Blog República Asturiana

L’Ocho de Setiembre, día de la Nación Asturiana. ¿Daveres? Yá nun voi falar del singnificáu qu’ha de tener una data como esta, que se celebre’l día d’una nación, nin la importancia de facese nuna fecha que seya realmente importante pa ella, voi llendame namás a les “celebraciones” que se fain n’Asturies en nome d’ella.

El Gobiernu de la Xunta Xeneral (de dalgunos) de los Conceyos Asturianos, “festexa” esta data como’l “Día de Asturias”, ensin cortase un pelu. Dicen festexar un día n’honor a la nuesa tierra, y fainlo, cómo non, nuna llingua que nun ye la suya. Del calter identitariu, reivindicativu o d’arguyu pa qué falar. Ye nulu. Nun faen un res por esparder esa fecha y munchos ciudadanos asturianos pasen esi día como otru cualquiera. Nun hai actos oficiales por parte de los Conceyos, única ya esclusivamente, los conciertos, mítines, conceyos y demás parafernalia d’autopropaganda entama por, pa y dende’l gobiernu asturianu.

Pero eso nun ye lo peor, dende’l movimientu, o ensame de “movimientinos” que s’autodenomen “nacionalistes/asturianistes” nun se fai tampoco nada importante o de cierta relevancia pal país. Col percal esistente, en cuenta d’un actu u s’amuese que somos munchos los que nun tamos d’alcuerdu con esti sistema, que queremos, camudalu por, per, dende y p’Asturies; caún fai’l so especial festexu. ¡MUI BIEN! Non solo nun somos quién a xuncimos p’amosar l’arguyu que sentimos de ser asturianos, sinón qu’amosamos una y otra vuelta más que tamos separtaos. Que nin siquera pa dir de folixa y amosar al mundiu con arguyu la nuesa condición d’asturianos somos quién a xuntamos.

UNA yá dio anuncide a que diba facer los SOS actos en Xixón, Andecha nun tardará en dicir que lo va facer n’otru llau, el PAS igual nin lo fai público. Asina que seriedá vamos amosar. ¿Tan difícil ye facer dalgo toos xuntos, safitándose nos munchos puntos que mos xunen? Porque, faciéndo dalgo xuntos, dibemos dir los d’ún y los d’otru, amestando muncha xente ilusionao pola xuntura, y posiblemente d’otros muérganos sociales afines al sentir asturianista (Xunta Pola Defensa de la Llingua Asturiana, CSI, SUATEA… etc.) ¡Qué gran sacrilexu! ¿verdá? Tolos fautores sociales que quieren un cambéu xuntos. ¡Cuánto-yos diba prestar a los gobernantes de nueso velo! Qu’anque anecien en ñegalo, daveres nun lleven la razón, que por munchu que los voten, Asturies volvería esconsonar haza l’autoafirmación.

Porque la unión fai la fuercia, nun lo escaezamos. Enxamás algamamos NADA, como movimientu nacionalista. La única vegada que s’entrare nel nuesu parllamentu foi ¡casualidá! con una unión, una coalición. Que daría los resultaos que daría, qu’a lo meyor nun foi bien plantegada, que tuvo los erros que queráis, pero foi la única vez que se pudo facer dalgo. La única ocasión que se vio reflexao nos votos que xuntos, sí hai espaciu abondo fuerte pal nacionalismu/asturianistu nesta tierra na que mo tocó sufrir. Porque nun mos engañemos, en más de TRENTA AÑOS nun fuimos quién a FACER NADA, nun s’algamó NADA. Los llogros que s’obtuvieron nun foron pol movimientu nacionalista, nun foron gracies a él nin a denguna organización nél. Foi gracies a la UNIÓN de la xente asturiano. A munches lluches, trabayu y pruyimientu de muncha xente.

Los asturianos, aidaos por una organización CIUDADANA (XPDLLA) y una académica (l’ALlA) fuimos quién a algamar dalgo de reconocimientu pa la nuesa llingua y cultura. La recuperación de les nueces fiestes, instrumentos, música, costumes, llingua… etc. nun foi gracies, nin de lloñe, del nacionalismu foi pola llucha conxunta de los asturianos. Los mesmos que dixeron nós tamién tenemos una llingua, quixeron falala; perdímos la vergoña de dir a les fiestes de prau a sentir la gaita y beber sidre, y dignifiquemos aspeutos de la nuesa cultura que siempres mos quixeron incultar como “incultes y peletes”. ¿Daveres nun somos quién a facelo tamién cola mayor espresión d’esi sentimientu d’arguyu de ser asturianos que nomamos “movimientu nacionalista”?

Paez qu’inda non, anque duldo que daveres se plantegare la opción d’una xuntura verdadera, pensando nos intereses d’Asturies y del so pueblu. Poro, ¿celebrar el Día de la Nación Asturiana de la manera que se ta faciendo? CONMIGO NON.

Artículu espublizáu en http://republicaasturiana.nireblog.com/post/2009/08/22/8-setiembredia-de-la-nacion-asturque

4 respuestes a “8 setiembre. Día de la nación astur ¿qué?”

Dexar un comentariu

Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible