Sergio Velasco
A estes altures paez una babayada falar del trabayu na estaya de conceyos; poro, ye de señalar la falta d´atención n´esti apartáu por parte de los partíos nacionaliegos. Tamos tan ocecaos n´algamar un escañu na Xunta que escaecemos los peldaños más elementales: la base popular.
Nun podemos falar de xunión o andecha de cara a unes elleiciones nacionales, estatales o europees si nun fincamos los pies nuna base sólida dada pol pueblu; y l´unicu mou d´algamar esta base ye trabayar primero nos Conceyos y Mancomunidaes.
La xente ya nun quier oyer, quier que la oigan; ta farta d´oyer tou tipu de promeses, proyeutos y parabienes pal Conceyu ensin que los políticos se paren a escuchar les opiniones de los vecinos.
Ye verdá que la mayoría de los ciudadanos dan de llau a la política y a los políticos ¿por qué?: la respuesta tá ehí, mira-y pa los nuesos Conceyos, a los nuesos dirixentes y a los sos sirvientes.
Aún asina hai un bon piñu de vecinos que se esmolecen y lluchen pol bien de la comunidá. Equí ye au hai qu´entamar a trabayar, escucar los problemes y propuestes de los vecinos pa da-ys una solución clara y válida pa ellos y pa nos; hai que facer ruiu enllenando les cais con fueyes informatives so los problemes qu´atañen al pueblu y ¡Muy Importante!, informar so la solución qu´hai que da-y al tema. Intentar llegar a la prensa ( noticies, denuncies cartes al direutor…. Buscar una estaya nos periódicos de tirada de baldre, seya como noticia, columna d´opinión o collaboración regular col mediu).
Caro que, pa llegar al pueblu, pa qu´estos mos tengan como posible opción, lo primero ye dase a conocer y facer ver a los vecinos que somos una opción válida y creíble pa solucionar los sos problemes. Si miramos un pocu´l pasáu veremos que praúticamente tolos partíos d´esquierdes entamaron asina: socialistes, comunistes…pa llueu escaecelo.
Pero toos estos ideales nun valen un res si nun entamamos a facer realidá la nuesa casa, la Nacionaliega.
Llevo tiempu lleendo esti blog y saco delles conclusiones:
1. La dixebra del nacionalismu astur débese a temes personalistes. Equí hai un complexu de “xefe de tribu” (YO y la mió xente nun “tragamos” a los del castru d´al llau) y asina mos vá dende hai 6000 años. Recorda-y a William Wallance, namás ser nomau Sir, presenció la griesca ente nobles d´Alba pa ver quién diba ser el Rei, a pesar de tener un personaxe destacáu.
2. Les puñeteres sigles. Paez mentira que la xente s´engardie por un nome (¿ Frente Xudáicu de Lliberación ó Frente pa la Lliberación de Xudea?)
3. Nun hai más puntos que dixebren al nacionalismu astur. ¡ SOLO 2 !.
Agora vamos ver lo que mos xune:
Nel sieglu pasau el PAS espublizó un “Cartafueyu Asturianista”; de xuru que tolos nacionalistes tan d´alcuerdu cola mayor parte de lo que ellí s´escribe ( ¿Ye Asturies una nación?; ¿Tién llingua Nacional?; ¿Tién fechos diferenciales?; ¿Tién Historia, Bandera, Himnu, llendes bien definies…?. D´esti Cartafueyu parto yo pa dicir que los nacionalistes, TOUS, ( PAS, UNA, AA, BA, fasta dalgún del URAS) tenemos milenta puntos de xunión frente a ¡ DOS! de dixebra.
Teniendo too esto claro ye de recibu que torne al tema los Conceyos. Creo firmemente que ye muncho más fácil algamar una xuntanza de nacionalistes na estaya del Conceyu ( a la fin conocémosmos tous), que na estaya del País. Y asina se demostró cuando s´algamó una xuntanza Nacional PAS-UNA pero que trabayó, y muncho, na estaya de Conceyu, presentándose a les elleiciones como Coalición Asturianista y algamando nel mió Conceyu, Samartín del Rei Aurelio ¡más de 400 votos!; y toi falando del Conceyu feudu del socialismu más ranciu y enquistáu del país( equí vivimos nuna “dictadura democrática” del PSOE dende les primeres elleiciones democrátiques y ye la cuna d´ hestóricos cabezaleros del “Partíu”). Anguaño, cola perda de población 400 votos equivalen a 1 conceyal.
¡¿Qué ye?, ¿que nun se puen algamar unos mínimos?. De xuru que si. Tolos nacionalistes bregamos pola defensa del patrimoniu Astur, la llingua, el mediu ambiente, la igualdá social, el desarrollu sostenible, trabayu dignu y pa tous, el racismu…¡ frente a 2 puntos que mos dixebren!
En SMRA hai potencial asturianista, 4 partíos asturianos faen propaganda elleutoral nel Conceyu( AA, PAS-URAS, UNA, BA-IX). Paécenme demasiaes opciones pa un Conceyu de 20.000 habitantes, sobre too pa una ideoloxía inda verde n´Asturies y que namás favorez a los partíos mayoritarios. Hai que camudar esto.
¡POLA XUNTANZA!
15 respuestes a “Na estaya de conceyu”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Julio 9th, 2009 at 15:42
Partíu asturianu IX-BA…
Acabo quedar muertu.
Julio 9th, 2009 at 22:33
Toi col anterior IX nun ye asturiano nin nacionaliego, nin asturianista, nin rexonalista, ye federal español y republicano.
Julio 10th, 2009 at 10:21
Otra enfermedá endemica del nacionalismu ye l’odiu que per parte de los de “siempre” d’Andecha Astur se tien hacia tolos demas y que vemos como pasa de xeneracion en xeneracion. Pa exemplu tenemos en que l’allumau de turnu s’atreve a decir quien ye y quien nun ye asturianu, al mas puru estilu nazi.
No referente al articulu creo que t’equivoques en delles coses, pero voi a una: son munches mas de dos les razones que separten a Andecha y UNA y son milenta mas de dos les que separten a estes dos del PAS.
Julio 10th, 2009 at 15:44
El nacionalismu asturianu tien dellos problemes más qu’esos dos. Per otru llau, n’Asuries hai esquierda nacionalist que defende al Pueblu Trabayador Asturianu (AA), hai nacionalistes d’esquierda que defenden al Pueblu Asturianu trabayador o non, y hai un centru-centrodrecha (PAS)xunta una drecha (URAS). Ente los dos cimeros y los dos caberos les máximes estremancies esistentes son les de la política social a desendolcar y la tema del drechu al autodetermín. AA-UNA son d’esquierdes y defenden el drechu al autodetermín d’Asturies y el so pueblu, mentes que’l URAS-PAS son rexonalistes y fasta que nun haya una bona burguesía asturiano que puxe polo nuestro cuido que nun lo van defender enxamás. Al Bloque por Asturies inxertu n’IU nun sé si lo cnsiderar mui nacionalista pos siempres dexen pa prau les sos vindicaciones asturianistes p’apautar.
Sacantes coses puntuales, la mayor torga del nacionalismu asturianu, ye la falta de trabayu nos conceyos y concenciación de la xente. Hai de ser quién a poder esconsonar na xente’l sentimientu patrióticu asturianu. Si la xente nun ye a ver que col actual sistema PSOE-IU-PP nun va camudar nada, y poro, too dirá a peor.
Julio 10th, 2009 at 23:22
De IX dicenlo los sos estatutos non nengún “nazi”.
Julio 16th, 2009 at 23:43
Por supuesto qu’hai xente más vieyo que yo, pero con 37 años y un fíu yá toi más que refalfiáu de too esto. Siempre voté a una opción asturianista o nacionaliega pa, como siempre comiciu trés comiciu, frustrame’l nel escrutiniu y ver como les nueses ruindaes polítiques se sopelexaben al altu la lleva.
Por culpa de lo que toos sabemos -los pu*tos personalismos- esto ta como ta. Morriendo, agonizando. Esmuciéndose al estermín cola nuesa connivencia.
Pal nuesu casu vien a güevu un refrán o asertu mui común en castellán:
“Entre todos la mataron y ella sola se murió.”
Nacionalista de tola vida apunta: <>
Pues yo digo que les corrientes internes del psoe y del pp -que les hai a degüeyu y mui enfrentaes- sepártense ente sí milenta vegaes más qu’ente AA y UNA o del PAS.
Lo qu’equí se berra, glaya, arrana, nagua, oliva ye por algamar unos mínimos que permitan dir toos xuntos. Y tán dificil ye eso?
Si n’otros sitios son quien, porqué equí non?
Julio 17th, 2009 at 9:59
Sí, Tomate, ye tan difícil y muncho más. El que talante qu’idegues polítiques como les de la xente de l’Andecha Astur que caltién la sigla pueden convivir coles de la xente de la UNA, va dáu. Quien podía compartir eses idegues, o una parte d’elles (militancia activa, participación nos movimientos sociales, posicionamientos d’izquierda nacionalista, compromisu activu coles lluches de los trabayaores, etc), magar que con otres actitudes menos sectaries, dígotelo ya directamente: NUN TIENEN CABÍA NA ACTUAL UNA. Y si nun lo crees, entruga polos últimos pasos internos. Eso sí, espero que nun sigan apaeciendo per equí esos “unitarios” a vender motos tipu “la unidá yá tá fecha”, porque ye cenciellamente MENTIRA.
Marcho a tomar el Prozac.
Julio 20th, 2009 at 22:20
Nun sé problemes habrá Xuan Canas, yá que nun ando metíu en temes de política y eso que siempre me gustaron. Lo único cierto que sé ye que dende que nací lo único que m’apasiona nesta vida ye la llingua asturiana. Y ver morrer lo que más quies da muncha pena y dolor. Asina ye.
Y si esi procesu fuere natural pues habría qu’asumilu. Pero cuando lo que ta pasando ye por fataes ye pa engafientase y muncho.
Amás, ye cuando unu se da cuenta que los demás que cacarexen tamién qu’amen la llingua asturiana ye mentira. Primero tienen otros intereses, y llueu la llingua.
Julio 21st, 2009 at 10:30
Pero Tomate, ye que los partíos trabayen pa y en función de los problemes de la xente, de les sos inquietudes. Y equí tenemos la primera cuestión, cincante a la llingua. L’asturianu nun ye vistu como un problema gordu de verdá pola población asturiana. Sí, tán les encuestes de Llera, cierto, pero esi aparente esmolecimientu nun lleva a un compromisu activu: queda solo nun estáu d’opinión. ¿Usté tá al favor de la llingua, considérala un idioma peninsular como los otros, quier que s’enseñe y que seya oficial, etc? Rempuesta: sí. ¿Y? ¿En qué se traduz eso? La xente común y corriente, esa mesma que da eses rempuestes, pasa olímpicamente. Nun hai más que ver los resultaos electorales o mesmamente cuánta y cuála xente acude añu tres d’añu a les manifestaciones pola oficialidá. Si a les manifestaciones acudieren non 5000 persones sinon 200000, entós yá veríes si l’asturianu yera un problema pa estos manguanes, ya veríes cómo maniobraben, cómo procuraben nun perder votos d’esos manifestantes, etc. Pero como son conscientes de qu’eso nun ye asina, yos-la trai al pairo. Son sabedores de que la correllación de fuercies tá al so favor, non al nuestru. Y ehí tá’l quiz de la cuestión. ¿Cómo facemos pa camudar esa correllación de fuercies? O se teoricen formes incorrectes de trabayar, que tá más que demostrao que nun funcionen, o inda pior, nun se teoriza nada, ¿pensar, pa qué?
Pero si la preocupación de la xente común col tema de la llingua nun pasa del estáu d’opinión, entós ¿qué pasa, tolo demás va bien, o a la xente nun-y interesa nada de nada? Pues claro qu’hai coses que-yos interesen, y muévense más. Interésen-yos les hipoteques, la seguridá llaboral, la emigración forzada, los despidos, nun sé qué cosa contaminante que van mangar a la puerta casa, etc. Y de fecho, hai movilizaciones puntuales por esos temes. Pero incluso asina, esos conflictos permanecen aisllaos unos d’otros. Na mayor parte les veces, los nacionalistes nun participen nello, o participen dende fuera, non coldu con coldu colos afectaos. Unos, acudiendo a les manifestaciones qu’otros convoquen, y otros, a base de comunicaos y charletes, pura imaxen. Falten organizaciones que tengan visión de conxuntu d’Asturies, que tengan un plan de trabayu p’Asturies, qu’organicen a tolos afectaos, los coordinen, los sumen, que-yos dean soluciones xenerales, que faigan a los distintos sectores, empreses, localidaes, etc., ver les causes comunes de los sos problemes. Conozco xente nacionaliega que llee los medios y entérase de los problemes de nun sé quién. Proponen facer dalgo con esos problemes, y lo que proponen ye organizar una tertulieta colos protagonistes del problema. Por exemplu. Pero nun se planteguen ser ellos tamién protagonistes, organizar a la xente, llevar propuestes d’aición, tar presentes en sindicatos, colectivos ciudadanos. De lo que tienen vocación nun ye d’organizaores y axitaores sociales, sinon de “coordinaores”, “interlocutores”, “comunicaores” (nel sen de medios de comunicación). Váse a les coses pa ser vistos, muncha parafernalia, pero pocu, mui pocu trabayu de base. Y dempués piensen que los auténticos protagonistes van facer casu d’ellos, que los van votar, que van contemplalos como iguales. Y lo más murnio ye que nun son conscientes de la imaxen tan patética que dan pa la xente más consciente y más involucrada. Tá mui bien qu’un partíu que diz que-y preocupen los problemes d’Asturies reivindique la llingua, pero DENGÚN partíu puede facer pivotar la so política ESCLUSIVAMENTE alrodiu la llingua. Ye asina como apaez el sambenitu: ah, sí, los del bable. Y resulta que solo del bable nun se vive. Dellos esto nin lleguen a ello; otros lleguen, pero tán mui bien como tán y nun quieren mover más el culu. Y ún nun ha mover el culu na midía que-y apetez, sinon na que ye necesario, na que la marcha de les coses pide. Milítase afiliándose, como quien s’afilia a la Xunta pola. Abasta con dir a la mani del Día les Lletres: yá cumplí. Y como eso, colo demás. Agora paez tar de moda la teorización del “trabayu nos conceyos”. Claro, un conceyín como Pravia, Nava, Noreña, etc. Conceyos que son como microcosmos: too a escala reducía. Como too ye mui prósimo y inmediato, como tol mundu se conoz y te conoz, ye más fácil facer política, quién sabe, igual hasta sacar un conceyal. Pero les consecuencies d’esi trabayu nun van más allá de la llende del propiu conceyu. Onde de verdá se corta’l bacalao d’Asturies ye nes ciudaes grandes: Uviéu, Xixón y Avilés, pero la política n’esos sitios ye cualitativa y cuantitativamente distinta, menos inmediata, menos fácil y muncho más complexa. Ye nesos sitios onde palpita’l coral de la política asturiana, onde se deciden les prencipales batalles. Y los soldaos nacionaliegos, con mui poques esceiciones, l’únicu papel que suelen xugar ye’l de participar nos desfiles.
Bah, si total, unos nun van entendelo y otros nun van dame la razón…
Julio 21st, 2009 at 16:51
Si hom, entendílo too, y toi d’alcuerdu contigo.
Pero nel nacionalismu astur lo que debía de ser l’argamasa p’axuntanos a toos ye precisamente esi vínculu de xunión que tenemos: la llingua. Esa debería ser la basa fundamental. La reivindicación llingüística como pegamentu de tolo demás.
Pautao esto habríen falar de lo demás: educación, emigración, sanidá, cultura… pero siempre como CORRIENTES INTERNES como ocurre nel psoe y pp.
Lo que faen ye engarrase emplegando la llingua como comodín que pal asturianu d’a pie siente como dixebra del nacionalismu, quiebra y mecigayu, risión y caxigalines de los del bable.
Qué ye lo que tanto separta a los nacionaliegos astures? Ye más grande qu’al pp y psoe que gobiernen xuntos n’Euskal Herria?
Ehí la pastia que los amiesta ye’l nacionalismu españolista. Depués engarraranse na llexislatura, votarán en contra, pegaránse, sacarán trapos sucios, en Madrid pondránse pingando, insultaranse, …. Pero a la fin, cuando han votar daqué CLAVE pal nacionalismu españos n’Euskal Herria van votar xuntos. Como ficieron na investidura.
Porqué equí nun se pue algamar un mínimu tamién cola cultura asturiana y el meyoramientu socio-políticu d’Asturies? Porqué equí nun pue esistir un únicu partíu con corrientes internes? Porqué equí caún funda un partíu?
Da pena, muncha pena ver cómo lo qu’unu más quier va morriendo pasu ente pasu. Salú.
Julio 23rd, 2009 at 17:07
Hai unes elecciones y pído-y el votu al mio vecín pa unes determinaes sigles y consígolu. Pa les siguientes elecciones vuélvo a pidi-y el votu pero pa otres sigles distintes y tamién lu consigo. A la tercer vegada torno a pidi-y el votu pa otres sigles que nun son nin les de la priver vez nin les de la seguna y entós el mio vecín pasa de min definitivamente. Xuntances, dixebres, sigles que nacen, sigles que muerren… Esa ye la historia del nacionalismu hasturianu desque nació hasta güei. Da la imzxen de ser cosa de guah.es, dalgo p’andar per casa y poco serio. ¿Solución?. Poryectos unitarios, somorguiaos na problemática cotidiana de la xente y, perimportante y fundamental, que pervivan nel tiempu, que s’afiten y consigan reconocimientu na sociedá.
Agosto 30th, 2009 at 21:04
Sergio, en llegando de vacancies y viaxes lleí agora to artículu y prestóme. Tamién la intervención de Xuan canas, por cantidá y calidá, podía ser un artículu en sigo mesmo. Gracies a los dos y a los demás. Sí, esti filandón creo que tuvo nivel, collacios. Sacaría yo munches idees ente toos.
Septiembre 11th, 2009 at 13:54
Pa tener brenga n’Uviéu, Xixón o Avilés, primeru hai de “garrar tables”, si ye posible nos conceyos pequeños o medianos. Amás entrar nesos conceyos como lo tan faciendo los partios nacionaliegos con Asturies ye malgartar fuercies alo fatu, ¿onde tamos na prensa? ¿quien nos conoz?…
Nun diga que nun faga qu’intentalu, pero paezme muncho más prauticu entamar nos conceyos medianos (en Carreño, Nava y Piloña algamose), más nada por tener militancia que tire d’ello.
Per otru lláu paezme una mui bona llabor la que tan faciendo los militantes nacionaliegos, sobremena en Xixón, pero falta-yos más xuntura ente les fuercies nacionaliegues pa desaxe ver. El PAS en Xixón tien abondo pesu, cola suma d’UNA y AA otru gallu cantaría.
Septiembre 11th, 2009 at 15:44
Aristón, nel otru artículu ficisti un bon resume de los finxos qu´hai que poner pa trabayar a comuña. Toi d´alcuerdu. Y yo nun esprecetaría de los conceyos pequenos tampoco. Toi d´acuerdu tamién neso.
Septiembre 12th, 2009 at 14:04
Gracies, Carlos polos tos comentarios.
Esti movimientu de “pola xuntanza” tien de maurecer y entamar a enseñar cares y númberu de persones que lu sofiten. Esí pasu, decisivu va sirvinos pa camudar estratexes de los partios nacionalistes.
Pueo dicivos que nun hai porque asustase diciendo que son unes 20-30 persones les que tiren pola xuntura, porque estes van ser les que den la cara (dalgunos ya lo faceís) porque la realidá ye que lo que proponeis ye un plantegamientu mui oxetivu asumible poles bases de los partios mentaos.
L’asuntu los cabezaleros, hai vegaes que cuando un capitulu d’un llibru se fai mui pesáu de lleer, ye meyor pasar páxina porque al final del camín, vamos alcontranos toos.