Blog El gorrumbu’l torruxón
Yá tenemos ehí a la estrema derecha verdá picando a la puerta de la Xunta Xeneral. El partíu anti-llingua y anti-identidá asturiana consolidáu n’Asturies y virtualmente dientro’l nuesu parllamentu a la vuelta de 2 años. Nun s’esbarrumbó enforma IX y al final igual-y lo tenemos qu’agradecer y too, pol aquel de facer de contrapesu, polo menos. Los nacionalistes acollecharon lo que semaron. Nun pinten un res, magar va falta-yos tiempu de xuro pa sacar una montonera xides al so ridículu y otra montonera de valoraciones positives, porque equí’l que nun se consuela ye porque nun quier. Agora a siguir apostalgando a un llugar secundariu la llingua y la identidá. Agora a siguir poniendo na picalina de les prioridaes el machucar al otru pa ser tu l’incuestionable referente. Agora a siguir confundiendo’l mundu virtual col real. Si dalgún tenía duldes, los datos nidios apurríos polos númberos ten ehí: el nacionalismu asturianu, no que se refier a formaciones polítiques, ta muertu y enterráu. La única posibilidá ye una refundación sofitada nuna xuntanza de toos nun proyectu nuevu que ruempa, dafechu, colo esistente hasta güei. La estrema derecha tenémosla ende, enchipada y dispuesta a frayanos dende les nuestres instituciones históriques. Y los nacionalistes a niales, o por meyor dicir, a palos. Como siempre.
Artículu espublizáu en http://asturies.gugara.com/quasimodo/post/2009/06/07/upyd-pica-a-la-puerta
6 respuestes a “UPyD pica a la puerta”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Junio 9th, 2009 at 23:18
100 d’alcuerdu.
Junio 10th, 2009 at 10:09
La estrema derecha ya ta nes istituciones asturianes, ¿o ye que UPyD defiende dalgo distinto, encuantes a identidá y cultura asturiana, a lo que vienen faciendo el PSOE o el PP n’Asturies de magar 30 años, y IU hasta fai 10?. Pa min ye mas de lo mesmo, home si me falares d’Euskadi, Galiza o Catalunya, daríate la razón, pero equí ye mas de los mesmo.
Per otru llau, si ye verdá, la situación del nacionalismu asturiano ye mui probe, da pena venos.
Nun voi ser yo quién fale d’un partíu como referente encuantes al numberu de votos, porque nun lu hai, pero si falamos de refundación n’un proyeutu nueu que rompa colo que se vino faciendo n’Asturies nos caberos años, esi proyeutu acaba de ñacer y llámase UNA, nun lu entierres entovia.
El nacionalismu d’izquierdes ta xunto, supo sentase a falar y algamose un compromisu históricu: Dexar al llau les sos sigles y trabayar xuntos n’un proyeutu nueu, n’un proyeutu ilusinante. Esto vese ente la militancia d’UNA, onde nun hai complexos pa falar con naide. Ye muncha la xente del mundu cultural y políticu qu’entró a militar ensin dubiar cuando enantes yera casi imposible ver xente moyándose pola so idioloxía.
El futuru pue pasar por xuntase col BA y cola xente del PAS que tea farta de Xuan Xosé pol so presonalismu y falta d’autocrítica. Pero el presente pasa por facer d’UNA una organización más fuerte que medre en militancia y con ello en fuercia y presencia nos conceyos. ¿Falais de xuntanza?, entamaila vosotros, xuntaivos a la UNA pa facer qu’el BA y la xente del Pas replanteguen la so estratexa, unos porque tan mui comodos a la vera IU y otros porque nun son quién a desapegase de la saya XuanX necesiten ver qu’esto muevese y va p’alantre. Falar con estos grupos ensin tener afitau esti proyeutu xunitariu nun diba furrular, non por nos, sinon por ellos.
Salú collacios.
Junio 10th, 2009 at 12:14
pero qué tien que ver el PAS col nacionalismu d’izquierdes???? Porque un partíu defenda l’asturianu nun tenemos que pensar que yá val, que hai más coses que la llingua nun partíu nacionalista d’izquierdes…
Junio 10th, 2009 at 14:22
Nun falo del Pas, falo de xente del Pas, porque si nun lo sabes hai xente dientro o averao al Pas que ye nacionaliegu y d’izquierdes y que taba ehí como única alternativa p’algamar dalgo p’Asturies. Tampoco IU ye nacionaliega y hai xente dientro d’ella (BA) que ye nacionaliegu y d’izquierdes. Nun me paez que tengamos que pidir una fueya so la historia de ú militó ca ún pa que puedan entrar a trabayar n’esti proyeutu.
Salú.
Junio 10th, 2009 at 17:27
Pataroxa, el casu d´UPyD ye estremau dafechu. Basense en bona parte n´”asoleyar conflictos tapecíos”. Yo veolo preocupante. Polo xeneral, tamos viendo, qu´anque semen mierda en Baleares, galicia,…van recoyer frutes asgaya en Valladolí, Madrí,…Ye dicir, importa-yos bien poco enmierdar ya hipotecase nos llugares onde hai llingua autóctona. Resultáu: Onde supuestamente esiste´l conflictu la xente nun sofita la so candidatura, pero si a miles de kilometros onde la xente almite automaticamente qu´en Galicia nengún nenu sabe falar castellanu o que Canal Nou namas tresmite en valencianu (catalanizáu, eso si, pa da-y una vuelta de tuerca) nes tresmisiones…¿por qué?Porque la xente nin siquier se preocupa de saber qué pasa nesos llugares en verdá, munchos d´ellos nun tuvieron nunca nesos llaos, y otros nin siquier quieren dir a velo. Asturies ye un ñeru perfectu pa siguir esi xuegu, por partida doble. Muncha xente ta cansao y quier una alternativa politica y la situación llingüistica ta por esplotar (y esplosionar).
Tienenlo fácil. ¿Como nun van engañar a un manchegu o a un murcianu con que n´Asturies hai un “puñau d´alloriaos” que nun quieren facer otra cosa que imponer la so “manera de hablar” a castellanoparlantes de bien?¿Como nun van engañar a xente que vive a munchos kilometros d´equí si ya-yos la cuelen a los que tan equí?Recuerdovos qu´hai xente n´Asturies qu´afirma que “El Bable nun esiste, ye un inventu”.
Yo yá toi tremando, digovoslo de verdá.
Mas en http://emburriando.nireblog.com
Junio 10th, 2009 at 19:46
Tolos que tán pol asturianu como llingua oficial-llingua nacional debíen presionar converxentemente y llantar cara al proyectu populista d´UPyD, asina´l so xorrecer -dialécticamente, enfrentándose a ellos- ye una oportunidá pa´l xorrecer d´una xunidá astur-nacionaliega. Hai que puxar dica la xuntanza a) dientro de cada organización, b) ente les organizaciones dafechu asturianes.