y desorganizaos”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Septiembre 16th, 2009 at 10:56
Nun toi mui d’alcuerdu con esti artícilu Xanu, y pa ello encóntiome nel éxitu que tuvo CoA cuando’l PAS y la UNA. Daquella, el PAS nun yera nacionaliegu, o si lo yera que nun m’alcuerdo, pero sí qu’arrampló con bien de votos de xente mayor favoratibles a una mayor autonomía y proteición de lo nueso. Munchos d’estos votantes nun yeren radicales, nin mocedá, nin nacionaliegos nin nada asemeyao. Yera xente mayor, simpatizante con Asturies y lo asturiano que vieron bien otra alternativa al psoe y pp.
De siguir p’alantre de xuru qu’hubiere llevao más votos d’esta faza poblacional. Pero… yá sabemos cómo acabó.
Y si dixe que nun toi mui d’alcuerdu ye porque, en parte, doite tamién la razón porque pa tener una población asturnianista fai falta una educación asturianista. Poro, equí’l psoe y pp cuidaron bien de promocionar siempre lo lolailo y nunca lo nueso.
D’otra miente, el que nun s’algame la xuntanza viendo lo que pue pasar con UPyD ye de país de mazcatos. Esti neopartíu ta perespolletando y, según el ruxerux, pue meter la pata nel parllamentu astur (lo que mos faltaba), mientres los “nacionaliegos” falando del sexu de los ánxeles en conceyos fechos en chigres y cafeteríes.
Namái yá pol fechu de lo que puea pasar con esi partíu, debería ser motivu suficiente pa que se xunten toos como un bloque compautu. Pero viendo lo visto, ye lo que digo, el binomiu del que falamos como base p’axuntar tol nacionalismu (llingua y soberanía) nun ta nos primeros puestos de la xerarquía de les nueses “fuerces” polítiques. Hai otros porgüeyos, que nun mos engañen.
Septiembre 16th, 2009 at 11:41
Bono, yo nun afirmo rotundamente que la xente más mayor nun vaiga votar nacionalista, sinón que, en xunto, les poblaciones más avieyaes y con mui escasu índiz de natalidá suelen producir votos mui inmovilistes y cuesta más trabayu facer qu’espollete dalgo novedoso. L’intentu de desaniciu y tapecimientu de lo asturiano por parte del réximen (en realidá PP-PSOE-IU compártenlu) ta perclaro. Qué porgüeyos puen tener fuerces que se denominen nacionalistes pa nun facer piñu alrodiu d’esos dos puntos ye una entruga bien interesante. Claro que a lo meyor resuélvese camentando qu’hai perende una serie de pininos allumaos que suañen con ser el “referente incuestionable” de nacionalismu y anteponen eso a cualquier alcuerdu. Collaciu Tomate, esto ye mui enguedeyao, pero que muncho, oi.