Editorial de “Pola xuntanza”
Yá yera tiempu de que pasaren les elecciones europees, aprovecíamos. Queríamos ver escampláu’l panorama y naguábemos por esclariar los afoguinos propios de les viéspores d’una convocatoria a les urnes. De mano sabíase que los resultaos pal nacionalismu asturianu diben ser malos. ¿Cómo diben ser d’otra miente? El xaréu xudicial qu’hai nesti mundiu nun sirve pa otro que pa desmotivar al pueblu, pa desllexitimizar una opción necesaria, pero que sigue ensin cuayar nel País. O’l pueblu presiona pa que’l nacionalismu asturianu surda d’otros pegoyos, haiga xuntanza, o bien hai qu’esperar que la xusticia esclarie los pleitos y entós siamos quien a construyir sobre una base con tiez y credibilidá, base organizativa qu’anguaño nun hai o que ta esborriada nuna llucha que los asturianos votantes, o militantes, nun somos a pescanciar.
El motivu d’esta Editorial nun ye valorar les eleiciones pasaes. Pero hai estremos que nun podemos dexar pasar de llargo. En correspondencia col puxu de la ultraderecha europea, velequí que nel Estáu Español hebo un puxu d’Unión, Progreso y Democracia, el partíu lideráu por Rosa Díez del que nun se conoz ideoloxía dala namás que l’ego descomanáu d’esa señora y el ser receutora d’un ciñu sospechosu por parte de personaxes y medios de comunicación claramente españolistes y con enclín neo-centralista. Los votos d’UPyD nel País, y los sacaos en ciudaes como Uviéu, por exemplu, fain-nos tar sollertes ente esti fenómenu d’un País, l’asturianu, que ta n’ayén, siempre a la espectativa de los problemes llonxanos mientres que la so propia identidá y sobrevivencia esfarrapla día tres día. Sosa Wagner, l’home que Rosa Díez unvía a Europa, ye perconocíu n’Asturies poles sos penoses declaraciones y artículos escontra la llingua asturiana y ye enemigu acérrimu de tou intentu de normalización y oficialidá d’esta. Nós pensamos qu’una vez que mos xuntemos los nacionalistes asturianos d’esquierda, vamos poder tener más voz y brenga ente los ataques poco democráticos d’unos personaxes que cuenten con bien de plataformes y foros pa facese oyer. La segunda fase de la xuntanza, si los pleitos xudiciales y les rocees personales son a superase, tien de ser la d’algamar una triba de Frente Pola Llingua, onde habrá qu’amestar esfuercios y bona voluntá de partíos que, pesie a ser d’estremáu espectru ideolóxicu, sí coincidan col fechu crucial de ser asturianos y de ver na nuesa llingua una llingua nacional, de futuru y valoratible. La propuesta reciente d’Hevia, el famosu músicu nomáu miembru de l’ALLA, de formar una xuntanza (que va ser interclasista) a favor de la oficialidá de la llingua, vémosla con bonos güeyos una vez qu’un pasu previu sía fechu: la xuntanza de la esquierda nacional asturiana que, si sigue dividida como hasta anguaño, pue poner en peligru sucesives campañes de llucha y reivindicación de lo nuestro.
Nun hai tiempu que perder. Los que formamos parte de Polaxuntanza queremos poner mesa y mantel pa una reconciliación de los axentes políticos implicaos. Nós nun somos políticos y nun queremos de momentu facer más papel qu’esti: ufrir una mesa onde se sentar asosegadamente y aldericar un futuru de sobrevivencia. Si llegáis, políticos del nacionalismu, a un pautu de mínimos, nós podíamos retiranos discretamente a siguir trabayando nes nueses estayes particulares, siempre pol bien del País. Ufrimos a esos cientos o miles de ciudadanos la posibilidá de canalizar la so insatisfaición poles rocees actuales, y a los cabezaleros y organizaciones la posibilidá de falar constructivamente pa construyir les dos fases de sobrevivencia de que falamos:
1- Reconstruyir la Esquierda Nacional Asturiana.
2- Algamar el “Frente pola Llingua” qu’entre na Xunta Xeneral con digna representación y qu’al menos nesti capítulu suene como una sola voz nel nuesu Parllamentu énte posibles agresiones futures.
Tamos dimpuestos, coles nuestres pequeñes fuercies, a sirvir a esa mediación.
6 respuestes a “Mediación, xuntanza y llingua”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Junio 10th, 2009 at 15:19
Nun nos engañemos, l´asturianismu politicu nun ye quién más va perder cola apaición d´UPyD, más que ná porque más bien tien poco que perder…Lo que va perder va ser la nuesa cultura y tará un pasu de perder tol movimientu pola so recuperación fuera del arcu politicu, asociaciones culturales, músicos, escritores…UPyD presentase ente una sociedá politicamente desesperao (la nuesa, l´asturiana) que nagua por proyectos nuevos ya ilusionantes. Los datos d´UPyD n´Asturies son los más altos xunta Valladolí y Madrí…Les ferramientes que tien esti tipu de partíos son claros, busquen conflictos pa saca-yos rendimientu politicu, el mas usau y que más sonadía tien ye´l conflictu llingüísticu: Valencia, Galicia…y lo pior, la xente crelo. Crelo y vótalo. Yo toi por un replantemaientu estratéxicu fonderu y radical, amás, tamién creo que la situación ta pidiéndolo. Nun veo porque la sociedá d´Asturies nun diba acoyer bien un planteamientu nuevu, ilusionante y seriu de la mano de los partíos y movimientos politicos d´ambitu asturianu. Lo que nun creo que tea (o teamos, yo formo parte d´esa sociedá) dimpuesta a da-y de comer a otru perru col mesmu collar. ye dicir, si por separo los distintos discursos fechos durante venti años faense en comuña pero nun camuden dichos discursos, tendrase mas fuerza y medios pa espardelos. Pero ná mas. Nun hai absolutamente naide que pueda dicir claro que va cuayar. La solución que planteo ye xuntase tos los que tienen daque que dicir, preparar un argumentu asumible por toos (tanto poles fuerces politiques como pola sociedá asturiana) y glayalos, espardelos, argumentalos…
Mas reflesiones en
http://emburriando.nireblog.com
Junio 10th, 2009 at 21:34
Pa mín UPyD nun fexo alsolutamente nada; dafechu nun se quien son los llíderes equí n’Asturies, pero con too, foron votaos enforma (más de 17.000 nes caberes europées). En cuantes al asturianismu pasa pola xuntura perriba de personalismos e ideoloxíes (vease Nafarroa-Bai onde entra dende’l centru-drecha, fasta la esquierda abertzale, PNV-EA-ARALAR-BATZARRE), sinón diremos camín la disolución. Equí englobaría a la güei UAS, UNA, AA y BA.
Añadiría una cuestión más; n’Asturies los medios de comunicación siempres foron mui seguidistes de Madriz al igual que los partíos españolistes, y agora cola RTPA la cosa agravase entá más, cuando una RTPA de verdá seria (y non el enxendru d’angüaño) debería tar precisamente pa dar cabida y voz a tolo relacionao con Asturies. Nun dan cabía enforma de les iniciatives de los partíos asturianistes, si lo fain ye caciplao o con cuentagotes.
Junio 11th, 2009 at 16:49
UNA cuarta fuercia política n’Asturies nel votu los emigrantes fuera del estau.
309 votos a 30 d’IU, col 2′4%; si esi 2′4 se repitiera n’Asturies UNA algamaría unos 10.000 votos sumaos a los del estáu seríen 12.500 votos.
Se que ye’l cuentu la llechera, pero ye un resultáu digno d’estudiar fonderamente.
Junio 11th, 2009 at 17:33
En xeneral, pienso qu´hai qu´analizar l´altu porcentaxe de votos a AA y UNA fuera d´Asturies en comparanza colos de dientro. ¿Un vuélvese nacionalista tando fuera del País? Personalmente, sinceramente, dígovos que sí. A min pasóme y nun soi l´únicu. Dientro del País muncha xente vive nuna borbolla, y nun se decata del esgoncie cotidianu y del esfarraple calculao pol PSOE-Izquierda “plural”. Llaceriosamente, si llegare´l día en que toviéremos más “espulsaos” qu´habitantes dientro de la nación, díbemos esconsoñar… un pocu como pasó colos irlandeses, los “negros d´Europa”, nel sieglu XX.
Junio 11th, 2009 at 19:33
Son datos a lo menos curiosos. Siempre asocedió. Pero nestes eleciones pasaron coses per rares que nun hemos d´escaecer, trespasos de votos, desapaiciones…nun quixera falar de pucherazu…pero ratifícolo. Tienme pasao a mi y a otros munchos amigos míos que huberon de colar d´asturies, garramos otra concencia d´Asturies y sobre too del idioma, y más tovia si cales en llugares onde tamien tienen llingua autoctona y la presencia d´ella ye mas que cotidiana…Siempre tuvi concencia llingüistica, y munchos de los mios amigos tamién, pero daque esconsona en ti cuando daquién t´entruga intrigáu pol idioma qu´uses en colgando´l telefonu depues de platigar cola xente de casa. Tamien ye verdá, que nel mio casu esbarrumbáronse munches coses que tenia mitificaes d´asturies y de la mio percepción politica…Digamos que me volví menos nacionalista pero mas consciente de formar parte d´una realidá d´un colectivu cultural unica nel planeta.
Julio 30th, 2009 at 20:01
Hai de dir pasín a pasu. Pue entamase con facer un Día de la Nación Asturiana xunitariu nel que se faiga visible quién ye nacionaliegu nesti país y que la nación ye una sida que xune a les fuercies polítiques de calter asturianu.