Xicu Ariza
Ya pasó’l 7 de xunu y la resaca eleutoral vien mui dura pa toos aquellos que vivimos, pensamos y acuamos naguando por unes polítiques alternatives a les que’l circu mediáticu y la clase política mos quieren vender día sí y día tamién.
La finada campaña eleutoral bien pudo ser n’Asturies el guión d’una traxicomedia onde nun faltó de ná y sobraron demasiaes coses. Quiciabes nesti país préstanos abondo “La vida de Bryan” con eso del Frente Popular de Judea y el Frente Judaíco Popular, pero les comedies meyor dexales nel cine porque mos vienen enriba los thrillers psicolóxicos.
Los resultaos eleutorales fueron l’ensayu xeneral de lo que va llegar: mayor avance de les polítiques conservadores y neolliberales, retrocesu de los drechos de los trabayaores, más homexeneidá nel discursu dominante, desencantu social xeneral pa cola política, negación de les señes d’indentidá de los pueblos…. Toos somos conscientes d’ello; ye hora de dexar de caleyar a cuatro pates pa entamar a dar pasos eficaces que planteen una rempuesta madura al diluviu que mos vien enriba.
Munchos fueron los ciberalderiques plantegaos a lo llargu d’esta campaña sobre una obsesiva xuntanza. Munches les actuaciones qu’echaben per tierra eses reflexones. Pero al marxen del pasáu y mirado al futuru ye necesariu qu’esta resaca eleutoral mos lleve por nuevos caminos estratéxicos y d’actuación.
Partamos de los fechos y de la realidá. El pueblu y la izquierda asturiana nun ye mayoritariamente nacionalista. Poco sumaríen dos sigles si nun esiste una conciencia nacional ente la izquierda y la población. Pero más se podría facer si, adaptándonos a la realidá sociopolítica d’Asturies, sumárase la fuercia d’esi movimientu obreru asturianu combativu y los sos ámbitos d’aición; una izquierda crítica desencantada condenada tamién al “guetu” si nun toma otros caminos estratéxicos.
Siendo reales hai qu’añadir tamién qu’una completa unidá de les diferentes organizaciones que formen la denominada izquierda alternativa asturiana baxo una única sigla ye daqué que nun lo van compartir mayoritariamente nin organizaciones, nin militantes, nin votantes. En mayor o menor medida se tien un apreciu a unes sigles que representen una estratexa y un discursu políticu trabayáu durante años.
Entos ¿Qué plantegar?
Si bien ye ciertu qu’esisten diferentes proyeutos políticos, tamién ye verdá qu’una serie de persones y sigles vienen compartiendo dende años atrás abondos espacios n’estremaes actividaes polítiques y sociales. Nestes movilizaciones nun solo coinciden organizaciones polítiques, sinon que converxen tamién movimientos sociales de toa triba: sindical, de mocedá, antirrepresivu, vecinal, antirracista, de reivindicación llingüística…
Milenta personalidaes y coleutivos vienen compartiendo espacios que reivindiquen unos mínimos asumidos pola mayor parte de la izquierda alternativa asturiana: denuncia del desmantelamientu y la emigración asturiana, construcción d’una sociedá más xusta e igualitaria col protagonismu de los trabayaores, defensa de la llingua e identidá asturiana, la democracia participativa, la soberanía de los pueblos, la igualdá ente sexos…
Los citaos son dalgunos exemplos d’una llarga llista de causes qu’axunten. Causes reivindicaes con mayor o menor protagonismu y con unes u otres estratexes, pero a la fin toos ellos puntos ideolóxicos compartidos polos diferentes ámbitos y que xeneren puntos d’alcuentru na so defensa.
Y digo yo… si más o menos podemos tar xuntos nuna manifestación, si tamos fartucos de que mos mexen dende enrriba, si creemos firmemente nunos ideales xustos pero que por falta de coordinación y errores estratéxicos nun lleguen a calar socialmente a niveles más amplios nin algamen representación institucional… ¿Por qué nun converxer toos nunes candidatures eleutorales en base a unos mínimos comunes?
Unes candidatures que garanticen la independencia e identidá propia de los proyeutos particulares de cada una de les sigles que la formen; qu’axunten a partíos políticos, movimientos sociales y xente a nivel individual en base a unos principios asumibles por toos y que nun causen exclusión ente les diferentes sensibilidaes de la izquierda.
En definitiva: unes candidatures d’unidá popular con una estratexa práutica y eficaz que despierte la ilusión y la confianza ente toles persones con ciertes aspiraciones sociales y polítiques en común, que nun signifiquen la desaparición de les ya existentes y estremaes sigles y coles que facer un trabayu responsable y diariu saliendo del “guetu”.
Propuestes constructives
La propuesta ta nel aire; la estratexa de creación y actuación a desendolcar. Ente les organizaciones relaciones de igual a igual, respetu y entendimiento mutuu pol bien común. De cara a la población asturiana conectar con ella a bas d’un trabayu constante y diariu de base: dende’l barriu, dende la cai, dende los conceyos.
Crear conciencia, sumar fuercies y xenerar confianza e ilusión na población. Tomar contautu cola xente con propuestes reales en base a los principios ideolóxicos comunes y llegar a unes instituciones que pueden non ser el fin p’algamar les nueses aspiraciones, pero sí un importante mediu por conquistar pa poder trabayar y construir alternatives.
Queden dos años de trabayu pa materializar esta propuesta. De la voluntá de les persones que formen les colectividaes y d’una actuación responsable en comuña depende demostrar que los enfrentamientos ente compañeros tan bien pal patiu del colexu, pero qu’asina políticamente el camín ye más duru, esclusivu y frustrante.
Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.
Entamemos un periodu de reflexón y alderique, planteguemos alternatives, construyámosles y trabayemos pa qu’un día se faigan realidá.
Xicu Ariza Fernández (Xixón, 1989)
Criáu nel barriu d’El Natahoyo anguañu ta emigráu a Leioa (Bizkaia) onde fae estudios de Periodismu na UPV-EHU.
Militante de diferentes organizaciones y movimientos sociales dende temprana mocedá ye tamién coordinador del mediu de comunicación musical FNAST.NET y músicu del grupu Falanoncaduca.
38 respuestes a “Entamar l’alderique, construir alternatives”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Junio 13th, 2009 at 10:27
XICU, ente munches otres coses, comparto especialmente ésta:
“Y digo yo… si más o menos podemos tar xuntos nuna manifestación, si tamos fartucos de que mos mexen dende enrriba, si creemos firmemente nunos ideales xustos pero que por falta de coordinación y errores estratéxicos nun lleguen a calar socialmente a niveles más amplios nin algamen representación institucional… ¿Por qué nun converxer toos nunes candidatures eleutorales en base a unos mínimos comunes?”.
Va na mesma llínea que la del XANU´L CABORNIU apocayá. Un mínimu de puntos nuna mesma candidatura ensin arrenunciar a les siegles -que dellos paecen amar tanto. Propongo apautar que les primeres persones de la candidatura sían nomes non comprometíos coles sigles agora en griesca, que sían persones residentes n´Asturies comprometíes col sindicatu, la cultura, la reivindicación llingüística, ecoloxismu, etc., pero NEUTRES en cuantes a la militancia política estrictamente, pa evitar les rocees.
Junio 13th, 2009 at 10:39
Esti artículu firmábalu ENSEMBRE yo puntu tres puntu. Destaco tamién esto:
“La propuesta ta nel aire; la estratexa de creación y actuación a desendolcar. Ente les organizaciones relaciones de igual a igual, respetu y entendimiento mutuu pol bien común. De cara a la población asturiana conectar con ella a bas d’un trabayu constante y diariu de base: dende’l barriu, dende la cai, dende los conceyos.”
Ente los alcuerdos de mínimos creo que yera necesario incluyir una especie de “Manual d´estilu” onde quedaren proscrites les actitúes obstruccionistes, sectaries. Un acuerdu nel que se faiga un llamáu a les publicaciones, webs, comunicaos orgánicos, etc. a nun asoleyar información negativa de los collacios nesta xuntanza, col envís d´aparar el descreitu constante ente los votantes y simpatizantes. Apautar una riegles del xuegu onde queden bien claro qu´esti ye d´´ esta llínea del frente y l´otru ta ENFRENTE. Tamién ye pernecesario abrise a la ESQUIERDA NON OFICIAL que, si nun ye nacionalista, sí ta esmolgada dafechu por Asturies, y ye Asturiana y comparte non pocos plantegamientos. por exemplu, en pallabres de XICU:
“Nestes movilizaciones nun solo coinciden organizaciones polítiques, sinon que converxen tamién movimientos sociales de toa triba: sindical, de mocedá, antirrepresivu, vecinal, antirracista, de reivindicación llingüística….
Milenta personalidaes y coleutivos vienen compartiendo espacios que reivindiquen unos mínimos asumidos pola mayor parte de la izquierda alternativa asturiana: denuncia del desmantelamientu y la emigración asturiana, construcción d’una sociedá más xusta e igualitaria col protagonismu de los trabayaores, defensa de la llingua e identidá asturiana, la democracia participativa, la soberanía de los pueblos, la igualdá ente sexos….”
Teníemos que diferenciar, como diximos nel Editorial últimu, a) Xuntanza (en plan Candidatura) d´UNA ESQUIERDA DAFECHU ASTURIANA, b) d´una XUNTANZA pola llingua y la identidá (cola xente del PAS y parte d´IU-Bloque). Son coses diferentes, n´escenarios diferentes. Dambes se puen dar, pero la segunda nun m´abulta de tipu electoral, pos hai torgues ideolóxiques.
Junio 13th, 2009 at 19:36
La identidá nacional d’Asturies tien los díis cuntaos y les organizaciones nacionalistes asturianes (o que polo menos así se dicen) engarriaes ente elles y si nun cuerren bonos tiempos p’Asturies anguaño, meyor nun falar de cuando tengamos que tragar na Xunta Xeneral amás de los Fernández, Lastras de turnu a los nacionalistes españoles de Díez…
Hasta que tolos patriotes asturianos que tamos por caltener la nuesa identidá milenaria como Pueblu y pol drechu d’esti a dotase d’un Estáu dientro la Europa de los Pueblos nun entremos nuna única organización nacionalista nun hai nada que facer.
El nuesu día va llegar, si facemos porque llegue.
PUXA ASTURIES LLIBRE
Junio 13th, 2009 at 20:04
Xixu Ariza diz coses bien interesantes. Y camiento que lo que diz ye un secretu a voces.
Junio 13th, 2009 at 20:06
Carlos comparto lo que dices d’esa especie de “manual d’estilu”. Cola valentía y comodidá que da sentase a despotricar dende l’anonimatu frenti a un ordenador nestos ciberalderiques les descalificaciones lleguen a llímites insostenibles.
Estos ciberalderiques aparte de contener nuna parte significativa reflexones polítiques dignes del parvulariu, entren principalmente en insultos y actitudes basaes na destrucción en vez de na construcción. Curioso ye como los medios de comunicación tienen más visites y la xente participa más nos “ciberalderiques” cuanta más griesca hai, ensin embargu pa coles reflexones constructives l’alderique ye muncho menor…
Va ser qu’a la fin presta muncho esi morbu que tanto se critica nos programes de televisión.
Respecto a esto señalar tamién que non solo daña les posibilidaes de construir, sinon que fae un gran dañu a medios de comunicación pa cola so imaxen… poner l’exemplu y manifestar el mi sofitu a los collacios de glayiu.org qu’a lo llargu d’esta campaña eleutoral pasada non había más que comentarios descalificadotes nun mediu de comunicación que nun pretende ser un foru de debate.
Respeutu a les persones neutres. Ta bien, sobre too persones que coneuten cola población de los conceyos y que tengan les capacidaes pa desendolcar esta xera con responsabilidá.
Añadir que quiciabes el tonu qu’usé nesti artículu foi demasiau en clave eleutoral. Lo de les hipotétiques candidatures unitaries ye una propuesta, pero una propuesta que solo sedría eficaz y con resultaos si d’equí a dos años hai un trabayu constante de base: si se participa nos movimientos sociales, nes movilizaciones, si apaecemos d’una manera constante y responsable nos medios de comunicación, si conectamos cola xente de la cai…
Por muncha “xuntanza” eleutoral que se plantee esta nun va sumar na ensin esi trabayu previu. Ensin dexar de ser “bichos raros” ante la sociedá asturiana.
Por supuestu nesti sen importante destacar que a nivel organizativu los principios ideolóxicos nun se deberíen rebaxar, pero sí ye importante adaptarlos a la realidá de la población mayoritaria. Paezme perbien qu’unes sigles defiendan la Independencia y el Socialismu, qu’otras los principios del marxismu-leninismu, qu’otras la desparición del estáu y l’autonomía obrera… pero esti mensaxe hai que tresmitilu a la población d’una manera non tan explícita si queremos tomar contautu con ella.
Y otru apunte. Perimportante la llabor de los movimientos sociales y de la xente qu’anguañu alcuéntrase desvinculada a sigles d’organizaciones polítiques o que nun tienen vinculación direuta con algún movimientu social. Dientru de los partíos políticos fae falta muncha autocrítica y reflexones internes.
Na más. Bono, respeutu al comentariu del “patriota asturianu” ye la so opinión que pa mi ta ayena a la realidá asturiana. Lleendo’l mi artículu y esta cabera reflexón o la de los comentarios d’infoasturies ya se sabe por qué.
Un saludu. Esperemos que toes estes reflexones nun queden en ciberalderiques y entamemos a llanzar propuestes pa salir a la cai, p’aconceyase n’asamblees y pa pasar de la teoría a la práutica.
Junio 13th, 2009 at 21:48
Yo apunto otra cousa que ía que muncha xente que ta nos partíos nacionalistes asturianos nun valen, al igual que munchos que valdríen, o tuvieron (David Rivas en AA), o nun quieren tar (Xosé Lluis García Arias) ente otros.
A mín petariame una xuntura perriba de ideoloxíes, de mínimos estilu Nafarroa-Bai, que abarcare dende centru-drecha fasta esquierda nacionaliega.
Junio 13th, 2009 at 23:07
Yo tamién toi con XICU en que la xuntanza electoral ye un resultáu final darréu d´un procesu de trabayu d´años, un trabayu d´unidá popular codu a codu. Si un nacionalista asturianu trabaya bien nel so conceyu o barriu, un asturianu del PCPE, o antifacista, o ecoloxista o lo que sía, acaba contaxiándose tamién de que ta na mesma llucha por una mesmu pueblu. La xuntanza electoral va haber que la facer, de xuru, pero enantes hai que dir colos brazos abiertos y con ganes de trabayar localmente. Y recalco que los insultos, les engarradielles, el radicalismu verbal (que non el radicalismu ideolóxicu en serio, pos hai coses nes qu´hai que ser radical), son torgues mui grandes pa llegar al pueblu.
Junio 14th, 2009 at 15:07
Pente la xente que tuvo o qu’anda na rodolada y que tien valor pal nacionalismu hai d’estremar. García Arias, con tol respetu que hai que tene-y siempres fue de los que nun queríen comer la pera nin qu’otru la comiera. Esperó siempre pa que fuéramos a so casa a glayá-y “caudiellu, encabezanos”. Rivas, en cambio, apostó políticamente Equivocóse, o salio-y mal, o nun fue capaz, nun sé. Pero nun los comparemos. Yo con Rivas diría a munchos sitios. Con Arias namás que a un cursu de filoloxía.
Junio 14th, 2009 at 20:52
Compañeros, con respeutu a lo que se fala d´unidá d´aición ente les dos organizaciones de la izquierda nacionalista y más organizaciones sociales, reitero y dempués de les eleciones munchu más, que nun me parez la forma correutu d´afitar una organizacio referencial o un proyeutu común o de les dos organizaciones. parezme evidente que si se xunten les dos organizaciones solo sumarán los votos que tienen ambes y eso ye simplemente una mierdina.
El problema ye más grande creo, el problema creo que pasa por camudar el discurdu que izquierda nacionaliega vien proyeutando , que ensín nenguna dubia nun conecta col pueblo asturianu. Si se xunten UNA yAA y siguen proyeutando la mesma imaxen y discursu que durante estos últimos 20 años , el resultau sedrá otra vegada incapaci´da pa conectar y más fracasu electoral.
la reflexón tien que ser más profunda , tendremos que pensar primero en el mensaxe qu´unviar ,l´oxetivu cimeru a algamar y replantease estratexes. Nun val de nada siguir nel mesmu mensaxe pero toos xuntos.
Les organizaciones tienen que replantease la estratexa que se siguió porque nun dió resultaos.Asina que primero esamen de concencia y propósitu d´enmienda. Sinón más de lo mesmo
Junio 14th, 2009 at 22:39
Unitariu: esti artículu de Xicu Ariza da delles claves: nun solo una xuntanza electoral, sinón una unidá cívica o Frente asturianu col que se pueda salir del guetu. Una xuntanza no llocal, nel trabayu concretu qu´empobine a una Esquierda Dafechu Asturiana. Los coleutivos d´esquierda “real” n´Asturies, tamién tienen que sabe que nun van a llegar a nada ensin esta xuntanza. Ellos tan viendo que´l discursu nacionaliegu nun llega a los problemas de la xente corriente, trabayadora. Nun se pue tar falando de los “drechos llingüísticos” namás to santu día. Pero tampocu tien xacíu querer ser independentista enantes de qu´haiga una mayoría social nacionalista. Cien independentistes nun van facer Nación. Pa facer nación hai que pasar per un llargu camín de conciención y trabayu político-social y eso correspuende-y al Frente a la Xuntanza.
Junio 15th, 2009 at 10:22
Pues a mi faime gracia l’argumentación d’Unitariu. Amuesa nun entender prácticamente nada de lo que diz Xicu, que comparto al cien por cien. Al meyor esi ye’l problema, la carencia de cuadros nos partíos de la izquierda nacionalista. A ver si va resultar que’l problema nun ye’l nacionalismu, sinon los nacionalistes.
Una y otra vuelta sentimos falar d’elecciones, de votos, de referentes. ¿De ónde salen los votos, más que d’una bas social? ¿De qué tamañu ye esa bas social? ¿Cómo se fai pa enanchar los apoyos? Ye más: ¿ónde tá’l discutiniu sobre’l papel de les elecciones na acción política? ¿Ye la presencia nes instituciones lo determinante na correllación de fuercies? En tou casu nótase que Xicu vive nel País Vascu, nel sen de que, con tolos problemes específicos que se quiera, hai otra realidá política, otres dinámiques que dende Asturies nun ye que nun se comprendan, ye que se desconoz siquiera qu’esistan. Unos nun ven más que la cáscara y treslladen cuatro consignes, como si l’efectu fuere a producir la causa. Y otros demasiao lights y centraos cuasi esclusivamente na llingua, como percibe correctamente Carlos.
En fin, qué pena de país.
Junio 16th, 2009 at 12:18
Tolos que andamos metíos en temes asturianistes, una vez que mos salimos del nuesu círculu de collacios, notamos qu´esiste una total inorancia na población astur no referente a movimientos asturianistes y nacionaliegos. Nes Cuenques Mineres, territoriu tan politizau, esiste dafechu un rechazu a tolo que güela a asturianismu. El Partíu Únicu que gobierna estes tierres encárgase dello. Ca vegada hai más sensibilidá pola llingua y la cultura y el Partíu, sabedor dello, reparte migayines pa contentamos. La xente la cai, si se-y comenta daqué sobre nacionalismu, lo primero que te retruca ye que les cais tan en bable, dase na escuela y óise munches gaites y tonada ¿ qué más quereis los nacionalistes?.
Ta claro que el pueblu ta totalmente oriellau de cualquier información nacionalista, salvo los cartelos qu´amuesen delles vegaes peles cais del pueblu, munchos dellos con slóganes e informaciones abondo “radicales” pal ciudadanu corriente. El ciudadanu mediu equipara el nacionalismu astur a HB o ANV.
Poco salimos na prensa y cuando se sal ye por una dixebra ( una más), contautos “sospechosos” con otros partíos nacionalistes “abertzales”, o cuando poníen bombes n´Asturies los de la ETA gracies al “entramáu terrorista” del nacionalismu astur, o la quema de llocales del PP y PSOE.
Too esto paez de película, pero ye real.
Asina, lo que ta claro ye que inda hai que trabayar muncho pa quitamos esa costrona, dir pasu ente pasu dexando de llau, de momentu, los radicalismos y presenta-y al pueblu un proyectu real, de cai y creíble.
Paez mentira, pero qué fácil pue ser desabolar a los partíos mayoritarios:
1-Nos conceyos podemos mancalos bien. A los nacionalistes sólo mos ven cuando hai que lluchar pola llingua o la cultura astur; nun mos ven como defensores de los intereses más mundanos del pueblu y ehí ye onde tenemos qu´entamar a metemos.
Toos sabemos del apegu a la poltrona de los alcaldes, hasta qu´el partíu ys-dá otra poltrona más golosa n´Uvieu, lo que fai que los alcaldes escaezan les coses más sencilles: limpieza, seguridá, recoyía selectiba de basura, enerxíes alternatives, mancomunidá de conceyos…
2- Nel casu de la Cuenca del Nalón, por exemplu, tién dellos campos pa la griesca. El más importante ye la llucha pol conceyu únicu, que bien orquestada pue ser un bon campu pal nacionalismu: pasar de 5 apoltronaos a ún solu, menos conceyales chupones, unificación de servicios básicos (llimpieza, basura, policia de conceyu…); unificación de proyectos (metro-tren con vial desdoblau con una sola compañía de ferrocarriles; carriles-bici bien diseñaos en tol valle que los d´anguañu dan pena; enerxíes renobables; xestión del agua: que sal muncho de les mines; mantenimientu del patrimoniu que los socialistes creen qu´esto ye solo restaurar castilletes y bocamines, mandando a pimiangu cases solarieges, antígues escueles y teatros con identidá propia.
Munches coses podemos facer, pero lo primero ye averase al pueblu con proyectos claros y, por supuestu, con un proyectu de xunión política seriu y creíble.
Junio 16th, 2009 at 12:25
Velasco, ¡qué interesante! Podía ser un artículu´l to comentariu, por estensión y calidá. Ye cierto. Hai que ganar visibilidá nes lluches que más lleguen al pueblu, y d´ehí, per conceyos y comarques, dir caltriando.
Junio 18th, 2009 at 12:23
Gracies Carlos X. La verdá ye qu´esti tema tién cuerda abondo. Tamos tan osesionaos por algamar represntación na Xunta qu´escaecemos qu´hai qu´entamar pel suelu y non pel teyau. D´otra miente, creo que ye más fácil algamar un consensu ente distintes fuercies polítiques nacionaliegues na estaya llocal que na nacional (conocémosmos tous), solo nel valle del Nalón ya operen les 4 formaciones más importantes (AA, UNA, PAS,BA, incluso URAS). Toes xuníes puen algamar bonos resultaos. Créolo asina.
Junio 18th, 2009 at 17:20
Si hai dalguién d’AA trabayando na cuenca, solo pue ser por dos coses:
- O nun saben con quién van a la mar.
- O tan en contra de cualquier posibilidá de xuntanza que nun seya la d’axuntase dientru d’AA.
Per otru llau, cola poca xente que queda militando nel PAS nun me paez que se puea tratar porque tamién creen ciegamente nel so llider espiritual, lo único ye averar a la xente desencatada d’esti partíu.
Pa finar la xente del BA tan bien comodos de momentu n’IU, dalgo bien gordo tien que pasar(mira que ya pasaron coses), pa que salgan d’ehí.
Pa min tamién son verdá munches de les coses que cunta Velasco, y de momentu esto sólo se bien faciendo dende Carreño col conceyal d’UNA. Ensin renunciar a la so ideoloxía y a la del partíu que representa, el so trabayu ta enfotau en meyorar la vida de la xente del conceyu.
Dientru de l’antigua AA el conceyu Carreño yera una islla encuantes a la manera de trabayar y a la estratexa a siguir. Por eso algamaron representación y por eso siempre dende fai cuatro llexislatures nun paren de subir votos.
Agora vete a falai a la xente de autodetermín, a ver con que cara te miren.
Junio 20th, 2009 at 13:38
Pataroxa, nótase que yes de la UNA (y eso ta bien) pero nun me parez normal dicir eso del PAS, y del BA. Con esos argumentos tamién daquien podría falar asina de la UNA. Y entós taríamos col “purismu” y ensin salir del nuesu “guetu”, onde parez que dellos s’alcuentren perbien.
La Xuntanza BA-PAS-UNA o PAS-UNA veola posible.
Un saludu candial nacionaliegu.
Junio 20th, 2009 at 20:20
Yo nun digo que nun quiera esa xuntanza (Pas, BA) sinon que paezme imposible n’estos momentos polo que dixe enantes.
El Pas ta desfechu organizativamente, solo esiste XX, y amás ta en coalición cola URAS, esto ye, UAS. Nun hai nada que rascar mas que la xente que milita o militó y quiera siguir trabayando por esti Pais.
Del BA sinceramente nun conozo a fondo cual pue ser la so postura, pero nun dan la impresión de tar mui disconformes nin malagustu dientru d’IU, a pesar de los caberos pasos atras d’esta organización en materia identitaria.
Sí soi d’UNA y enantes taba n’Andecha por eso a estos últimos descartolos por impresentables y por irrepresentables porque nun se representen namás que a ellos mesmos.
Tamién te digo que la UNA ta lloñe de ser perfeuta, pero el trabayu que fai nun va na llinia de ser los mas puristes, ye más, somos coscientes qu’hai que salir del guetu p’algamar dalgo y pa poder trabayar de verdá por Asturies, ensin poses masimalistes que nun lleven a dengún llau.
Pa esto precisamente ñaz la UNA.
Salú.
Junio 21st, 2009 at 19:49
A mi hai coses que me paecen un poco pillaes pelos pelos…Arguméntase, y paezme que mui bien, qu’hai que salir del guetu…
¿Y pa salir del guetu garráis el nome d’una opción fracasada y que se diz “nacionalista” nel nome, col rechazu que tien esi términu n’Asturies y na xente con concencia social?
Si queremos salir del guetu hai que consiguir que la izquierda n’Asturies seya asturiana y coherente coles reivindicaciones nacionales, non “nacionalista” y “verde”.
Junio 21st, 2009 at 21:16
Nun sé tovía qué tien de malo, Tortu, el vocablu “nacionalista”. Ser nacionalista ye lo más ñoble: defender la to NACIÓN. Hebo nacionalismos retrógrados y fasta asesinos (háilos). Pero tamién hai nacionalismos lliberadores y exemplares pala humanidá entera.
Junio 21st, 2009 at 23:21
Ye falso eso que tais diciendo. Pa defender a Asturies nun hai por qué ser nacionalista. Yo defínome como soberanista o independentista, o namás qu’asturianu. Y amás soi fondamente internacionalista.
Nacionalista ye UPyD, el PSOE o PP.
Lo chocante de too esto ye que toos paez q tenemos claro qu’esto hai que refacelo dende la óptica d’izquierda, dende la xuntura d’eses espresiones de la izquierda asturiana, y aneciamos n’usar nomes que namás valen pa competir con Andecha Astur (sic), encima.
A quienes tenemos que proponer una alternativa na sociedá ye a IX, consiguir que la xente a la esquierda del PSOE, los paisanos de los pueblos que nun quieren ver llinies d’alta tensión nos praos, los qu’echen de les empreses, los funcionarios etc. tengan a un partíu/movimientu qu’acueya tamién lo asturiano (identitario, cultural) con normalidá, como faen n’otros sitios, como referente.
Mentres los proyeutos que se fagan seyan esclusivamente pa ver quién ye’l mandamás de la “miniburbuya” siguiremos igual.
Con tola tristeza del mundu, pero tamién con sinceridá, pa una xente que tien bona intención pero nulu aciertu…lo de la UNA como nome ye un actu fallíu que nos fai perder otros 8 años.
Junio 21st, 2009 at 23:37
Pero, Tortu, dale que dale con que “nacionalismu” ye una cosa espantible” (como espantibles son UPyD, PP y PSOE). Ye qu´ellos son Nacionalistes Españoles y parten d´una nación inventada nel sieglu XIX que YÁ CUENTA COL APARATU DEL ESTÁU pa defendese, inda col usu de la fuercia. Pero Tortu: el nacionalismu d´una Nación esin Estáu ye SOBERANISMU. ¿Cómo quies ser independentista ensin ser nacionalista antes? Más tovía: ¿Cómo lo quies ser, independentista, ensin que´l nacionalismu ástur dexe de ser minoritariu? Por Dios, qu´esto me paez poner el carru delantre los gües. A munchos asturianos se-yos metió na cabeza la idea de que “vascos y catalanes son nacionalistes”, pero los españoles non. Y claro, con tol emburrie de la prensa española y los mass media, el nacionalismu non español ta criminalizao a priori. Pero ¿cuándo se vio que ser nacionalsita d´una pequeña y primía nación ensin estáu tenga que tar mal visto? ¿Pero qué pecáu cometimos?
Junio 22nd, 2009 at 0:28
Pos por eso mesmo, Carlos. Tas dándome la razón. ¿Que’l términu “nacionalista” ye un términu engocháu pol españolismu? Pos estupendo, una razón más pa dicir qu’UNA ye un mal nome.
La mio refuga al términu nacionalista pasa por que l’orixe del conceptu políticu ye dafechamente opuesto a lo que cualquier persona mínimamente d’izquierda debe defender. Y tien más que ver col xovinismu y col españolismu de lo que paez que nos quier entrar na cabeza. Nun fai falta dicise “nacionalista” pa dicir qu’Asturies ye una nación, querer que decida en llibertá o defender la cultura y la identidá asturiana. Eso, enantes de nada, ye ser “demócrata” (otra palabra engochada pola transición).
¿Dexamos les etiquetes de llau d’una vegada? Paez que namás xugamos con eslóganes vacios de conteníu que valgan namás pal autoconsumu, que naide más pescancia, del tipu “defender el calter nacional d’Asturies”.
Planteguemos planes d’aición a nivel conceyos, comarques y a les eleiciones nacionales. Un modelu d’Asturies, qué tipu d’economía, qué papel tien que xugar el sector servicios, qué tipu de turismu, qué tien que pasar col modelu productivu rural y l’industrial, qué modelu enerxéticu, qué modelu de sanidá, educación y servicios públicos, qué modelu de participación democrática…y dexémonos d’infantilismos.
Si lo que queremos ye que daquién entame a ver que los “nacionalistes”/”independentistes”/”soberanistes”/”asturianistes” d’izquierda queremos facer dalgo más que “sacar más que’l d’al llau”, pa cha-y en cara que “somos el referente”.
La independencia d’Asturies y el cambiu de modelu social fáense dando soluciones asturianes a los problemes que xenera por definición el neolliberalismu y el reinu d’españa. Tolo demás…divertimentos pa enredar y perder dalguna perra.
Junio 22nd, 2009 at 1:25
Home, Tortu, fuera de prexuicios o sobrentendíos, paezme un error lo que dices de “Nun fai falta dicise “nacionalista” pa dicir qu’Asturies ye una nación”. Dende’l mio entender, dicir qu’Asturies ye nación y nun considerase nacionalista ye un sinsentíu, una contradicción.
Polo demás, claro que fai falta trabayu y averase a los problemes reales de la xente.
Junio 22nd, 2009 at 9:42
Nacionalista ye aquel que defiende´l conceutu de Nación; N´Asturies, el que defienda la identidá astur pue ser Asturianista anque nun tién porqué ser nacionalista; y pa meter otru nomatu na grieca ¿qué ye un Rexonalista?.
¿UNA? pues igual que PNV (por introducir el nome Nacionalista, caro); agora que igual preferíis poner Rexonalista (como los de Cantabria, polo menos tan gobernando…al so mou).
Referente al Internacionalismu vs Nacionalismu, remítovos a un escritor Checu de prineros del XX, Jaroslav Hasek ( o daqué asina que nun sé checu) y la so obra cume ” Les aventures del bon soldau Sveck”. Jaroslav yera un nacionalista checu que tuvo prisioneru de los rusos na 1er Guerra Mundial; empapizose de ideoloxía bolxevique y tornó pa Chequia colos ideales comunistes y ensin escaecer los sos ideales nacionalistes. Y otru casu, Lenin: fexo les Repúbliques Socialistes,ente otres munches coses, pa repetar les identidaes de ca una d´elles.
No referente a IX, creo que finará comu el CDS, dixebrada en partíos autonómicos col faru del PCA allumando pa un llau y el restu pa otru. Y mira que nun ye malsonante nin ná ser Comunista anguañu…
Lo que ta claro ye que dientro d´unos años, Asturies va necesitar un referente a la esquierda ( mira-y el BNG, nun hai IX en Galicia, nel parllamentu).
Y pa finar, Nacionalista nun tién porqué ser Independentista.
Junio 22nd, 2009 at 11:00
Ricardo y Velasco: apurrís bones precisiones. Ye un sinsentíu decir qu´Asturies ye nación, y más tovía, nación primía, y nun querer ser nacionalista. Tamién ye cierto qu´hai nacionalismu non independentista y nacionalismu que sí ye independentista. Na mio opinión, ye llexítima una postura tantu como la otra, anque pienso que´l nacionalismu más consecuente ye´l soberanista. Ye dicir: que si defendemos qu´una Nación essin estáu ta siendo primía, y nun s´atopa a gustu nun marcu (con)federal afayadizu, como sedría el d´un Estáu Español reformáu nel futuru, ye llóxico esixir la DEVOLUCIÓN (nel casu asturianu) de la Soberanía Plena. Creo que con estes aclaraciones dexo nidia la estremancia conceptual que necesitamos nel país pa poder falar de XUNTANZA. En tou casu estes distinciones (que considero de sentíu común) nun tienen que valir pa facer sectes y nueves dixebres. Tienen que sirvir realmente p´algamar distintes especies de xuntances: (1) una xuntanza orgánica y electoral sólo pue facese ente los más afines, como AA u UNA, y eventualmente BPA si éstos abandonaren IU y entonaren un “mea culpa” (cosa ésta que pe paez ciencia-ficción anguaño). (2) Un pautu “de caballeros” y una unidá d´aición (non electoral nin orgánica) colos “asturianistes” (PAS, fundamentalmente) llendada al tema llingüístico y a la definición estaturia d´Asturies como nación, en vista de que los programas económicos y sociales el nacionalismu (esquierda) y el asturianismu (centru) son diferentes. Creo que si compartimos esti doble nivel de Xuntanza, ensin facer mecigayes, podemos apurrir un debate curiosu na sociedá. Ye más “gorda” la xuntanza númberu 1, la de los nacionalistes d´izquierda. Sólo con esta veo posible la “xunidá d´aición” colos asturianistes, sabiendo qu´éstos nun se puen considerar nacionalistes (quiciás individualmente haiga dalgún)
Trabayar nos conceyos. Emprimar les xuntances partiendo d´abaxo, más que d´arriba. Esa ye otra idega que ta apruciendo.
Junio 22nd, 2009 at 11:16
Yo toi más na opinión de Tortu, pero por motivos eleutorales.
Sintiéndome fondamente nacionaliegu, tamién camiento qu’esti términu na sigla “criminaliza” al partíu que lu tenga. Y la razón yá se dio: ta emporcada pol nacionalismu español, que ye l’únicu bien vistu.
Pa mi el tema resúmese nesta entruga: al votante que desea una alternancia al pp y psoe, tragaría con un partíu nacionalista astur? Yo creo que non. Si fuera “rexonalista” (malditu pallabru) creo que sí. La preba foi CA que dio resultáu, gracies a la xuntura del nacionalismu d’UNA col rexonalismu del PAS.
Junio 22nd, 2009 at 11:22
Como añadidura:
Lo que sí veo bien ye que, na xuntanza que diz Carlos X. Blanco de tolos que trabayamos por Asturies y respetando escrupulosamente unos mínimos, puean esistir estremaes corrientes internes, como ocurre nel pp y psoe. Llévense a matar, pero nun marchen del partíu.
Baxo’l mio puntu de vista, eso ye lo que nos daría’l poder.
Una sigla de marcáu calter asturianista, pero non claramente nacionalista. Y dientro d’ella, tol mecigayu de xente que trabaya pel nuesu país, con unos mínimos inquebrantables ya intocables.
Junio 22nd, 2009 at 12:03
Debo tar desplicándome mui mal. Hai otros conceptos estremaos al que yo entiendo por “nacionalismu” dende los cuales se puede defender qu’Asturies ye una nación. En primer llugar, dende una definición de lo que ye una nación, hai milenta autores y corrientes en tol sieglu XX qu’apurren argumentos a esgaya pa concluyir qu’esti país ye una nación.
El nacionalismu tien un orixe na so definición de componente fondamente interclasista, qu’antepón lo “nacional” a lo “social” y fai una esaltación de lo propio frente a lo “de fuera”. Esto llámase tamién xovinismu. Ye verdá qu’anguaño, nel sieglu XXI, cásique cualquier persona que diz que l’asturianu tien que ser oficial yá ye un “nacionalista” pa la gran parte de la sociedá, pero hai que sorrayar qu’esi conceptu ye erróneu.
Tamién ye verdá que’l conceptu de nacionalismu abrióse y agora cabe nelli “el ser d’izquierda”, un “nacionalismu internacionalista”, anque en sigo mesmo esto paeza una contradicción. Esto ye frutu de la desvirtuación del conceptu “nacionalista” anguaño, al que s’averaríen muncho más otros del tipu “patriota”, “soberanista”, “independentista” o mesmamente “asturianu” etc. que nun se contradigan pela izquierda.
A lo práutico: exemplos de nacionalismu tenémoslos nel estáu, y tamién n’Asturies. UPyD, PPSOE, DN. Esos son partíos nacionalistes. ¿Camudamos la bandera d’España pola asturina y too iguao?. A mi abúltame la mesma mierda.
Insisto, faigamos nesta nación un movimientu acordies colo que ye Asturies y consecuente colos valores d’izquierda. Más “soberanismu”, “asturianismu”, “patriotismu”, ¡hasta me paez más coherente ser “independentista”! y sobremanera, más ser “asturianos y d’izquierda” y non “nacionalistes”.
Junio 22nd, 2009 at 12:08
La sociedá astur ye la más avieyá d´España. ¿Qué diz esto? pues que la educación de la gran mayoría de la población pasó pela criba la dictadura y anque mos pese, fexo más Franco en 40 años que Roma en 400 por desaniciar lo de nós, hasta´l puntu de que tol que se precie de ser asturianu tién que berrar la babayada de Asturias es España y lo demás…
Paez una fatada, pero manca y muncho, Hasta´l puntu de que cualquier intentu catalán ( por ex.) pa algamar más competencies, ye una ofensa per grave pa esti astur. y ye que son más papistes que´l Papa.
Mira-y lo que nos costó mete-ys na tiesta que l´Asturianu ye una llingua ( munchos lo acepten gracies a que los sos fios y nietos tan deprendiéndolo nes escueles). ¿Como van aceptar qu´Asturies ye una Nación?; a lo más que lleguen ye a denominala País (pol carru y la música ” del país”). Aún siendo ateos defienden a más nun poder a la santina si fai falta.
Ante too esto ye verdá que pa llegar al Astur mediu hai qu´embocase faza´l “Rexonalismu” pa llueu dir enderechándolu seliquino.
El futuru del nacionalismu pasa pola mocedá, pero angüañu ye minoría, y munchos ya tan “fichaos ” polos partíos “oficiales” gracies al llaváu de cerebru que sofrieron los sos pás y güelos.
El asturianu mediu siente muncha rocea pelos cambéos radicales, tién que mazcar y llueu rumiar les novedaes, y eso lleva muncho tiempu pa ellos y pa nós.
Junio 22nd, 2009 at 13:31
Bono, paezme que sigue esistiendo xente qu´escribe n´asturiano y que diz defender la cultura y la identidá d´ASturies como nación y que, pela cueta, tien rocea faza la pallabra “NACIONALISMU”. Fasta tal puntu llega la influencia españolista. Como mui bien diz Velasco, son munchos años de llaváu de cerebru, y los años de franquismu (dende l´Ochobre del 34, pa ser más precisos) foron destructivos pa la nuestra conciencia coleutiva. Yo creo que nun hai que permitir que los españolistes MONOPILICEN el vocablu “NACIONALISMU”, dexando que solo lé spañol sía democráticu, bonu, anxélicu, y que los periféricos sían demoníacos, terroristes, etc. Esi discursu hai que lo frañer. Y hai nacionalistes vascos, gallegos, catalanes, etc. que son solidarios y democráticos a más nun poder. ¿Equí non? Debe ser pola timidez típica de los asturianos. ¡Qué razón tienes Velasco! cuando dices “El asturianu mediu siente muncha rocea pelos cambéos radicales, tién que mazcar y llueu rumiar les novedaes, y eso lleva muncho tiempu pa ellos y pa nós.” Esi ye un reflexu puru de la realidá, yo mesmu véome espeyáu nesa frase en cuantes fui bien d´años un “asturianu mediu”.
En cuantes a la doble estratexa de xuntanza que yo propongo (pa salir un pocu del alderique terminolóxicu)quixera saber si opináis si ye posible. Esa doble xuntanza (orgánica y electoral, partiendo d´abaxo y de los conceyos) a la esquierda, ya interclasista (pal tema de la llingua, que ta ensin resolver) colos asturianistes-rexonalistes, piénsola yo como les dos puntes d´unes tisories que podrían frañer l´españolismu, al menos la so hexemonía esclusiva. La segunda, la interclasista, tien que ser dende la independencia de les formaciones, porque sinón la xuntanza conviértese en mecigaya. Con un “pautu de respeto” recíprocu. Xuníos pa lo esencial.
Junio 22nd, 2009 at 15:59
Esos “nacionalistes vascos y catalanes” de los que fales, Carlos X. nun son nin la Izquierda Abertzale Oficial, nin siquiera Aralar, nin tampoco ERC.
Estos partíos nómense a sigo mesmos “catalanistes” y d’esquierdes o, nel so defectu, “independentistes”, “soberanistes” o “patriotes”, que ye lo que quier dicir “abertzale”.
Los nacionalistes, en Cat y EH son PNV y CiU. Y d’estos nun tamos falando, ¿non?. Amás nestos sitios a los “nacionalistes” llámase-yoslo despectivamente dende organizaciones “tan radicales d’esquierda” como ERC.
Nel casu de GZ tenemos coses similares pero cola diferencia de que la esquerda independentista que tea al marxe del BNG ye mui minoritaria. Con too y con ello, los sectores cada vegada más derechistes del BNG tan mui contentos onde tan y les espresiones más a la esquierda, como Movimento pola Base, yá entamaron a salir del barcu.
Toi d’alcuerdo en parte con Tortu, anque creo qu’hai que matizar qu’anguaño, anque nos digamos “soberanistes” van siguir llamándonos “nacionalistes” porque ye lo que ta na cai. Na mio opinión…el nacionalismu pa los españoles(istes). El nuestru espaciu tien que ser el de la constitución d’una esquierda nacional asturiana. Pa eso cuntái conmigo.
Un saludu
Junio 22nd, 2009 at 20:21
Si nun son d´esquierda (y pocos) nun hai nacionalistes asturianos. Nun esiste nacionalismu de centru o de derecha. N´otros países del Estáu hai un nacionalismu en tol espectru ideolóxico. Aquí ta faciendo munchu dañu el “transversalismu” de ciertu seutor del asturianismu, que´en viendo´l fracasu del PAS-URAS, quieren ver nacionalismu fasta en Pedro de Silva y Manuel Fdez. de la Cera, nun actu de revisionismu históricu que da noxu. Pero bono, Salia, yo toi d´alcuerdu con esta fras de to. ” El nuestru espaciu tien que ser el de la constitución d’una esquierda nacional asturiana.” Distinciones aparte, esa Esquierda Nacional Asturiana ye la que yo pido dende va unos años. Xustamente con eses pallabres. Gracies
Junio 22nd, 2009 at 21:33
Rivas Torna d’una vegada!!. T’estimen.
Junio 23rd, 2009 at 1:03
Yo, concretamente, soi fondamente nacionaliegu, pero sigo creyendo lo mesmo. Si te declares asina a la sociedá, nun ganes más votos que los del ghetu.
Porqué BA nun pue entrar na UNA? nun ye por un tema d’estos precisamente?
Junio 24th, 2009 at 13:51
Non, que yo sepa nun hubo dengún contautu, nun escaezcas que UNA acaba de ñacer. Amás nun me paez qu’el BA vaya movese a curtiu plazu.
Junio 26th, 2009 at 19:14
Tortu, refugues el términu nacionalista, que pue que seya un poco duru pa cierta xente anque hasta el PAS se define asina, y na sociedá del estáu vese como una cosa más o menos normal, pero préstate “soberanismu” y “patriotismu”, que ya me dirás… ¿a qué-y suena eso de patriotismu a la xente n’Asturies?.
Y lo de soberanismu, nun digamos. La xente nun sabe lo que ye, y a los que-yos suene a dáqué van rellacionalo con Otegi mínimo.
Esta opinión con tolos respetos nun representa más qu’a otra de les nueves minicorrientes virtuales de pensamientu na corripa bablera. Frutu d’años de fracasu, búsquense razones y nueves víes que son repeticiones d’otres antigues y dacuando con paternalismu pomposu, qu’escuende un vaciu evidente.
Nun me paez mui de recibu “descubrir” a estes altures que’l términu “nacionalista” contraponse pela izquierda y ye refugable pola xente. Sobre too si lo diz un “soberanista independentista”.
Con esti panorama y como’l papel tolo aguanta va haber xente que proponga otru BIA 10 años depués, pero más friki tovía. Al tiempu.
Lo qu’hai que facer dende’l mio puntu de vista ye menos debates nominalistes y más facer una opción que valga la pena. La esperiencia demuestra que si el proyectu ye bonu el nome ye lo de menos. Hasta en Galicia acabaron votando a una cosa que se llama BNG.
Junio 26th, 2009 at 20:22
Que sí, Farrapa. Si nacionalista suena mal, los otros términos suenen peor entá a della xente. Yo creo que´l de nacionalista ye bien integrador, porque axunta al independista y al que non, al que non pero afita qu´ASturies ye Nación. Y tamién estrémase de lo d´”asturianismu”, que ye una via muerta, muerta porque en morriendo´l PAS, nun queda otro que´l TRANSVERSALISMU (la vía qu´esparde al alto la lleva ciertu selmanariu) y que torga abondo la recuperración nacional.
Pa nun ser “frikis” hai qu´entamar con plataformes locales, ente otres coses.
Junio 27th, 2009 at 9:57
Non, compañeru/a Farrapa. Refugo’l términu “nacionalista” básicamente por cuestiones ideolóxiques y depués por otres de táutica política, sobremanera por estes últimes.
Pos mira, sí, un BIA bien fechu paezme que ye per ónde van los tiros que comentaba Xicu Ariza, de xuro. Xuntar a la xente que ta coincidiendo nes manifestaciones pola oficialidá, pol trabayu, contra l’esfarrape ecolóxicu…nuna opción non escluyente y que consiga crear una izquierda nacional asturiana, ye dicir, xente que tenga una concencia social y qu’al tiempu acueya como propia la custión cultural, llingüística, nacional asturiana.
Eso sí, hai que dexar de llau los nominalismos. Plantiar nomes pa fuerces polítiques d’izquierdes que se paezan más a CiU/PNV qu’a ERC (con tola zuna que-y tengo a esi partíu) paezme un error total. Siguir na burbuxa.
Alcordáivos de que’l día qu’españe IU n’Asturies van montar esa “Izquierda d’Asturies” que yá tienen rexistrada y que, como IAS nun usa, déxen-yos llibre incomprensiblemente. Perehí pasa la nuestra opción, tar mui atentinos/es a eses xugaes del destín pa llevar les prioridaes al centru del debate políticu.
Y por cierto, en Galiza acabaron votando a una cosa que se llama BNG, que tien un partíu xerme que se define, inda güei, como marxista leninista.
Un saludu.