Carlos X. Blanco
Entamemos esta web Polaxuntanza sabiendo qu´hai partíos a esgaya n´Asturies que cumplen el requisitu de ser asturianos y solamente asturianos, y sabemos que con esi requisitu al menos hai dos, AA y UNA, que son nacionalistes y d´esquierdes al empar. Por partíos nun ye. Nun tien dengún xacíu tratar d´apurrir o crear nueves sigles a lo que ye un mesmu espaciu políticu con poca base social entá na sociedá asturiana, onde yá hai un carrapotáu de formaciones que, no fondero, van a lo mesmo: a defender la identidá nacional d´Asturies, la so soberanía y la so llingua, too ello con un programa económicu y ecolóxicu d´esquierda.
Bien. La sorpresa, al menos pa min, ye, por embargu la bayura de comentarios y anuncies (nesta web o n´otres) favoratibles n´Asturies a una candidatura d´ámbetu estatal y de nulu raigón n´Asturies: Iniciativa Internacionalista. Tienen llexitimidá pa facelos, pero…
El día qu´un Tribunal del Estáu español impugnó a I.I. fo un día pa char el glayíu al cielu, cierto. La deriva autoritaria d´esti Estáu ye cosa imposible de ñegar nos díes que cuerren, y más agora que se persiguen non a los delincuentes, sinón tamién les candidatures que paecen tar “contaminaes” pol mundu abertzale radical. Esta llei de partíos ye de mui duldosa llexitimidá, fecha con pocu espíritu democráticu. Sicasí, l´intentu d´impugnación coincidió con otru intentu, menos sonáu a nivel estatal, pero qu´a los nacionalistes asturianos mos tocó más de cerca: el d´UNA. Esos pasaos díes d´impugnaciones en grau de tentativa y d´amenaces a tou soberanista, yá en procesu de ser teníu por –cuasi– terrorista, foron nel so conxuntu un episodiu bien triste na Democracia formal a la española que nós tenemos. Agora bien, una cosa debe ser criticar la llei de partíos española y otra cosa furtiar l´alderique sobre l´inmovilismu políticu d´una parte de la esquierda independentista vasca. L´Estáu español quier impugnar candidatures y persiguir delitos discutibles (como esi de “non condenar”). Mal fecho. Pero´l ciudadanu, y más si ye nacionalista d´esquierdes, tamién tien derechu a criticar esi inmovilismu abertzale na tema de la violencia, que moralmente pa min ye gafientu de xuru. Una esquierda independentista esa qu´amás crea paralís evidente ente los soberanistes y nacionalistes d´otres partes del estáu. Porque nun solamente La Razón y El Mundo, amás del Tribunal Supremu, van meter nel mesmu sacu mañana otru día a tolos qu´ellos nomen “anti-constitucionalistes”, non. Tamién la política de los cafres radicales y del siguidismu de los de les pistoles ye cosa que pon munches torgues al espoxigue d´otros procesos de lliberación nacional. Los dos estremos tóquense, españolismu y abertzalismu, como les dos partes d´una tiñaza que pue achaplar otres alternatives llexítimes y llibres de toa culpa.
Al abrir la web polaxuntanza, asina como al ver dellos comentarios n´otros foros y blogs, pudi ver cómo una candidatura non asturiana, ensin raigón nel País, pretende reivindicar (vamos, arramplar con) aspiraciones llexítimes y tradicionales del nacionalismu/soberanismu ástur. Pa ello, como si fuera en paracaídes, vienen eslóganes, aportaron anuncies y propagandes d´Iniciativa Internacionalista, inxustamente persiguía pol Estáu español, sí, pero pocu o nada venceyada a les realidaes asturianes. Dellos simpatizantes que podíen selo del nacionalismu ástur d´esquierdes, de siempre Internacionalista y defensor del derechu d´autodetermín, paecen tar entusiasmaos con una candidatura que vieno al nuesu País a “completar el mapa” del territoriu estatal. Años naguando por espulsar a les sucursales polítiques del País Asturianu, escomenzando pol PCA ya IX, y agora nos train esto, cola áureola amás de ser víctimes, de ser radicales, de ser “lo más de lo más”. Quixera saber qué ye lo que saben Ángeles Maestro o Carlo Frabetti d´Asturies y de los supuestos “territorios hestóricos” que debemos reclamar. Yo voi dicívoslo: nada. Nel fondu piensen que como n´Asturies nacionalistes/independentistes somos cuatro, nun somos Nación. Toi seguru. Nun tenemos oficializáu l´idioma y yá queremos qu´éstos personaxes, col abrazu del osu añedíu d´Otegui, pa más inri, mos dean cachinos d´otres autonomíes si un día algamen daqué. Siéntolo, pero non, yo con esos non. Y xuntanza con esos, non. La Xuntanza ha ser esclusiva d´asturianos y de fuerces asturianes. Y enantes d´abrir la boca hai que saber si tamos dispuestos a comenos tol platu. Los asturianos nun debemos xintar el fast food afechiscu en Madril poles “corrientes roxes” de diseñu y demás, nin esperar la palmadina al llombu nuna Erriko Tabierna. Güei aterricen equí, mañana ehí te quedes.
Xuntanza Asturiana, y non paracaidistes, por favor.
18 respuestes a “Iniciativa Paracaidista”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Mayo 30th, 2009 at 0:35
Si esos nacionalistes asturianos tuvieren daveres un enfotu nacional nun andaríen dixebraos a estes altures y a años lluz de la realidá que carecemos tolos díes asturianos como YO Y MUNCHÍSIMOS MÁS. Nacionalista asturanu nun ye’l que se define como tal, sinón el qu’actúa como tal. Vivo n’Asturies y toi somorguiáu na realidá social asturiana, y tán cerca o tán lloñe tán d’esa realidá los “autóctonos” como los “foriatos”. Si nun pasamos de la realidá teórica y virtual a la PUTAMENTE REAL, personalmente dexo too esto pa prau dende yá.
Saludos.
Mayo 30th, 2009 at 8:38
Queríu Xanu: atrévense a vinir foriatos inda con comités llocales de sofitu, por cuenta de la INUTILÁ de dellos, de los d´equí, y de la falta d´ALTOR DE MIRES. Pero una cosa ta clara: el so fracasu (ente la indiferencia xeneral de la sociedá asturiana que ve como la so Nación desapaez) va ser por cuenta d´ellos tamién, de los dos, UNA y AA, y nun va tener xacíu andar con escuses. Que si España, que si los mass media, etc. Fracasu y perda (otra vuelta) d´oportunidá hestórica.
Mayo 30th, 2009 at 12:09
Xanu, ¿tu oyisti eso dacuando de dos nun se xunten si ún nun quier?
Yo yá pasé de lo teórico y lo virtual a lo putamente real afiliandome a un partiu y trabayando pola xuntura. Anímote a que trabayes constructivamente pa ello.
Nun podemos esperar a que nos lo dean fecho. Los nacionalistes tenemos que moyanos.
Saludos
Mayo 30th, 2009 at 12:15
Carlos, dafechu d’acuerdu col post. Cuido que parte de los males del nacionalismu asturianu tienen que ver col seguidismu que fai del d’otros llaos (dende la Junta Regionalista hasta anguaño, pasando pol CNA). Faltennos referencies propies. Por cierto, Herriko ye con hache
Mayo 30th, 2009 at 12:34
Carlos X Blanco lo tuyo no es nacionalismo, lo tuyo es racismo barato pero del gordo. tengo la sensación de que si viene aqui un trabajador de palencia y tiene un conflicto con un patrón asturiano, defenderias al patrón y al currela de palencia lo quemarias en la hoguera por perfido españolista. Dices que la Xuntanza ha de ser de fuerzas asturianas puras e inmaculadas nada más, pues bien si pretendes transformar la sociedad con tan pocos efectivos, o a) no lo vas a conseguir, b) no lo quieres conseguir.
Mayo 30th, 2009 at 12:52
Paezme una bona reflexón, Carlos. Nun podemos escaecer partíos que lleven una montonera tiempu trabayando n’Asturies.
Mayo 30th, 2009 at 13:14
Los partíos n’Asturies lleven trabayando una montonera d’años y garrando cero puntu cero oxetivos. Nestes elecciones europées Asturies nun puede tener representación. Allégrome de qu’Andecha y UNA se presenten, ye una mierda que vayan per separtao porque amás nin siquiera van sacar nada, pero nun entiendo esi odiu a Iniciativa, que tien un comité de sofitu n’Asturies, el web completamente tornau al asturianu ya inclúi l’asturina nel so cartelu.
Dicir qu’II-SP ye una candidatura “d’ámbitu estatal” cuando se sabe que ye precisamente la candidatura de la esquierda nacionalista de los pueblos, xuntos pa consiguir camudar el sistema y dar voz a les identidaes ye tendencioso.
Osea, que criticamos que’l BNG torgare la presencia d’AA y UNA, que podíen dir nuna candidatura que presta muncho cola socialdemocracia -siendo amables- pero nun se pue sofitar a una candidatura como Iniciativa Internacionalista?
¿Qué van sacar AA y UNA nestes elecciones? ¿500 y 1000 votos? Que s’axunten y partamos de cero, dende la esquierda y dende’l soberanismu.
Mayo 30th, 2009 at 16:36
1) Llamentablemente n´Asturies gástase un radikalismu (con “K”) de boca ancha que solo val pa dir pasando la edá de los granos y la pubertá acomplexada.
2)La candidatura d´I.I. ye llexítima, nun hai derechu a impugnala, tien tol derechu del mundu a vinir a asturies a facer la so campaña. Yo namás digo que nun ye la de mio y que nun tien visos de ser asturiana, que ye un duplicao (pero en malo) d´iniciatives soberanistes que tenemos equí. 3) En malo, porque yá quixeron emporcar milenta vegaes cola “vasquitis” el problema nacional asturianu y ye lo que menos necesitamos anguaño, esto ye, más dispersión de candidatures, más confusión de los porgüeyos, más batifondu en tolos sentíos.
4)Si´l dia de mañana I.I. arraiga nel país y sirve pala xuntanza que yo defiendo, tendrá los mios parabienes, pero meyor sin la compañía d´Otegi.
5)Una cosa ye illegalizar partíos ya impuganr candidatures que per se nun son terroristes, y otra ye facer crítica POLÍTICA d´organizaciones que nun son sanctasantórum. A ver si nun vamos poder criticar l´inmovilismu de delles fuerces, en comparación cola valentía d´Aralar, por exemplu.
6) Caún pue trabayar na estaya y na opción que-y pete pol bien d´Asturies. Yo di mio opinión, namás. Con nome y apellíos. Esbabayar en plan “radikal” con nomatos pela internet ye como ponese un pasamontañes pa facer fechoríes. Igual de “heroico”. Asina que, filipo, “racista” sedrá to madre.
Mayo 30th, 2009 at 17:05
Voi finar la mio intervención nesti filandón con una invitación a estremar el mundu virtual del real. Y pa ello voi plantegavos a toos una entruga pa que reflexonéis a modo y ensin priesa y ye ésta:
Dende un puntu vista basáu, esclusivamente, na práctica política diaria y non en definiciones previes, quién ta más averáu y implicáu nesti momentu na realidá política y social d’Asturies, Valledor (non nacionalista) o Rafa Palacios (nacionalita con pedigrí)?.
De la rempuesta sincera que nos demos a esta entruga pue surdir un relluguín qu’allume’l nuestru debate.
Saludos a toos.
Mayo 30th, 2009 at 19:29
Pol bien del alderique y por educación, habríamos tener respetu nos comentarios que s’escriben equí. Evitar los insultos gratuitos ayuda pa qu’esti sitiu seya granible. Valga esto como avisu (sobre too a aquelles persones qu’embaxo’l nomatu se vuelven tolo bocayones que nun s’atreven dando’l so nome) si nun se quier facer una moderación previa de los comentarios.
Agora, en cuantes a lo que diz xanu, yo creo que Rafa y Valledor intentaron la estratexa de camudar IX dende dientro. Pero pa ello tuvieron que tragar con demasiao, dende’l mio puntu de vista. Con too y con ello, atalanto qu’habríemos de despelleyar a otros dientro d’IX enantes qu’a ellos dos.
Mayo 31st, 2009 at 3:25
Si AA y la UNA fueren nacionalistes de verdá non sólo hai tiempu que yá fixeren una llista conxunta sinón que habría años yá qu’andaríen reivindicando’l territoriu nacional d’Asturies pero nun lo faen porque nun lo son, nun son nacionalistes y nun reivinf¡diquen el territoriu nacional asturianu. II sí lo fai, sí reivindica un territoriu nacional p’Asturies porque II sí ye nacionalista. AA y UNA lo único que son son partíos izquierdistes que lo que reivindiquen ye la provincia española d’Uviéu. esa ye la realidá. II ye la vanguardia nesti momentu del nacionalismu… asturianu.
Mayo 31st, 2009 at 11:30
Xurdi yes mundial. Yo la xente que conozo que va votar I.I. en Uviéu son antinacionalistes pero van votar a Sastre porque meten “caña al estado”. Mira tu.
Nun dudo que tengan munchos votos.
Mayo 31st, 2009 at 12:55
Muéyome cola entruga’l Xanu: Valledor. Les coses como son.
Mayo 31st, 2009 at 13:15
Xanu: la entruga de to ye importante. Yo nun ´se que contestar, la verdá. Fizo más pola llingua (non muncho, pero bono), por exemplu, na Xunta Valledor que toles correríes de Palacios per esi mundu alantre. Pémeque. Valledor nun ta nel so sitiu dientro d´IU. Valledor tien qu´atopar el so sitiu, pero n´IU nun va facer un res. Va dar que falar, eso de xuro.
Mayo 31st, 2009 at 13:49
http://www.glayiu.org/?accion=ver&tipo=noticia&id=9083
Hai xente cola que nun se pue cuntar, hai xente que tola vida lleva boicoteando los intentos de xuntura, hai xente que solo aceuta como válida la doblegación de los demás nacionalistes a les sos tesis y lo pior: baxo l’unicu paragües de les sos sigles.
Vos animo a militar n’Andecha Astur y comprobar les razones de por qué tamos asina.
Pa tolo demás ta la UNA, organización que si fexo’l gran esfuerciu de xuntase, un esfuerciu desagradecíu per parte de munchos como ye’l vuesu casu. Ye muncho lo que se tuvo que pasar p’algamar un garrapiellu importante de xente cone vocación de facer daqué xunitariu, valorailu envede desbabayar, anque’l desbabaye seya tolo llexitimu que querais. Ye imposible xuntase con quien nun quier, pa exemplu tenemos la historia de los últimos 15 años del nacionalismu.
Junio 1st, 2009 at 13:07
Toi d’alcuerdu con vosotros (y lo sabéis) cola necesidá de que se xunte’l nacionalismaun comparto la vuesa opinión no que cinca a Iniciativa Internacionalista.
¿Pa que val votar a Andecha Astur o UNA nes prósimes elleciciones eurpees? ¿Van sacar daqué?
II-SP si puede algamar un eurodiputáu, asina que me paez llexítimo y cmpatible con ser nacionaliegu/a asturianu/a el votar a Iniciativa Internacionalista.
Y nel mio blogue (sturum.blog.com.es) yá dexé un artículu falando sobre la posible entrada de dalgún partíu nacionaliegu asturianu n’Iniciativa Internacionalista nel futuru.
Junio 1st, 2009 at 15:47
Sturum: l´artículu ye de mio, de Carlos Blanco, nun ye una editorial de Polaxuntanza.
Ye llexítimo votar esa candidatura, como dices. Pa min personalmente nun ye “estratéxico” pal nacionalismu asturianu anguaño, pero claro que ye llexítimo. Y gracies por sofitamos, Sturum.
Junio 3rd, 2009 at 10:14
Un partíu Nacionaliegu puede y debe ser tamién internacionalista. Nun me val esaltar l´asturianismu a costa de menguar o menospreciar les identidaes d´otros pueblos, tean nel Estau Español o fora. Tamos toos a la par y a partir d´equí entamemos a trabayar. De tolos mous, tenemos de xuntamos colos que más s´averen a los nuesos ideales. De manu, nel nuesu país hai que algamar la xuntanza ente AA, UNA, BA Y “forzar” al PAS a averase a nós. Ten-y en cuenta que IU tién los díes contaos ( va a pasa-y lo mesmo que a la UCD, llueu foi CDS y finó como un partíu “asturianu”,Centristes ASturianos, pa desaparecer nel PP). Asturies va a necesitar un partíu d´esquiedes de referncia que´l PCA nun cubre. En Galicia tienen el BNG (un bloque, ya veis) que cubre l´espaciu de IU nel so país. Esi Ye´l camín.
El segundu pasu, de cara al Estáu y a Europa, ye la xuntanza con partíos Cismontanos averaos a la causa Astur, esto ye, buscar partíos Astur- Llioneses en Llión y Estremaura. Una vez algamaos estos proyectos, podremos falar d´averamos a coaliciones europees n´igualdá de fuercia q´otros partíos (y el BNG, col rabu ente les pates, acoyonáu).
Nací en Bélxica, fiu d´emigrantes; soi mestizu de madre estremeña y tataragüelu catalán, como munchos nes Cuenques Mineres; con dos años vine p´Asturies a la que considero la mió patria por sangre paterna y aculturación de mió.Nun soi pura sangre ¿soi menos asturianu?. La mió muyer, asturiana, sangre occidental del Francu, cabraniega y una plizca Vaqueira; la mió fía sigue sin ser pura sangre ¿ye menos astur?. Nun caigamos nes babayaes de la pureza de sangre nin na de “marcar” a tolos foriatos como anti-país Astur, porque ehí hai una bona fonte de votos.
¿Palacios o Valledor? los 2 me sirven pa la Causa. Ficha-ylos.