Editorial de “Pola xuntanza”
Una xuntanza ente fuercies nacionalistes va siendo una necesidá en delles estayes de la sociedá asturiana. Llevamos cuasimente 30 años de Democracia Formal nel Estáu Español y magar qu’hubo dellos pasos alantre bultables na hestoria recién de la conciencia nacional asturiana, la falta d’una estructura xunitaria estable onde los nacionalistes asturianos sían quien a vese reconocíos y poder atopar esfuercios pa emburriar nun mesmu sen ye una llaceria que podemos pagar caro toos ensembre. Nun falamos nesta web d’un partíu únicu del nacionalismu d’izquierdes si esa nun ye la voluntá mayoritaria de la xente comprometío anguaño con esta orientación política. Falamos de mano, namái, que de la creación d’un Frente o Plataforma que –ensin prexuicios recíprocos y con abonda xenerosidá- cola que podamos los ciudadanos d’esti País facer causa común pa da-y un sitiu a Asturies nel mundu y na hestoria. Queremos pal País el llugar que-y correspuende. Más alló de convocatories eleutorales inmediates (qu’equí nun mos interesen de momentu) l´oxetivu tien de ser –polo menos- la creación d’una cultura política a comuña d´autodefensa y de caltenimientu de les nueses señes d´identidá.
Hai que falar d’autodefensa, collacios y collacies, porque l’Estáu Español nun ta amosando precisamente les sos primicies en materia de pluralismu, tolerancia y democracia. L’Estáu Español remanáu pol nacionalismu más estremu que lu dirixe, el nacionalismu español (l’únicu nacionalismu fuerte anguaño n’Asturies) ta más que dispuestu a caciplar los marcos llegales y a forzar les llendes formales de la tolerancia con tal de nun permitir xorrecer les naciones que lu integren. La baza que xuega colos nacionalismos más débiles y a piques d’asomar la cabeza (como´l de nueso) ye la del “divide y vencerás”. El nun entrar al trapu nes provocaciones y bilordios espardíos dende medios de comunicación estremistes allugaos en Madrid ye un esperimentu o cebu que se mos quier tender, cola fin de tantiguar les posibilidaes de solidariedá, prebar la posibilidá d’autodefensa y xunión ente asturianos, ver la capacidá de trabayar a comuña p’abeyase énte los misiles cargaos d’odiu y velenu que se llancen dende la “Piel de Toro”. Y por eso esta web quier ser un entamu pa poder xuntar eses manes y disciplinar les voluntaes del nacionalismu ástur. Los ataques y les criminalizaciones de xuru van dir a más a midida que se vea n’España qu’equí, n’Asturies hai una alternativa nacional asturiana viable, creíble, seria. Sigue habiendo xente que nun soporta un idioma asturianu oficial. Centraliegos y periféricos non asturianos nun quieren una quinta nación na so apautada “cuota” de la Transición. Interesa, y muncho, siguir llendando l’armentíu humanu con aquello de qu´”Asturies ye España…”. Si escomenzamos a crear un Frente sólidu que ñegue la mayor, y que respuenda como una sola voz a los ataques y les difamaciones, la cosa va empobinada.
4 respuestes a “Ye cuestión d’autodefensa y de preparase pal futuru”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Mayo 25th, 2009 at 9:59
Ye un mail duplicau de Gyg y Carlos Blanco, pero creo que vien a cuentu equí.
Vamos pensar qu’eso de la xuntanza cuaya y hai conversaciones. Y pasa lo qu’hai dos años. Y resulta que depués vuelve haber xente que sigue usando la sigla Andecha. Según tu entós ya nun valdría y habría que tirar polos que se quixeron xuntar y dexar de llau a los otros. ¿Qué diferencia hai colo que pasó hai dos años? Nun lo entiendo.
Lo que yo digo ye que siempre va haber un grupín de puros que van considerar que los demas son españoles, federalistes, vendíos o socialdemócrates. Y sin nun tuvieren la sigla Andecha Astur usarien Andecha Darreu que la tienen rexistrada, o sinon cualquier otra.
La sigla Andecha nesti momentu sigue siendo conocida pa della xente, por eso aguanta’l tirón, pero ye una carcaxa na que nun queden referentes de persones nacionalistes que seyan integradores o conocíes. De la xente conocido que tuviera n’Andecha ya nun queda naide.
Yo namás te digo una cosa, compara la llista electoral de la UNA y la de la xente qu’usa la sigla Andecha y dime cuála ye la qu’aglutina al nacionalismu d’izquierda y cuála ye una llista compuesta d’irreductibles que nun se quixeron xuntar hai dos años.
Esa xente a los que dices qu’hai que da-yos la oportunidá ya se-yos dio hai dos años, en 2007. Entruga-yos a los sos ex compañeros como salió’l tema.
Pa llanzar al ciberespaciu una cosa asina lo primero ye informase. La xuntanza ya se fixo, agora lo que queda ye que la xente s’entere. Hai que mirar p’alantre y nun intentar un imposible que ye xuntase con quien ya demostró que nun se quier xuntar porque tien la verdá absoluta. Y por eso quedaron solos, nun lo escaezamos.
Entiendo que la xente ayeno a la militancia, pueda dende los sos blogues con bon aquel sacar iniciatives d’estes, pero hai que ser un poco rigurosu, más que nada por respetu a la xente que dexó tanto atrás por una xuntanza na que ta casi tol mundu pero que, como dicía el cantar de Dixebra “a dellos nun-yos val”.
Dicho con respetu a les vueses opiniones que ta claro que son perbien intencionaes y busquen el bien del país.
Mayo 25th, 2009 at 13:44
Dexando claro qu´hai respetu equí pa tol mundu, quiero decir que pa entamar iniciatives ciudadanes como esta nun hai que pidir permisu a naide y nun hai por qué contar colos antecedentes hestóricos que dices más alló de lo que sepamos pola prensa o lo que vós, los comentaristes, queráis dicir equí, nesta web, que pa eso s´entamó: pa informar, pa reflexonar, p´aldericar. Respetu a los militantes: tol respetu del mundu. Ensin ellos nun llegamos a nada. Respetu a les iniciatives ciudadanes fartes d´unos antecedentes y unes torgues coxunturales que´l públicu nun pescancia, pues cuido que tamién hai que lu tener. Esta iniciativa nun pretende nin sustituir al llabor de les organizaciones, nin metese nos sos cotos propios onde elles puen decidir. Esta iniciativa nuestra ye la d´informar (por eso colgamos noticies d´UNA y AA) y la de reflexonar pa crear una cultura política a comuña, un Frente pal día de mañana. Equí naide sobra, y denguna opinión sobra. Nun sé onde ta la falta de rigor na idea rectora d´una xuntanza estratéxica, básica de cara´l futuru. L´analís que facemos dende esti colectivu ye 1º) la oportunidá hestórica de xorrecer un soberanismu asturianu d´esquierda a falta d´otra esquierda creíble n´Asturies, 2º) el peligru españolista que se pue abalanzar sobre micropartíos que son fácilmente víctimes de de la difamación y la manipulación. Nun sé si un nacionalista asturianu pue quitar rigor a esti analís sobre la gravedá hestórica del momentu. De verdá, va ser difícil neganos esto. Gracies.
Mayo 25th, 2009 at 16:54
Faltaba más. Yo nun pongo en dulda nada de lo que dices, ni tampoco qu’haya que pidir permisu.
Namás intentaba aportar unos datos que viendo los análisis que se faen paezme que faltaben pa entender que ye lo que pasó y ta pasando.
La mio opinión ye que pa facer un bon análisis hai que tener los datos y que ye inxusto repartir culpes o pidir responsabilidaes o igualar como si tuvieren la mesma responsabilidá a la xente que cedió y perdió pola xuntanza y a los que nunca se movieron un res y por ello quedaron solos, anque utilizando un nome conocíu.
Ya veis de que palu soi y lóxicamente nun m’escuendo. Si la mio opinión vos val pa daqué ehí ta. Pero pa xulgar a la xente ye importante conocela.
Mayo 26th, 2009 at 22:41
Pero igual hai xente que pue amestase agora a un movimientu xunitariu que superare lo que pasó en 2007. Igual nun contamos con muncha xente que nun tien prexuicios nin idees preconcebíes y sía quien a participar nun Frente, o dalgo asemeyao. Nun quiero tantu ser “equidistante” (nun soi naide pa xulgar a eses persones de la política asturiana) sinón “superador” de la llaceria actual. Ensin restar votos a naide, fixar oxetivos-por embargu- comunes pos hai alversarios comunes. ¿Qué te paez? ¿Ye que nun se pue entamar una xuntanza dende les bases, ampliando les bases sociales, fixando oxetivos comunes de crítica, de contestación: l´idioma, los toros, el militarismu, la monarquía, los premios “príncipe”…Si apuntamos cola crítica contra lo mesmo, más fuerte, hombru con hombru, XUNTOS PODEMOS.