Carlos X. Blanco
En viendo los comentarios d´estes selmanes de magar salió la web Pola Xuntanza, pienso qu´hai un gran desánimu sobre les posibilidaes del nacionalismu asturianu. El desánimu afítase nos roinos resultaos electorales qu´añu sí y añu tamién vien collechando esta opción, una opción que vien representada por delles sigles. La simplaya suma de los votos a estes sigles nun reflexa, a mio entender, el resultáu sinérxicu d´una xuntanza real. Los comentaristes que mos indiquen consideraciones de mera aritmética electoral pequen, creo, de nun saber lo que son los efeutos “bola de ñeve” y de la “Gestalt”.
La bola de ñeve –si s´algama- ye roina al entamu, pero medra al rolar y va sumando xente. L´efeutu “Gestalt” diznos que´l Tou ye más que la suma de les partes. Un espaciu diversu (non un baturiciu o una mecigaya) pero de reclamación nacional xunitaria, diba llegar más a la sociedá que trés o cuatro minúsculos requexos.
D´otra banda, yo nunca fui “electoralista”. Yo nesto, confiésolo, teo una educación marxista: llegar a les instituciones parllamentaries y municipales ye un mediu y non un fin. Ye una manera de llegar a la sociedá y de facer axitación y propaganda. Y ye claro que los nacionalistes asturianos tenemos que dar solmenones a los sectores apigazaos de la sociedá. Tamién, sabiendo un pocu d´hestoria de los movimientos sociales, teníemos que saber de sobra que los CONSEYOS son una alternativa (non escluyente) a los partíos. Yá sé que la pallabra rusa soviet ta mui engochada pol estalinismu, pero toles verdaderes revoluciones del mundu entamaron arrincando de conseyos vecinales, fabriles, municipales, etc. Son conseyos onde la xente se conoz cara a cara y, pencima de militancies y partidismos, trabayen a comuña. Si estos conseyos que, recoyendo delles quexes con bon xacíu que s´asoleyaron nel foru de Polaxuntanza, fueren “Asturianos” pencima de cualesquier “-ismu”, y con un pequeñu garrapiellu d´idees-fuerza (asturianizar llingüísticamente la nación, torgar iniciatives españolistes, etc.), pali que pali diben llegar a toes partes: conceyos, barrios, universidá, institutos, entidaes culturales, movimientos vecinales, etc. Entamar dende la base con un trabayu “conseyista”. Les consideraciones electorales diben ser el teyáu, pero los pegoyos y muruecos taríen puestos.
Artículu espublizáu en http://carlosxblanco.blogia.com/2009/062701-conseyos-d-emancipacion-nacional.php
18 respuestes a “Conseyos d’emancipación nacional”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Julio 3rd, 2009 at 14:07
Nesti momentu hai d’averar el proyeutu nacionalista, simplificando la definición de “nacionalista”, porque la xente relaciónalo cola violencia,con ETA, colos “problemes” qu’hai en Catalunya, una realidá que nun tien ren que ver cola realidá asturiana. Hai d’apostar por espacios d’aición conxunta, la xuntanza política yá vendrá hubiendo aición contunxa. Amás que xunción d’UNA-AA nun diba trayer n’Asturies 1.961 votos (1.155 d’UNA y 806 d’AA; que foren los resultaos finales de les europees) sinón qu’esi númberu sufriría una xuba bultable, ente otres coses porque’l proyeutu conxuntu diba ilusionar muncha xente qu’esa vegada nun foren votar y si arrimamos el proyeutu a la sociedá de xuru entramos na Xuna.
Agora precisamos muncha reflexón.
Julio 3rd, 2009 at 17:25
Si hai xente qu’entá nun ve que IAs y AA tan xuntes n’UNA, poco queda por facer n’esti pais.
Julio 3rd, 2009 at 19:46
Agora resulta que AA ta en UNA y non ye ANDECHA NACIONALIEGA la que ta en UNA.
Julio 3rd, 2009 at 20:10
El nacionalismu asturianu ensigo mesmu ye un proyeutu fracasáu como nun mos paremos a reflexonar y llegar a un entendimientu ente los nacionalistes asturianos (qu’anque parezca mentira, sigue habiéndolos depués de 12 sieglos).
El PAS fracasó de la mano de Sánchez Vicente, sábelo él tan bien como naide que nun va tornar a rascar nada na Xunta Xeneral. Y ye una pena porque’l PAS podía ser el referente de los nacionalistes asturianos de centru, centru-drecha, si apostase claramente por un proyeutu nacional p’Asturies, cosa pola que duldo qu’apostare n’algún momentu de la so historia.
Andecha Astur eleición tres eleición va cayendo en votos, si bien ye cierto que sofrió una escisión y la perda muncha militancia y encima quedaron como los malos de la película. Pero de siguir asina, compitiendo con otres siegles más “guapes” y con más tirón como ye la UNA nun tienen nada que facer más que mantenese nos 1000 votos.
Y p’acabar la Unidá Nacionalista Asturiana (UNA), productu de quésiyo cuantes refundaciones de refundaciones. Otru proyeutu fracasáu que nun va pasar del techu de los 4000 votos qu’algamare colos verdes depués de vender aquella comedia de los 8000 votos al día siguiente presentase.
Si los nacionalistes asturianos queremos tener voz y capacidá d’aición nel Parllamentu Nacional y nos conceyos lo qe nos queda ye que primero’l nacionalismu d’izquierda (AA-UNA) llegue a un entendimientu y depués si’l PAS apuesta claramente por afitar un proyeutu nacional p’Asturies, con Sánchez Vicente en casina, llegar a un entendimientu ente tol nacionalismu asturianu. Esti Pueblu tien dolce sieglos d’hestoria y dende va 6 o 7 cualesquier tiempu pasáu foi meyor, asina que nun tamos pa facer distinciones ente unos y otros, lo primero ye Asturies y salvar la nuestra identidá como Pueblu y esi va ser l’únicu camín.
Lo que pagaría yo por ver la cara de los dirixentes del PSOE si’l nacionalismu asturianu algama representación na Xunta Xeneral y tamién la de los dirixentes d’IU, porque’l día que los nacionalistes asturianos seyamos quién a entendenos, IU va fuera.
Julio 3rd, 2009 at 21:16
Acabóse, “Si hai xente qu’entá nun ve que IAs y AA tan xuntes n’UNA, poco queda por facer n’esti pais.” eso diba por min?
Soi militante d’UNA-Mocedá dende hai un tiempín, precisamente porque UNA ye la xuntanza del nacionlismu, sé perfeutamete d’ónde surdió UNIDÁ, agora UNA.
Pero taba relfexonando sobro’l númberu de votos que podemos algamar xunciéndonos UNA y los qu’agora lleven les sigles d’AA.
Toi totalmente d’alcuerdu con “nacionalista asturianu”. Lo CIMERO YE ASTURIES NON LES SIGLES DE DENGÚN. Yo amestaría’l peligru que cuerre esti pueblu con UPyD, sola so tradición utraespañolista con eso na Xuna y col PSOE-PP nun sé si non fasta prohibiríen l’emplegu de la llingua.
Salú!
Julio 3rd, 2009 at 23:43
Lo que diz el firmante como “nacionalista asturianu” paezme bastante razonable y realista.
Julio 4th, 2009 at 4:08
Toi con el xanu’l caborniu, lo que diz nacionalista asturianu paez que tien xacíu. Sigo pensando que’l fundimientu d’IX habría d’aprovechalu un nacionalismu asturianu d’izquierdes, pero pa eso ye necesario dexase de personalismos, rocees y dalguna qu’otra vendetta. Lo que xune a AA y a UNA ye más bultable que lo que los diferencia (ehí tan los Principios ideolóxicos d’ún y d’otru). Ye eso no que tenemos qu’aferranos y nel “enemigu” políticu común. Lo demás, ye siguir faciendo’l ridículu.
Julio 4th, 2009 at 17:32
Viendo les valoraciones d’UNA y AA vese que les dos formaciones tán pel llabor de “falar” coles otres organizaciones de cara al futuru. Pero, eso sedrá real?
El tema ye que deben tragar colo que nun-yos guste pa dir toos xuntos nuna única formación. Yo tamién suaño con ver la cara de la fsa si dalgún día’l nacionalismu astur saca diputaos.
AA: debería baxar de la burra y de facer esos brindis al sol de “el día d’una Asturies dixebrada ta cada día más cerca” que nun son más que babayaes. Viendo los sos principios tendrán bien claro lo que quieren, pero nun saben el camín p’algamalo. Deberíen reflexonar y vivir más la realidá, asumiendo que con esi proyeutu nun van a nengún llau. Cualquier asociación de vecinos si se presenta saca tantos votos como ella.
UNA: yá sé qu’UNA ye una xuntanza ente IAS y AA. Pero mientres sigan otros coles sigles d’AA la xuntanza nun ye completa. Eses sigles AA tienen solera yá d’años y la xente tienla mui venceyada al nacionalismu astur. Sólo la so desapaición -nun lo deseo-, meyor integración n’UNA ufiertaría la base nacionalista pa tolo demás. Poro, creo qu’UNA debe facer más esfuerzu tovía qu’AA na xuntanza. Ha seguir falando con ellos, faciéndo-yos ver que toos somos necesarios, qu’esi testeronamientu nun val pa nada. Creo qu’UNA ha tener paciencia con AA y aprofiar pa qu’AA baxe de la burra.
Esto yá ta perfalao. Pero AA debería integrase, los que queden con estes sigles, n’UNA, como una corriente interna.
Nes valoraciones d’AA falen de pretender falar con otres fuercies polítiques nacionalistes pa dir entendiéndose. Espero que seya asina y que, anque nun lo dicen, fixen como sí lo fai UNA el so oxetivu nes próximes elleiciones asturianes.
Una vegada xuntos deberíen picar a la puerta del BA. Pero esi ye otru cuentu tovía más hardcore.
Dambes dos formaciones nun deberíen dexar pasar el tiempu. Dos años pasen rápido y UPyD va sacar de xuru dalgún diputáu na Xunta Xeneral.
Representación represora contra’l nacionalismu astur qu’UNA y AA deberíen tener como únicu referente de xuntura. Lo demás ye materia grasa.
Julio 5th, 2009 at 14:29
Anque munchos camentemos que ye bramente urxente un entendimientu ente organizaciones politiques asturianes creo que habria facese a mediu-llargu plazu. Desplicome: anque bien ye verdá que la UPyD ta picando a la puerte (y tovia nun sabemos na d´ellos, nin en que conceyos esisten, nin quien ye´l so llider asturianu…)hemos de tener pacencia. De dase una posible xuntanza pola que munchos de nos naguamos, o bien se fai la selmana que vien y nos ponemos a trabayar enforma nos conceyos, o si se da en mediu añu estes elecciones habriemos dexales pasar, al menos les eleciones asturianes. maurecer les idees, dase a conocer, glayar los oxetivos esta vez SI asumibles pol pueblu, ver a otros desgastase y cuando se tea fondamente afitaos blincar pa la Xunta. Pamidea, un de los fallos estratexicos del asturianismu politicu en toos estos años foi el desgaste y amosar sintomes de debilidá presentandose en elecciones a lo xole y quedando col culo al aire delles vegaes polos baxos resultaos. Y en cuantes a Xuan Xose Sanchez Vicente, PAS, Union Asturianista…Pamidea que tamos engarrandonos munchos pa un espaciu qu´anguañu entá nun ye grande abondo, anque sí creo nel espaciu potencial qu´esiste de llegar toos a un entendimientu. Falar con esa xente, toos xuntos, ye vital. La razón ye cenciella, hestoricamente, per enrriba de distintes decisiones o interpretaciones, foron los que meyor supieron conectar cola xente. Nun podemos escaecenos de la xente competente que militó nesos partíos y que colaron polo que tos sabemos y carecemos, pol descontentu, apatía y7 desesperanza. hai que se mover darréu
Julio 5th, 2009 at 15:18
Encamiento qu’agora tenemos d’enfotamos en xunidá d’aición a curtiu plazu, diendo toos xuntos y facer manifestaciones, y toa triba d’aiciones XUNTOS; porque asin veríase que tamos toos nel mesmu carru, la llucha pola sobrevivencia del nuestru pueblu. Con xunida d’aición anguaño, mañana podremos xuntanos nun partiu onde podamos tar toos, onde haiga alderique internu y onde la militancia se motive y trabaye, toos a comuña. Si facemos AGORA esa xunidá d’aición, anque la xuntanza política sía trés meses enantes de les prósimes eleicones, sí tendríemos munches posibilidaes d’entrar fasta de sacar más d’un diputáu y si siguimos col trabayu arrampuñaremos munchos votos asturianistes a IU simplemente pola so non-aición.
Nueva mente rescampla la necesidá de trabayu y sobro too TRABAYU N’ANDECHA.
Un saludu!
Julio 5th, 2009 at 15:43
Quicias me desplique mal. La xunidá, como bien diz pelayu, tien de dase entos mismo, yá, darréu, ye urxente. pero enantes de decidise a pegar el blincu a la Xunta Xeneral ha de tar too bien calculao y analizao. Dir cola seguridá d´algamar a lo menos un representante y cola seguridá de nun quedar a un pasu. Yo camiento que si esistiera una xunidá completa d´entidaes y persones de tolos espectros del nomau “asturianismu politicu” la representación yera más que probable ensin facer más nada. Pero hai que convencer, por eso, digo, que lo meyor sería dir a poco a poco, pasín ente pasu, trabayando primeramente nos conceyos y dandose a conocer…
Julio 5th, 2009 at 16:14
Desplicastite perbién, debí se yo’l que non. Yo quería dicir que si la xuntanza d’aición facémosla agora, anque se constituya un partíu únicu ha tres meses de les eleiciones, sí tendríemos representación. Si nun facemos esa xuntanza d’aición, entós sí sedría meyor nun presentase.
Julio 6th, 2009 at 1:38
Si supierais lo que hai de verdá dientro de los partios asturianistes…
Realmente n’Asturies hai bastante xente que nagua pola oficialidá, y que-y prestaria un partíu con representación institucional.
Abonda xente con ganes y con capacidá paso por estes organizaciones y foron llaminaos rapidamente o simplemente colaron por aburrimientu.
En ca ún de los partidos qu’anguañu s’autodenominen asturianistes o nacionaliegos, “militen” como muncho venti persones y la llinia politica marquenla ente cinco “ideologos”.
Yo pienso que’l movimientu nacionalista asturianu ta mas vivu na cai o na rede que nos partidos nacionaliegos como tal.
Por eso una xuntanza o unes sigles concretes de les que ya esisten nun nos tienen que preocupar. Si posible y viable una bona xuntanza, será bien acoyía. Si non surdirán otres organizaciones con xente normal que ignorará y olvidará tolo chungo que esistió hasta agora.
Julio 6th, 2009 at 10:52
Yá pero nun podemos tal tol día resurdiendo de la povisa. Hai que trabayar colo que yá hai. Que ye malo, pues habrá que cambialo, daqué bono tendrá.
Paez que la xuntanza arranámosla toos. Y esi ye l’únicu camín. Agora bien, yo nunca tuve en partíu dalu, y nun sé cómo ye la xente. Poles declaraciones nesti blogue paez que los d’AA que queden tán encerriscaos y nun dan el brazu a torcer. Pero por eso la UNA ha de siguir negociando. Ehí tán los bonos políticos, los bonos negociadores.
Mientres sigan esistiendo más d’una sigla vamos mal. Sacantes de qu’UNA entame a xebrase en votos y algame 10.000 o más.
YO teo 37 años y dende que pueo votar llevo votando a opciones asturianistes y nacionalistes. Y sí, políticamente ye perfrustrante ver cómo elleiciones trés elleiciones tamos siempre igual: engarraos y separtaos, ensin opción representativa.
Sinceramente, espero que la refundación d’UNA valga pa qu’esto espollete y que, si AA diz qu’abre los brazos a la negociación, esto llegue a bon puertu pa les próximes autonómiques. O sedrá tirar el votu a otra vuelta?
Julio 6th, 2009 at 12:52
La xuntanza tien de dir d’abaxo p’arriba y non al revés. Lo primero que tien d’haber ye una xuntanza ente los que queremos trabayar por Asturies, una xuntanza d’aición, ente los militantes y afiliaos de los partíos y tou aquel que tea averáu al proyeutu asturianista o nacionalista. Llueu los cabezaleros de los partíos verán que diendo toos xuntos podremos algamar daqué. Pero lo primero ye la xunción na cai.
Julio 9th, 2009 at 10:48
Non Pelayu nun lo dicía por tí, pero ye bien frustrante ver que con tol esfuerciu que se punxo enriba la mesa, quede xente qu’enta nun vea que la xuntanza, la que se podía facer, ya ta fecha, que se siga dando-y vueltes a les mesmes coses y que nun entren a militar na UNA pa forzar al restu xente d’otros partíos a replantegase les sos estratexes.
Dicía disgustáu que la militancia nos partíos nacionalistes yera de 20 persones, lo que ye falar ensin saber. Solo en Carreño ya hai mas de 20 militantes d’UNA. Por otru llau si se quier influir nos partíos nacionalistes lo meyor ye entrar n’ellos y trabayar dende dientru, dende los conceyos y dende les xuntes nacionales.
Julio 25th, 2009 at 23:44
Toi convencíu que munches de les persones que pasen por estí blog tienen les suficientes “tables” como pa trabayar pola xuntanza de dambes formaciones polítiques.
Pueo decivos que tuve tantu n’AA como na UNA y el panorama nun pue ser más desolador. Lo de les 20 persones por partíu ye un decir, claro ta, pero creo que se refier a les 20 persones qu’hai actives por partíu. Claro qu’hai más militantes, de xuru, pero activistes nun deben llegar a muncho más.
¿onde tan los cientos d’activistes nacionaliegos qu’hai n’Asturies?
En casa o na poltrona, unes veces por corrompese y otres por tar alloriáu de que “cuatru ideologos de chigre” (más bien cuatru por cada partíu) camenten que lo que tan faciendo ellos ye lo meyor.
Y por ciertu, ya me t’alloriando muncho eso de que la UNA representa la xuntanza del nacionalismu d’izquierdes asturianu. D’eso ya falamos otru día.
El futuru pasa pol fortalecimientu de los conceyos a comuña ente los nacionalistes d’izquierda. La Xunta Xeneral agora mesmu ta mui lloñe, salvo con esperimentos con “gaseosa” (exemp.XXSanchez Vicente y asemeyaos) que ya se sabe como fina too (ex. Coalición Asturiana).
Crear movimientu y trabayar nos conceyos p’algamar conceyales nacionaliegos, ye’l futuru a curtíu plazu en viendo les executives de dambos partios.
Agosto 30th, 2009 at 21:28
Guapu filandón. Yá veo yo que lo de la Xuntanza nun ye cosa de dos, nin de cuatro. Trabayemos nos conceyos. Tengamos un llema a comuña nos actos (por desgracia dixebraos) del 8 de setiembre: ASTURIES YE NACIÓN NON PRINCIPÁU D´UN BORBÓN. Sofitemos al Ensame pola República Asturiana y otres iniciatives asina. Si nun hai xuntanza perriba, va habela per abaxo.