Carlos X. Blanco
Hai dellos actos dixebraos pal 8 de setiembre. Hai delles sigles que nun son a aconceyar un mínimu de puntos pala defensa y puxu d´una aición política en clave nacional. Hai dellos votantes y militantes frustraos, que noten el pesu de socesivos embarcazos. Pero hai una sola bandera y un solu pueblu, una Nación a la espera de que dalquién fale en nome d´ella.
PSOE, PP, IU son partíos españoles que se conocen de sobra. Yá gobernaron demasiao tiempu y yá amosaron el so calter etnocida. Pa francer estes tiñaces coloniales hai que dir ensayando fórmules d´unión ente persones y coleutivos ASTURIANOS. Les torgues p´algamalo-qu´equí nun vienen a cuentu- yá me van paeciendo cada día más un cuentu: xuicios, dixebres, embarcazos, traiciones…
Muncha xente, de xuro, nun sabe o nun quier saber un res d´ello. Pa min, tol que se sienta parte d´esti Pueblu tenía que s´endolcar nesti proyeutu unitariu. Dos puntos: 1) Asturianu, llingua oficial con toles consecuencies derivaes d´ello, 2) Asturies, Nación que se dota de preseos pal máximu autogobiernu dientro del Estáu. Non menos oficialidá que les “autonomíes de primera”, non menos autogobiernu que les “autonomíes de primera”. ¿Ye esto radical? Lo que ye radical, realmente, ye que´l Reinu d’ España dexe de ser racista: racista por conceder unos drechos a unos pueblos y ñega-ylos a otros. ¿Ye esto ser radical? Radical ye tener l´autoestima abonda como Pueblu pa nun ser menos qu´otros.
Artículu espublizáu en http://carlosxblanco.blogia.com/2009/090401-xuntanza-y-autoestima-radical.php
12 respuestes a “Xuntanza y autoestima radical”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Septiembre 4th, 2009 at 15:10
Atrévome a afirmar rotundamente qu’esos dos puntos qu’espones son compartíos pol 99% tanto de los nacionalistes asturianos como de los asturianos que mantienen postures averaes tanto al nacionalismu como al asturianismu. Pero como tenemos la desgracia de ser un poco cigües y tener el santu d’espaldes, esi 1% que queda son los dirixentes de les formaciones polítiques que toos conocemos y que se disponen, a la vuelta tres díes a facer el ridículu coles sos “fiestes privaes” el Día de la Nación Asturina y un pocoñín más allá, a la vuelta d’un par d’años, volver a facer el ridículu nes elecciones autonómiques onde paez que tan enfotaos en dir caún pel so llau.
Hai una parte positiva. Una conciencia mayoritaria y xeneralizada d’empobinar a una xuntanza como mui bien plantegues.
Hai otra parte negativa. Cómo nos arreglamos pa echa-y el boroñón preñáu d’alfileres al cuélebre: cómo rediós consiguimos qu’esi 1% dexe de mangoniar y fadiar d’una puñeflera vegada.
Septiembre 4th, 2009 at 15:39
Como nacionalista asturianu asumo dafechamente esos dos puntos, pero ¿sabes cuálu ye’l problema Carlos?Qu’equí si nun se fala del Socialismu y de Repúbliques Socialistes yá te ponen d’”asturnazi”, militante del PP o vete tu a saber…
Nun creo que los asturianos síamos xenéticamente incapaces d’aniciar un espaciu común habitable nel que nos atopemos tolos que tamos pola causa asturiana, quiero creer que non.
Puxa Asturies llibre.
Septiembre 5th, 2009 at 9:49
Yo toi tamién rotundamente d’alcuerdu con esos dos puntos. Y si l’oxetivu d’esti blog ye namás aldericar pues alderiquemos. Pero, aprovechando’l pruyimientu escomanáu de xuntanza esistente, nun podría esti blog valir pa ser la pasta qu’anicie dicha xuntanza?
Yo nunca milité en partíu dalu, pero tengo necesidá de facelo. Y si nun lo fice hasta agora ye, precisamente, por tar esnortiáu como toos vosotros.
Tais animaos a asumir un papel de mediadores? Tais animaos a intentalo?
Si los qu’entamastis el blog yá teníais esto camentao contái conmigo. Sinon pues animáivos!!
Y si esi 1% ye’l pilancu que lo torga too, habrá qu’arreblagar perriba d’ellos.
Septiembre 5th, 2009 at 10:30
Como yá comentó Ricardo, el primer pasu pa un supuestu llabor mediador tenía de ser que toles fuercies convocaes a esta Xuntanza respondieren. Y amás de fuerces, medios de comunicación afines al nacionalismu/asturianismu. La respuesta que tenemos recibía ye unilateral. Tuviérennos en cuenta unos sí y otros non. Los cabezaleros teníen qu´apurrinos la so postura, y los sos mínimos pa una xuntanza. Con tol respetu y amistá haza ellos, y saben ellí que-yos lo tengo, he llamentar qu´AA ya Infoasturies nun mos dieron retruque, nin siquiera sacaron una nota informativa. Y esta web tamién cuenta con ellos, por embargu.
Septiembre 5th, 2009 at 11:18
Y si, como dixo ún aldericante n’otru filu, unviamos toos un email colo mesmo que vosotros? Teneis el nuesu email. Yo unvíolu a quien digais.
Eso sí, anque hai que ser mui testerón, hai que decatase que va haber xente que nun quiera nada. Con eso ha cuntase.
Yo toi abiertu a tolo qu’entameis.
Hai qu’echar esti país p’alantre. Y nes próximes elleciones nun tenemos que tener otru batacazu. Tenemos que tener resultaos!!
Septiembre 5th, 2009 at 12:01
Estimáu TOMATE: entamemos por que mandes un mail tuyu a la web de PolaXuntanza. Vamos facer un llistáu.
Septiembre 5th, 2009 at 12:03
AA dió el retruque pa la xuntanza cola iniciativa SOS ASTURIES d’eso nun faceis ecu na vuesa estaya de AA.
Septiembre 5th, 2009 at 13:13
Voi dicivos como veo yo toa esta cuestión:
1) Tolos dirixentes de les organizaciones nacionalistes tán enteraos de sobra de la esistencia d’esta web y de la corriente favoratible a la xuntanza mayoritaria nel nacionalismu asturianu. Pero nun van facer puñefleru casu.
2) L’oxetivu hai que lu plantegar en difundir ya cabruñar na idega de la xuntanza y de los dos puntos que propón Carlos nel so artículu col envís de trabayar pa qu’espollete y s’afite lo más posible esta conciencia xeneralizada d’equí a les autonómiques.
3) En llegando les citaes autonómiques si los partíos nacionalistes anecien en dir por separao (yo toi convencíu de que ye lo que van facer) tienen que s’alcontrar a les puertes de les mesmes con esa corriente d’opinión perconocida y contraria a lo que cuenten facer.
4) En metiéndose’l gochazu cantáu que se van meter, puxar pa consiguir, por fin, que muevan ficha, al quedar asoleyaes, rescamplando y en sin sida nenguna, les sos estratexer equivocaes de finxu a finxu.
5) Si asina y too siguieren ensin facer casu dalu a nada, sería’l momentu de replantegase munches cuestiones alrodiu del nacionalismu asturianu. Pero eso yá ye otra cuestión a tratar nel so momentu.
Septiembre 6th, 2009 at 22:46
Y los apuntes del xanu, mui acertaos na mio opinión. Esta web pretende que nun lleguemos al puntu 3 y 4, pero en fin, viendo les coses que veo, mui acertáu esi analís.
Septiembre 6th, 2009 at 23:10
Querida empaná, esta páxina nun quier ser un meru mediu propagandísticu nin d’AA nin d’UNA. Decidimos namás incluyir informaciones d’AA y d’UNA que fueren daqué más qu’una declaración d’intenciones.
Querida empaná, si nun facemos ecu de dalguna información, básicamente, será porque se nos pase yá que mui poca xente ufrió la so ayuda pa caltener “viva” esta web y trabayar de baldre, porque nun mos paguen por ello. Poro, tenemos limitaciones. Enxamás quiximos facer de menos nin a AA nin a UNA. Espero que lo entiendas, empaná.
Septiembre 7th, 2009 at 10:11
Gracies Ricardo. ¿Qué opines del alcuerdu de AA Y PAS?
Septiembre 7th, 2009 at 14:00
Nun sé muncho del acuerdu, pero camiento que mirará pol espoxigue de la llingua y los vezos identitarios asturianos. Eso, nesti sentíu, ye bono. Más nun pueo dicir porque poco sé. Veamos cómo se desendolquen les coses.