Blog El xanu’l caborniu
Abenayá nesti pergamín yá tratare esti tema. Daquella llamárelu tener “moral de velatoriu”. Dalgo que considero un pilancu nel camín que nos lleva a algamar los nuestros oxetivos. Y que me paez que nunca nun lu consiguimos arreblagar.
Tenemos una capacidá de resistencia demostrada. Magar los abondos ataques que llevamos arrecostinando a lo llargo de bien d’años siguimos equí de pies y alendando. Y paezme que tamos en condiciones de prolongar esa resistencia por munchu tiempu más. Nesi sen, somos necios pa danos y tamos enfotaos no que defendemos.
Pero namás que tener capacida pa resistir nun basta pa llograr los oxetivos. Pa ello ye mester un saltu cuaitativu importante y perdifícil. Tener les ganes y el convencimientu de querer ganar. De valtar les dificultaes y de pasar de la defensiva a la ofensiva.
Y esto ye lo que me paez qu’enxamás tuvimos, nin tenemos anguaño, nin nortio nel finxu’l cielu que temos cerca de tener. Basta pa ello con echar una güeyada a los nuestros discursos. De poner la oreya no que se siente dayuri. El finxu alredor que xiren los plantegamientos foi y ye siempre’l memu: que nun hai nada que facer, que dalgún día esto va acabase, que namás que tamos ganándo-y tiempu a un pasamentu inevitable.
El movimientu por conservar la nuestra llingua y la nuestra identidá nació y espoxigó hata onde pudo ensin pensar nunca na victoria. Y cualquiera podría dicinos que cualquier actividá que s’entame ensin plantegase nin enfotase en ganar nun suel consiguir los sos oxetivos. La perogrullada de que pa ganar hai que querelo paez como si nos pasare desapercibida per delantre les narices.
Y mientres nun cambiemos el chip y sigamos asitiaos en discursos de simple resistencia endolcaos les más de les veces en llantos polo que fuimos y nunca más vamos volver a ser podremos siguir resistiendo de xuru por un tiempu inda considerable. Pero va ser una resistencia d’aguantar como podamos los emburriones del enemigu ensin casi nin atrevenos d’asomar la cabeza de les trincheres pa escucar siquiera les posibilidaes que tenemos d’avanzar un migayín.
Artículu espublizáu en http://elxanulcaborniu.blogspot.com/2009/07/un-movimientu-que-nun-piensa-na.html
6 respuestes a “Un movimientu que nun piensa na victoria”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Julio 15th, 2009 at 8:27
Partimos d’una situación de mínimos, ensin la oficialidá como símbolu cimeru nel campu cultural, y la xuntanza sedrá l’auténticu asturbarómetru de les nueses posibilidaes nacionales nos demás campos.
Julio 24th, 2009 at 17:48
De xuru, los discursos de los lloramingones amosaron la so esterilidá: Velequí esos que dicen “acábase, acábase”. Pero la llealtá a la llingua y a lo nueso sigue ¿por qué será? Lo malo ye que tapecemos la identidá nacional énte los foriatos. Cosa de complexos. Tapecemos el falar asturiano énte turistes y visitantes, col ánimu de ser como ellos, etc. Ye cosa de facese visible, tamién.
Y un dél pesu políticu nacionalista, eso tamién. Tamos en cuadros, o peor…
Julio 30th, 2009 at 19:30
La voluntá nacional faise na llucha diaria por sacar alantre les coses del país, perriba personalismos y alderiques partidistes. Poro, la xuntanza ye la única igua del movimientu nacional asturianu nel sen políticu.
Agosto 13th, 2009 at 13:38
La xente quier facer país cuando hai un proyeutu illusionante detrás y unes ventaxes na vida nuna comunidá dixebrada. La xuntanza del nacionalismu d’esquierdes y llueu de tol nacionalismu (que sofite como mínimu la oficialidá y la nacionalidá ensin reserves) amosaría esi panorama que fai tanta falta nel país.
Agosto 18th, 2009 at 17:28
Tener como oxetivu la victoria entama por plantegase como puntu partida un Día de la Nación Asturiana xunitariu nel qu’Asturies vea que l’enfotu nacional supera les rivalidaes partidistes. Dende esi fechu al algame de representación parllamentaria del nacionalismu asturianu d’esquierdes namái fadrá falta caltener la xuntanza en más y más estayes compartíes.
Agosto 19th, 2009 at 11:45
Toi d’alcuerdu.
Ún de los meyores actos públicos qu’amosaríen esa xuntanza -y animaríen a muncha xente- ye’l día de la nación asturiana. Esi sedría un puntu de partida perbonu.
Pero yá se sabe…