Carlos X. Blanco
Estimaú Sr. Valledor
A falta d’otres canales, sírvome de la rede para facé-y llegar míes duldes y esmoliciones al rodiu d´una “nueva izquierda asturiana” cola que Vd., aveza amagar en declaraciones públiques. Deseo-y tola suerte de mio parte, como ciudadanu d´a pie. En calidá tala, creo qu´esta comunicación ente dambos dos va ser unidireccional, anque m´enfoto en que Vd. va lleer mio carta. Coincido con un diagnósticu suyu de la realidá asturiana que lleera va pocu, y pienso qu´una persona como la suya tien munchu que facer pa que se muevan les agues estancaes de la política asturiana y de la izquierda del país. Anímolu a que sos declaraciones nun se queden n´amagos, pero quixera face-y llegar tamién míes duldes sobre lo que d´“asturianista” pue tener so proyectu.
Tol mundu sabe que l´Estáu Español y Asturies discurren pela carril del bipartidismu. Dos partíos, PSOE y PP exercen la hexemonía y afalen la mentalidá de l´alternancia. N´Asturies, nun esisten fuerces polítiques propies que sían quien a abrir una resquiebra metanes la llábana que los dos partíos españoles punxeron sobre nuestru suelu, por aciu de sucursales incapaces d´obrar con un mínimu d’autonomía, sucursales babayes y cégares no cincante a les necesidaes específiques del nuestru país. Son brazos de la maquinaria electoral estatal y carecen de la más mínima óptica asturiana. Esos brazos del centralismu tresnocháu son los que ganen les elecciones asturianes, por embargu.
La trayectoria de la Coalición Izquierda Unida nun pue ser más llamentable. Llamada a ser la tercer fuerza n´Asturies, a falta d´una presencia institucional digna de los partíos asturianos (asturianistes, nacionalistes, etc.), esta coalición estatal vien amosando una falta de seriedá y de compromisu coles sos propies declaraciones, una burlla a la verdá digna de ser anotada nos anales. Acudiendo a les hemeroteques podemos comprobar cuántos de sos compromisos yeren “irrenunciables”, principiando pola oficialidá de la llingua asturiana. A la fin, lo que queda siempre como irrenunciable ye una llista de “puestinos” concedíos pol omnipotente PSOE empara, precisamente, de renunciar.
Los “puestinos” del “ámbitu” asturianista son especialmente sangrinos. Da la impresión, xustamente, de que se resuelve´l modus vivendi de delles persones venceyaes cola izquierda (unida) con tal d´arrenunciar a lo que na propaganda d´IU siempre se diz que ye irrenunciable. Velequí aquí dellos exemplos: RTPA, Oficines de Política Llingüística, Conseyos Asesores d´esto y de lo otro y lo de más allá. Queda na más completa escuridá’l fechu de que les afinidaes personales con IU signifiquen facilidaes para publicar, facilidaes a la hora de recibir subvenciones, presencia mediática y publicitaria de los nuevos intelectuales orgánicos del “asturianismu”, cargos dedocráticos, etc.
Con too y con eso, Vd., señor Valledor, vieno soltando a la opinión pública d´Asturies una propuesta, creo que sin concretar afayaízamente, empobinada a refundar Izquierda Unida. Trataríase, si nun atalanto mal lo que lleo nes sos entrevistas y artículos, de volver a crear una Coalición d’Izquierdes verdaderamente asturiana. Coincido con Vd., al menos n´esto: Izquierda Unida nun sirve yá pa nada sacantes p´ abrir el camín haza la consolidación del Poder Eternu del PSOE, tanto na estaya estatal como na asturiana. La fórmula ye cenciella: Vds. acepten los “puestinos y les perres” (a fin de cuentas tamos acostumaos a que los políticos vivan de la política) y, empara, pierden socesivamente más y más votos que queden reintegraos nes filas socialistes, pues toos sabemos que´l públicu prefier los orixinales a les copies. N´Asturies sabemos qu´IU y PSOE son los mesmos. Nin siquiera cambia´l collar. Los canes socialistes pueden lladrar contra´l “bable”, y Vds., los gatos de la cai, miagan y dicen defendelu con retórica propia d´una ONG. Pero’l casu ye que nin unos nin otros, perros y gatos, detienen l’etnocidiu: más bien entainen.
¿Que se refunda IU? Meyor: l’actual fiede mal. ¿Qué por fin hai un partíu realmente asturianu y non una sucursal de la mesma Coalición morrebunda a nivel estatal? Los fechos diránlo, pues Vd., señor Valledor, siempre apostiella que se va federar colos demás restos del naufraxu post-comunista n´España. Y toos sabemos lo que ye “federalismu” na tradición hispana, por desgracia: estatalismu y “centralismu democráticu” amazcaritaos. Asina que tendrá que disculpar mes duldes.
Vd. amesta una llista d’epítetos a esa refundación qu´afala: asturianista, ecosocialista, altermundista, etc. Bien. Ye fácil dar epítetos a lo que nun esiste tovía. Ye como bautizar al guaje antes de parilu ¿Nun cree Vd.? De momentu, eso que se quier refundar, la vieya y conocida “Izquierda Unida” ye una especie de monstruu de Frankenstein. Xirones y cachos de carne fediondos que recuerden abondo al PSOE y que contribuyen al etnocidiu y al esbarrumbe económicu d´Asturies.
¿Dalgo nuevo? La nueva Coalición ¿va ser “asturianista”? Serálo guapamente si d´una vez por toes hai un grupu políticu, encarnáu n´ella, con posibilidaes de representación institucional que nun considere “renunciable”, esto ye, negociable (1) la Oficialidá de la Llingua Asturiana y (2) la esixencia d´autogobernanos al máximu nivel como correspuende a una comunidá nacional.
Yá hai dellos partios asturianistes y soberanistes n´Asturies. Demasiaos. Quiciabes Vd., yá cuenta con esi “demasiaos” qu´implica una desunión ente ellos de la que poder algamar una ganancia. Inda la Coalición na que –de momentu- milita patentara unu d’esos mini-partíos (el Bloque por Asturies) col enfotu d´arramplar la cuota d’asturianismu/nacionalismu que correspuende a una fuerza d´izquierdes alternativa a la FSA y qu´anda cada vez más escasa de votos. ¿Qué se pretenderá si se “refunda” IU? ¿Facer d´ella un tren con una serie de vagoninos enganchaos en n´orde menguante de fuerza y realidá? ¿Engancharánse más asturianistes a la izquierda suya, más de los que yá hai n´IU y nel Bloque? El votu del nacionalismu asturianu de veres d´izquierda, asina como’l del asturianismu moderáu y simplemente progresista ta yá muy desencantáu. Si la nueva criatura cola que Vd. amaga ye una nueva versión de lo mesmo, esto nun va a ser sinón defraudar y engañar, buscar puestinos y perres, subvenciones pa los amigos, y mantener la inercia vergonzante del “gueto del bable”. Entóncenes munchos maldeciremos esa criatura, si ye que naz.
Si ye que naz porque hai tovía en IU enemigos declaraos de la nacionalidá asturiana, españolistes que se dicen d´izquierdes y yo sobre eso nun tengo que day a Vd. llecciones.
Agora bien, si esa refundación va en serio debería Vd. tener en cuenta que la franquicia tipu “Bloque por Asturies” más o menos ampliada nun-y va sirvir. So asturianismu debería ganar en componente identitariu si de verdá quier atraese a un mayor electoráu y militancia. Nun son vagones asturianistes (“los del bable”) los que debería enganchar a una locomotora ensin carbón que ye IU. Son locomotores más modernes que lluchen pola Oficialidá y l´Autogobiernu nacional les que deberíen arrastrar a una nueva izquierda d´Asturies. Sía ambiciosu y afale esa Izquierda col componente que sía de verdá asturianu y non una nueva sucursal o franquicia (la fórmula estatutaria dame igual) de lo que se cocina en Madrid. Nun se-y pide qu´esa nueva formación seya “nacionalista”. Nada más se-y pide que sía una fuerza “asturiana”. Col diagnósticu escelente que fizo Vd. va pocu na revista Atlántica XXI podemos coincidir munchos: el Réxime de la FSA ye velenu mortal pal País. Hai mester cambiar esa inercia dende la izquierda. Nuestra afirmación como nación con llingua propia ye clave nel alitar de l´autoestima que va acompañar a un nuevu enfoque productivo para Asturies.
De Vd. va depender siguir siendo funcionariu d’una Coalición fundida y desastrosa p’Asturies, o ilusionar y lliderar a gran parte d’esa sociedá crítica col réxime, pero que sufre´l mal del cainismu y la dispersión (la dispersión de nacionalistes y asturianistes, por falta de xuntanza) incapaces de xuntase y conformar ellos mesmos una alternativa al réxime clientelar de la FSA.
Artículu espublizáu en http://www.asturbulla.org/index.php?option=com_content&view=article&id=6050:carlos-x-blanco&catid=145:ensayu&Itemid=303
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible