AA propunxo la so propuesta “SOS Asturies”, un programa non de allianza elleutoral sinón de puntos mínimos pa algamar actos conxuntos (comu’l propiu día d’Asturies, por exemplu),y paez que nun tuvo rempuesta. Dempués dirán dalgunos que son seutarios o que lo ficieron cara a la galería.

Camiento, empaná, qu’hai coses qu’hai que faceles de manera direuta, non al traviés d’instrumentos o foros dixitales. Desconozo si hubo conversacionse ente AA y UNA sobre esi SOS Asturies, pero yo tamién vi ehí una oportunidá que polo que veo quedó pa prau (como tantes y tantes coses nesti triste y raru mundu del nacionalismu/asturianismu políticu)

Toos estos partíos son personalistes. Los sos estatutos tienen amu. Si los militantes del BA, UNA, PAS o AA dieren un golpe de timón hacia la xuntanza, los amos garraríen los estatutos y nun lo permitiríen. Produciríase una dixebra y de cuatro formaciones pasaríamos a ocho. Y pretender convencer a esos amos de dir a comuña ye una tarea propia de titanes. Nun se puen ver. Prefieren quedar tuertos con tal de que l’otru quede ciegu. Ente toos mataron el nacionalismu nes últimes autonómiques, enterráronlu nes últimes xenerales y fixéron-y un cabudañu nes últimes europees. Y van pasar abondos años enantes que xente nuevo, con planteamientos nuevos y actitudes nueves, vuelva a construir un nacionalismu asturianu qu’ilusione y cuaye na población. ¿De ónde puen salir?. Del trabayu cultural y llingüísticu non controláu pol poder. Ehí ye onde nos tenemos qu’organizar na rede y na cai, puxar y tener paciencia pa que guañe’l trabayu realizáu.
(Disculpes a too pol mitinazu que vos acabo soltar)

Tristemente inda tenemos má problemes, quién va facer eso? ¿quién va ser el primeru en llevantar la voz y dicir s’acabó? ¿quién lu va sofitar?…

¿Veis cómo a la fin too se reduz a 2 puntos de dixebra?. Falais o finais falando siempre de los xefes de tribu y les puñeteres sigles. ¿Qué quereis que vos diga?, dos nun se engardien si ún nun quier; toi entamando a pensar que dellos cabezaleros nacionaliegos son “topos” de los partíos centralistes, pues son éstos los únicos beneficiaos de la griesca Astur. ¿Qué ganamos el restu?; que la xente se ría de nos y mos de vergoña inclusu dicir que somos nacionaliegos.
¿Un puntu más de xunión nacionaliega?, celebrar el Dia de la Nación Astur el 25 de Mayu, o polo menos, esixilo; meyor estes reivindicaciones que dir escontra´l Bobón ( bien escrito), pues de lo que se trata ye d´averar xente a la causa y non asustala ( tenei en cuenta que la población astur ye mui vieya y nun toleren abondo los radicalismos, hai que ser sutiles…)

Lo del eslogan ye una idea, pero yo diría a más.
Na mio ignorancia partidista -yá que nunca milité en partíu dalu- intentaría una plataforma como esta del blog pero nel mundu real. Nun sé si sedrá una toyura o qué, pero yá me lo direis.
Yá que decís/dicen que la política astur ye too personalismos, porqué los que somos desconocíos nun damos, entós, un pasu alantre y tomamos carta nel asuntu? Podíamos facer una plataforma como aquella del Pautu. (Yá sé que fracasó, pero yera porque axuntaba toa mena d’organizaciones y yera un marafundiu escomanáu.) Nun lleveis les manes a la tiesta, creo que podíamos facelo, o polo menos intentalo. Qué podemos perder? Nada. Y ganar? el nuesu país. Paezvos poco pa nun intentalo?
L’envís sedría contautar con AA, UNA, PAS, URAS y Asturianistes por X y falar -y afalagar- con ellos na conveniencia de xuntase, de presentase baxo una plataforma, bloque, xuntura, coalición, etc, asturiana. De da-yos a entender que de seguir asina sólo queda la estinción pero que chando un güeyu al pasáu y ver que la Coalición Asturiana sacó resultaos, esto pue repetise. Amás, la población ta cansada del bipartidismu y una “tercer vía” moderada sedría mui bien vista. Yo creo qu’hai un espaciu políticu pergrande.
Yá sé que ye’l cuentu la llechera y que munchos vais rivos d’ello, pero si nun lo intentamos los años van pasando y pasando y, adulces, vamos llegando a los 30, a los 40, a los 50, a los 60…. y morreremos con esti escayu llantáu nel corazón tola vida. Engarrarémonos cola familia, colos collacios, miraremos elleción trés elleición qué resultáu algamó l’asturianismu esperdigáu y frustrarémonos… Y veremos que, pasu ente pasu, vamos dir esapaeciendo por nun intentalo, pero’l castellán dirá afitándose más y más. Y diremos viendo que sólo nós falaremos asturianu con otros cuatro. Y los que tenemos un fíu vamos estreldamos una vez y otra contra’l castellán pa enseña-y asturianu.
Y lo que ta bien claro nesta vida ye que val más arrepentise de lo que ficisti que de lo que nun ficisti.

Espero retruques de toa mena a esta propuesta, pero yo ye lo único que veo que pue valir yá qu’hasta agora esto ta como ta. Toos xebraos y la cultura asturiana esapaeciendo a golpe de cantar flamencu del asturianu Melendi.
Qué pasaría si nun s’algama lo que se pretende? Pues hai dos caminos. Unu l’abandonu y l’otru nun sé -vamos ver, sí lo sé, pero yá se falaría-.
Y tiempu pa les próximes autonómiques hai.

Los cabezaleros d’eses formaciones polítiques saben de sobra que ensin xuntanza nun van nenyures. La xente nacionalista o averao al nacionalismu tamién lo sabe y dilo na cai, faen clamor cuando va haber elecciones, sopeléxalo n’internet… Pero naide fai casu a too esto. Hai una mezclienda de too: inorancia, egocentrismu, planteamientos políticos irreales… La única vegada que’l nacionalismu tuvo puxu foi per entemedies d’una xuntanza qu’algamó la Xunta Xeneral. Esto ye un datu oxetivu, ta ehí y naide lu inventó. Más alto, claro, mayoritario, y contundente nun se puen dicir les coses. Hai una pieza clave en tou esti entramáu: les bases, la militancia d’esos partíos. Si realmente mayoritariamente quieren dir a un procesu de xuntanza tienen que mover ficha, yá. Pero si realmente piensen que’l camín escoyíu polos sos cabezaleros ye’l correctu, nun hai nada que facer. Dexalos que naufraguen definitivamente (suponiendo que nun lo fixeren yá) y esperar que de los restos del naufraxu surda dalgo unitario, nuevo y qu’enfote a la xente.

Siéntolo abondo, compañeros, pero pa esa propuesta yá llegais sero. Eso pasó cuando les eleiciones del 2007 y 2008. Hebio una serie de xente independiente que formaron como una especie de plataforma pa presionar nel sen de forzar dalgún tipu d’acercamientu o xuntanza de les fuercies “nacionalistes” y “d’izquierdes” (les comines porque habría muncho que matizar). Xente independiente y en parti “rebotao” d’opciones anteriores como IU-Bloque y decepcionao con ellos. Ente esa xente había nomes como Ornosa, los del colectivu Belenos, Carlos Lastra y otros igual de conocíos nel mundín.

Pa lo que sirvió esi grupu de presión foi pa convertise nun más de los factores que llevaron a la confluyencia ente una parti d’Andecha, IAS y della otra xente más (independientes, agrupaciones locales de ciertos conceyos y nun entamu Los Verdes, los otros verdes que nun son los d’IU). La valoración d’esi procesu, meyor dexámosla pa práu. Hai coses que val más nun faceles que faceles mal.

Esa converxencia cuayó nun primer momentu na candidatura conxunta Unidá, y nuna segunda etapa nuna unificación de dos partíos, que se presentaron como UNA a les siguientes eleiciones.

¿Pa qué sirvió too ello? Como too, hebio coses positives y ñegatives. Lo positivo. Nun primer momentu Unidá llevantó ciertes espectatives, y non solo nel mundín “asturianista”, tamién notres instancies de la izquierda, por exemplu nos sindicatos CSI y SUATEA. Pero pronto eses espectatives esbarrumbaron. ¿Por qué? Porque muncha xente esperaba muncho más, y esto da pa lo que da, que ye bien poco. L’estancamientu notóse bien clarino nos resultaos de les segundes eleiciones, y muncho más nes europees últimes.

Lo ñegativo. Lo primero, el sector d’Andecha que caltién la sigla sigue a lo de só. En realidá lo más apropiao ye falar d’una dixebra. La parti más lluchaora del nacionalismu d’izquierdes tá esfecha, polos errores propios más que nada.

En segundu llugar, el casu Allende en Piloña prevocó la marcha de la coalición de Los Verdes, pola falta d’oposición clara (más bien combayamientu col alcalde socialista) nel asuntu de la llínia d’alta tensión.

Unidá tardó demasiao n’actuar consecuentemente con esi casu. Cuando por fin lo ficieron, separtando a Allende d’IAS, sorprendentemente marchó del partíu l’agrupación local de Piloña completa.

Por ve tu a saber qué estraños razonamientos, de siguío marchen les mocedaes d’IAS en bloque, esos qu’agora se faen llamar FAI! Y enriba saquen un comunicáu na so páxina web, reproducíu en Glayíu y n’Infoasturies, xusto poco enantes de les eleiciones del 2008. Vamos, ilusionando al personal. Nueva morrada electoral, nulu aprendizaxe y vuelta la burra al práu pa estes europees.

A too esto, Asturianistes por Nava, supuesta marca electoral nesi conceyu d’IAS, resulta que non, que nun formen parti d’Unidá, nin d’UNA, nin d’IAS, nin de ná. Asturianistes por Nava solo formen parti d’Asturianistes por Nava. Otros que tán tan a gustu nel so corripín. Da la sensación de que solo fueron un factor de negociación d’IAS cola parti d’Andecha que pertenez a UNA: vosotros teneis un conceyal en Carreño, nosotros en Nava. Y polo que se ve, non. Eso nel póker llámase un bluff, o un farol.

Sicasí, dellos independientes entraron na UNA, pero claro, llegaron les europees, col “divertíu” asuntu de les firmes d’ANV. Hebio xente que quedó lliteralmente acoyonao cola movida. Y si non, entrugai a esos independientes incorporaos qué-yos paeció too ello. Sería interesante conocer les xustificaciones o desplicaciones de qué pasó y si dalguien asumió dalgún tipu de responsabilidá.

Y como guinda del pastel, apaecen pelos foros dellos demagogos que dicen que la unidá yá tá fecha. Nun sé, será pa ver si a bas de repitilo terminen creyéndolo ellos mesmos.

Asina que sí, montái otru grupu de presión, que nun sabeis con quién vos xugais los cuartos. Y tenei curiáu colo que pidís, que lo mesmo se cumple.

Lo dicho, marcho a tomar otru Prozac.

Too esto empobina a un problema que nun ye menor: la credibilidá del nacionalismu asturianu p’andechar con él o simplemente votalu. Créase’l sambenitu de la falta de chapeta, de la incapacidá pa construir daqué consistente. Pides el votu al vecín nunes elecciones pa unes sigles y , en pasando unos meses, desapaecen. Nun ye serio. Pa rematala ehí ta la imaxen del BA, nacionalistes d’izquierda dicen, participando en dos llexislatures yá nun pactu de gobiernu ayenos a la problemática asturiana. La xente velo y concluye que tener nacionalistes na Xunta Xeneral ye una pérdida de tiempu. Poro, anque soi partidariu de puxar pa iguar esta situación a la que se llegó anguaño, soi de los que piensa que van pasar abondos años pa que pueda surdir daqué con brenga nel nacionalismu asturianu. Permediando cambios xeneracionales imprescindibles.

Si dexamos que pasen unos años pa qu’esto s’igüe, el nacionalismu astur esapaez tal y como lu conocemos al rodiu la llingua. Pudiera surdir otru más alantre, nun sé, pero yá nun taría encontiáu na llingua porque nun diba haber falantes. Sofitaráse nel territoriu, na historia… pero non na llingua. Y, más claro l’agua: el nuesu nacionalismu naz de la llingua asturiana. Tolo demás vertébrase nella.
En bas a ello, yo creo que lo que tamos viviendo agora son les últimes bocanaes del nacionalismu astur porque, cuando esapaeza la llingua -vuelvo repetir- acabóse’l problema.
Poro, creo que tamos obligaos a facer daqué pa qu’esta cultura nun esapaeza, y lo que propunxi paecía “razonable”. Sicasí, teo dicir que yo nun sabía tolo que matizó Xuan Canas. Y muncha murnia y frustración me da lleelo, de verdá. Dan ganes de tirar la toballa… Nin tampoco lo que dixo Ricardo…
…pero entós, qué mos queda? la estinción?
Y los que tenemos un fíu -que ye lo que más m’esmuel-, qué facemos? Que seya monollingüe castellán pa que nun sufra y de pasu nun entienda la llingua del so pa?
Toos a tomar Prozac?
Nun sé. Si toa esa xente yá lo intentó y fracasó -xente con solera y solvente, too hai que dicilo-, a lo meyor ye hora d’intentalo a otra vuelta. Dicen qu’a la tercera va la vencida. Y tamién que’l que nun berra nun mama.
Y porqué d’esta nun pue ser la definitiva? Qué vamos ser el pueblu más tuntu de tol estáu que nun sepa axuntase pa defender lo propio?
Habrá qu’aprofiar y siguir yá insistir. Sinon, vuelvo repetir, qué queda? la estinción?
PD: too esto dígolo ensin militar en partíu dalu nin habeme aconceyao nunca pa falar sobre’l tema con ellos. Poro, entiendo tamién el desánimu de la xente que yá lo intentó.

Toi mui dalcuerdu , otra vuelta, col Xanu: engocha más el llabor traidor dafechu del Bloque pal Engañu, que se diz nacionalista al alto la lleva, que toles metedures de pata y fracasos organizativos d´AA y UNA. Lo que nun quieta que con unes sigles xunitaries, creíbles, viables, el Bloque pal Engañu quedaría barríu del mapa xunto colos sos inventores o diseñadores: Izquierda Unida. Hai que lo intentar. Y pal día 8, si nun concilia mio llema, pos lo que sía, simplemente la FRAS “XUNTANZA YÁ”, lo que sía identificativo.

Yo toi radicalmente escontra de lo que dices Xanu nes primeres frases. Bien ye verdá que la llingua nun morrió, pero cómo ta de va 20 años p’acá? Nun crees que cambió? Nun conoces a nengún guah.e d’agora y a ti mesmu va 20 años? Faláis igual? Nel mio casu non. La influyencia de la TV, internet, les videoconsoles, etc anguaño ye afoguizo. Nel nuesu tiempu de vida na cai eso yera un mal menor.
Yo creo que sí cambió la situación, y Asturies y el nacionalismu!!
Esto va a menos, siempre a menos. Divide y vencerás diz el refrán. Y eso persábelo’l psoe y pp poro, insisto porque yá lo dixe munches vegaes, les sos engarradielles poques vegaes acaben n’escisión. Más bien son corrientes internes baxo una mesma siegla -perdonái pero nun me sal sigla, vencéyolo a un “femenín” de sieglu (coses de la llingua)- y puntu. El casu de Marqués y dalgunos más a la fin tornen al redil.
Amás, según dices: les próximes elleiciones son el caberu peldañu pa la xuntanza (?). Porqué depués sí y agora non. Pa ver si UNA espoxiga o non? Qué te fai a ti pensar eso?
Lo qu’a mi tamién m’enfota ye que muncha xente -pero muncha muncha- arranamos, naguamos, olivamos pola xuntanza o la esistencia d’una única siegla. Y tenemos qu’algamalo pa llegar a la xunta.
Quién sabe si esta páxina pue ser la bola nieve qu’entame a rodiar dende l’altu’l monte?
Ánimu y Xuntanza!

Cuando yo falo de xuntanza nun digo sólo AA y UNA yá qu’eso yá se fizo y, polo que dicen, nun ye posible qu’AA pase a formar parte d’UNA como fizo IAS. Si esi greyu ta enquistáu y nun hai quien a sacalos pues nada, siempre va haber xente contrario -anque lo interesante ye que cuantos menos meyor-. Pero eso ye inherente a la especie humana.
Yo refiérome a tola xente qu’anda al debalu, desencantaos, xente del PAS, d’otres formaciones asturianistes estintes, a xente descontento col psoe y pp, a xente que nunca militó en partíu dalgún… A toos ellos, esmolecíos pol futuru d’Asturies, tien qu’haber un paragües baxo’l qu’abellugamos y xuntamos toos. Y eso ye posible al igual que ye n’otros llugares. Pero hai que ser elásticu nos principios y pa mi hai unu que ye fundamental, casi un axioma: lo que nun guste hai qu’acatalo con DISCIPLINA de partíu y comulgar con ello. Disciplina ye la pallabra clave.
P’amosar la so disconformidá habrá xuntes y más xuntes, y executives, y conceyos, y alderiques, y lo que seya onde volver discutilo y convencer a los demás. Pero con disciplina y llealtá al partíu. Asina furrulen los grandes partíos. Nada de xebrase porque nun toi conforme. Eso ye debilidá -que ye’l cáncanu del nacionalismu astur-. Qué pasó na pasada llexislatura ente’l Fartón y Cagunmimanto? Nun se miraben nin a la cara. Pero naide esgaxó’l partíu. Y con Almunia y Borrell? Y con Rajoy, Gallardón y Esperanza Aguirre? Y con Fernández Mancha enantes d’Aznar? Y con Pujol, Artur Mas y Josep Antoni Durán i Lleida? Y con Morales y Ovidio Sanchez? Y con Mortera y el psoe uvieín? Y con Marques? Escisión, una cana al aire y disciplina de partíu: toos pal redil otra vez.
Y si equí’l problema son los personalismos pues habrá qu’arreblagar perriba d’ellos porque enantes ta’l partíu (o seya, el proyeutu pa too un país -UN MILLÓN de persones-) que la persona (el proyeutu pa UNA persona).
Poro, Carlos X. Blanco cuando dices “Si´l nacionalismu asturianu nun s´atreve a ser anti-monárquicu, valía más que marchare pa casa y xugare colos “madelman”. Y más nosotros, una comunidá autónoma que-y dicen “Principado”. Un nacionalismu que nun s´atreva a soscribir esti llema, a min daríame vergoña y nun quixera saber un res d´él no sucesivo.” creo qu’eso ye lo que toi falando.
Hai qu’afuxir d’eses postures enrocaes. Pa una xuntanza habrá coses que tengas que tragar, y los demás otres qu’a ti te gusten. Los principios personales, siendo la base d’un partíu, pasen a un segundu planu cuando yá furrulen los de toos.
Lo que se trata ye de buscar puntos en común -l’asturianu, más autogobiernu, etc- y lluchar por ellos. Lo conflictivo pues a ceder: tu nesto yo no otro.

Home Xanu!!! Yo trabayo n’Avilés y grado muncho per Uviéu y Xixón y por cada persona que me fala nun amestao curiosu falo con 100 castellanes.
Y los guah.es de 6, 5, 7… años que conozo del Caudal (de padres asturianos y güelos), y d’au soi, meten miéu: la maquinita (pola nintendo ds), le dijo (por díjo-y), nun saben qué ye un güeyu, una fueya, qué ye torgar, etc, etc… Y si lo saben ye como l’inglés: saben que blue ye azul pero da-yos vergoña dicilo.
Claro que se fala MUNCHO menos y que nun se pue dicir cuándo va morrer. Pero hai dalguna persona nel mundu que lo sepa? A mi, a ti y a tolos d’esti blog nun queremos feches académiques o efemérides, bástamos con oyer el día a día pa escuchar la triste realidá.
Cual ye l’artículu d’Aruelu que dices?

Quixera dicir una vez más que´l mio llema solo yera una propuesta, nun ye una postura enrocada, TOMATE. Cualquier otru llema que nos una, nos identifique, cola xuntanza podría sirvir. Cualquiera, ¿entiendes? Como forma de presión en tolos actos nacionaliegos. Y doi la razón al Xanu otra vuelta: l´artículu mentáu sobre Belarmino Tomás ye inoportunun, innecesariu, ensembre, ye más de lo mesmo. Esta páxina nun va entrar nos pleitos xudiciales . Nin los sabemos nin los queremos conocer. Falamos de Xuntaces reales.

Pues pa trabayar pa xuntances reales contái conmigo.
Qué hai que facer?