Ricardo Candás
N’Asturies fai tiempu que vivimos nun enfermu y cayoncu sistema políticu y de representación ciudadanu. Camiento qu’hai una falsa idea que va tiempu medrando y que cierta oligarquía quier metenos pela tiesta. Ye la idea la bondá na alternancia del poder, como si esta alternancia, per se, fuera garante d’un sanu sistema políticu. La idea ye falsa, porque l’alternancia que mos vienden ta sofitada sobre dos únicos finxos, dos únicos partíos qu’alcuerden esa alternancia. La cosa ta clara, n’Asturies nun se camuda’l sistema de representación eleutoral porque convién a los grandes partíos (por cierto, sucursalistes d’otru estatal) y la masa votante sufrimos la inxusticia representativa d’esti proceder en tres circunscripciones. Cenciellamente nun importa lo xusto que seya pal votante daqué (nun s’entruguen estos partíos estatales por qué val más o menos un votu en Xixón que n’A Veiga), lo importante ye que’l PP y PSOE s’acuten espacios de poder que nun quieren camudar pa siguir asegurándose ciertu númberu de poltrones.
Esti sistema eleutoral vien tamién sofitáu pola nomada Llei d’Hont qu’asegura un pindiu camín pa partíos minoritarios. Normalmente, ente’l bipolarismu políticu (espardíu y fomentáu pol PP y PSOE) vien siendo maquilláu pola apaición na escena d’un tercer partíu políticu (nel nuestru país asturianu suel ser IX) que tien como finalidá por parte de cierta mano escura dar esa apariencia de normalidá y de posibilismu.
N’Asturies, esta división bipolar de la política ye entá más llaceriosa cuando asistimos una y otra vuelta al desaniciu dafechu d’una tercera fuercia política qu’amenorgue o suavice la llampurdiada procedente de los grandes partíos. IX, atalanto, ta sufriendo la espalda de bona parte del so eleutoráu dende diez o quince años p’hacia acá. Que la propia fuercia política nun s’entrugue una y otra vuelta por esti éxodu masivu y perda de votos ye enforma pa pensar. Y nun ye que nun se dean cuenta d’ello los sos cabezaleros (que vienen siendo los mesmos, poco más o menos, dende l’aniciu’l fundimientu p’hacia acá), cenciellamente nun-yos interesa porque la solución a esa entruga sería dexar el puestín que tienen y dir a tomar vientu.
Pero’l casu ye que, como dicía, la tercer fuercia política n’Asturies (que ye trina, ye dicir, tien tres personalidaes, IX-BA-LV) ta entemeciéndose, amestándose, diliéndose col PSOE pautu tres pautu hasta pasar de ser izquierda descafeinada a nun atopar más que diferencies estétiques colos socialistes (una amuesa d’esto son les ablucantes declaraciones sobre IX de Paz Fernández Felgueroso, alcaldesa de Xixón pol PSOE, onde s’esmolez polos baxos resultaos d’IX; ye la primer vegada qu’un partíu s’esmolez polos baxos resultaos d’un partíu col que compite nunes eleiciones: http://www.elcomerciodigital.com/prensa/20070529/portada/fernandez-felgueroso-parece-justo_20070529.html). Poro, n’Asturies al día de güei namás hai dos partíos na Xunta’l Principáu, porque IX ye un apéndiz, muleta, instrumentu del que se manda’l PSOE. Hai tiempu que la personalidá d’IX argayó nun se sabe mui bien per onde.
Valledor, conseyeru por IX na Xunta, faló delles vegaes d’una necesidá de refundar la izquierda asturiana venceyada al asturianismu o nacionalismu asturianu, crear una nueva fuercia acordies a los valores propiamente d’izquierdes y dafechu pensada por y dende Asturies. Valledor ye conocíu por ser críticu nel so propiu partíu con determinaes acititúes y ser cuasi únicu cargu altu d’IX que s’atreve a pone-y ciertos puntos a ciertes íes al PSOE, anque sirva pa bien poco. Les declaraciones de Valledor, entós, amuesen esti estropiciu y escalabru al que se ta viendo sometíu IX (y los sos satélites pendulares BA y LV).
Visto lo visto, ¿qué opciones hai pa una tercera fuercia política n’Asturies como alternativa al desaniciu d’IX? Sigo pensando en clave asturiana y nacionalista d’izquierdes. Y namás se me pasen pel maxín a UNA y AA, porque dende les eleiciones, ¿qué sabemos de la famosa Iniciativa Internacionalista?, ¿úlu?, y les sos bondaes pa col pueblu asturianu ¿úles a meses de les eleiciones? Habrá que ponese a trabayar, caún dende’l llugar que-y correspuende y dexanos d’engarradielles que nun valen pa nada nin d’esperimentos foriatos que namás apaecen dos meses enantes de les eleiciones pa nun volver saber d’ellos darréu. Valledor tien tola razón cola necesidá d’un nuevu partíu. Lo demás ye siguir siendo la risión del PP y del PSOE.
Artículu espublizáu en http://www.asturbulla.org/index.php?view=article&catid=145%3Aensayu&id=6031%3Aricardo-candas&option=com_content&Itemid=303
39 respuestes a “Alternancia política y tercera fuercia política”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Noviembre 3rd, 2009 at 13:50
Dende un puntu vista electoral, queda añu y picu pa les prósimes autonómiques y el panorama ta asina:
1) Nun s’avanza hacia nengún procesu de xuntanza. Hai declaraciones ambigües ayuri y acabóse.
2) Falta por definir si’l BA entraría o nesi procesu. Como lo de Valledor ye, per agora, un brindis al sol, nun lo considero pa nada.
3) Nun se sabe qué dirixente o dirixentes sedríen la cara pública del proyectu. Los entamos anónimos nun sirven nel xuegu políticu electoral.
4) Nun se sabe si los dos finxos plantegaos apocayá, d’oficialidá llingüística y autogobiernu, conseguiríen el consensu, o si se plantegaríen otros supuestos y cuálos sedríen a la sociedá.
En resumíes cuentes, nun paez probable que dende’l nacionalismu/asturianismu se vaya ufiertar nada coles mínimes posibilidaes d’algamar representación institucional nes prósimes autonómiques. El tiempu échase encima y xuega escontra.
Noviembre 3rd, 2009 at 14:15
Ye tan cenciello como lo que plantegues, xanu… Llueu vendrá un partíu X, de nun se sabe mui bien ónde, dos meses enantes de les elleiciones, y robarános la merienda. Y si non, al tiempu.
Noviembre 3rd, 2009 at 16:01
Esi partíu que va salir a falta dos meses, ye normal que lo faga; 1/pola desunión de los partios nacionalistes/asturianistes, 2/polos so malos resultaos electorales.
Lo qu’hai de mirar tantu dende la UNA, como’l PAS o lo que queda de las dos AA, pero tamién dende Fai!, BpA o Valledor y cñia. ye si ficieron lo suficiente por algamar esa xuntanza, que glayais dende esti blog, pero tamién lo fain cola boca pequeña Valledor,UNA y AA-PAS.
Los de la boca pequeña, creo más bien que falen de “la so xuntanza”, demientres nesti blog veo naguar “pola xuntanza”. Ye comprensible, cada corripíu tira palo de só.
Pal PAS, algamar el diputáu ye posible pola mala situación na que s’alcuentra’l PSOE??????
Pala UNA, hai de marcar distancies cola sigla AA, pa llegar a ser los REFERENTES del nacionalismu d’izquierdes asturianu. Ye curiosu, xueguen a ser referentes en comparación colos votos, pero nun se-yos ve’l plumeru por temes de calter social ¿onde ta la izquierda?
Palos d’AA, abondo tienen col asuntu les sigles, que tiene de solucionar pol bien de to@s lo enantes posible y ponerse d’alcuerdu cola otra AA, anque nun seya cenciellu.
Con esti escenariu políticu, onde cada ún quier asomar la tiesta ¿nun ye normal que salga dalguna fuercia política más?. Anque seya p’averar la muria de les llamentaciones de los partios asturinistes, llevase votos a otres llendes o mesmamente como maniobra pa obliga-yos a entendese ente les ociones polítiques asturianistes.
Nun sedría mui complicáu que Valledor algamare otros 1000 votucos presentandose solu y formar un 4º partíu políticu. II lo fizó. Anque lo ciertu, ye que Valledor ye más llistu y va caltenese n’IU a nun ser que vea ociones reales d’algamar coses, o seya cola xuntanza de delles formaciones polítiques asturianistes.
Total otra más, que más da na corripia nacionalista asturiana.
Noviembre 3rd, 2009 at 17:59
Hasta la fecha nun tenemos retruque dengún del Sr. Valledor. N´Atlántica XXI (ver blog “Criticando ASturies que candialmente mos apurrió esti artículu)y en entrevistes anteriores dícía un nuevu partíu “más asturianista”. Agora diz en Les Noticies qu´una versión d´IU a la vasca o a la catalana…o sía, que más de lo mesmo, IU pal casu. Más defraudar. Quixe-y entrugar a Valledor tomándo-y la pallabra, tomándolu en seriu y respetando la so baza, que tien derechu a xugala. Si nun hai retruque nin aclaración nestos díes, yo toi d´alcuerdu col Xanu: val más escaecese d´esti señor y de lo qu´elli representa y xuntalu definitivamente col “Bloque pal Engañu”: la esterilidá más absoluta y l óportunismu total.Los nacionalistes a tomar nota: o Valledor fáise nacionalista y abandona IU, o que siga na poltrona mentes-y dexen n´IU.
Noviembre 3rd, 2009 at 20:46
Home wallace, equí naguamos pola xuntanza, pero non pola de nosotros o la de mio, sinón pola d’Asturies, que somos toos y toes. Y yo nun toi en nengún corripiu, o cuanto menos, nel mesmu nel que tas tu.
Querer ver grupinos onde nun los hai camiento que ye ún de les enfermedaes del nacionalismu asturianu. Porque ver grupinos estremaos, ye ver enemigos onde nun los hai.
Noviembre 3rd, 2009 at 22:28
Igual despliqueme mal, Ricardo.
Los corripios formenlo los micro-partios. La vuesa iniciativa paezme interesante.
Si llees un pocu’l filu, la mio aportación va nel sen de qu’a los partios se-yos llena la boca con “aperturas”, “xunidaes d’aición”, bla,bla,bla,… pero la realidá ye que falen de la SO unidá d’aición,esto ye, equi ta’l partíu, el que quiera que venga conmigu… y que nun moleste. Asina nun vamos nin a pañar setes.
La vuesa propuesta de xuntanza nun ta calndo nos partios porque nun-yos interesa, asina de nidiu. Son les bases les que deben reaccionar.
Teo constancia qu’en dalgún de los partios, dalgunes de les bases naguaron por ello, y agora tan en casa o dedicandose a otres coses. Ye frustrante falar con muries y “referentes” nel nacionalismu asturianu, anque toi d’alcuerdu na necesidá d’abrir alderiques como los que nagüais nesti blog.
Teo más ilusión n’algamar la xuntanza que nos de puxu n’Asturies cola mocedá (Darréu, Fai!, UNA mocedá, Sofitu, ERA,Xunta moza…) que colos presentes mandatarios políticos qu’hai angüañu n’UNA,PAS y les dos AA (nun quiero dicir que nes executives d’estos partios seyan toos de 50 p’arriba, anque la so mentalidá paezme d’inmadurez política unos y de personalista,cuando no paternalista y egocentrica otros).
Esa ye la base pa un proyeutu políticu de futuru onde la mocedá garre les riendes del nuevu proyeutu políticu y la xente con esperiencia aporte, pero non marafundie les coses.
Noviembre 3rd, 2009 at 23:59
Agora sí t’entendí, wallace
Noviembre 6th, 2009 at 19:39
La mocedá? Entós agora que mos tenemos que xuntar UNA-Mocedá, Fai!, Darréu, ERA (que nun y mocedá precisamente) Xunvetú Asturianista, les Mocedaes del Bloque y la Xunta Moza??? Qué facemos? otru partíu? fundimos los que yá hai?
Pémeque tamos esbabayando en pro d’una xunción que nun va aportar nunca, de dalgo utópico daveres.
Noviembre 6th, 2009 at 22:44
Pelayu, paezme que nun albidrasti lo que dixo Wallace, a lo menos tal como yo lo entendí. Si nun lu interpreté mal, lo que dicía Wallace yera que ye necesaria la xuntanza de les organizaciones qu’esisten, pero qu’él nun piensa que seya posible coles persones que les rixen anguaño, sinon que de selo sedrálo cuando tome’l relevu otra xente más mozo, sacaos d’ente los que mienta. Tamién dixo que nun ye que los cabezaleros pasen toos de los 50, sinon qu’hai xente de menos edá tamién, pero que’n tóu casu carecen de dellos defectos que tamién los faen deficientes pa esa xuntanza. Eso por poner un pocu les palabres de Wallace en claro.
Agora bien, la mio opinión ye cosa diferente, yá la manifesté por activa y por pasiva. Dende va tiempu tengo’l discu duru con una doble partición. La unidá C: llámase cabréu, la unidá D: llámase escepticismu. Nun t’apures, que los partíos qu’hai nun tienen falta de que naide los funda, fúndense solinos, unos por uno, otros por otro. Y lo peor ye que van semando’l camín de calabres, quiciabes tu mesmu nun futuru, oxalá que non.
Saludos.
Noviembre 7th, 2009 at 0:31
Si, Pelayu lo que diz Xuan Canas ye asina, quiciabes diria “xente nun operativa pala xuntanza” más que “deficientes”.
Ye la xente moza de Darréu y UNA Mocedá los que tienen de promover la xuntanza ente les organizaciones polítiques. Los/es mozos/es tienen de ver que por separtáu nun vamos a nenyuri y son los que tienen de llevar iniciatives que puxen pola xunidá d’aición (exemplu ERA, un sindicatu estudiantil nacionaliegu, antifacismu, dia de la nación asturiana, campañes contra’l gobiernu psoeiubpaverdes,… penrriba los intereses de partíu.
Llueu dende xunta moza, fai!, sofitu, mocedá independiente nacionaliego,… deben sofitar estes iniciatives o promovelas.
Ya se ficieron coses y furrulen fai tiempu, si hai enfotu pa ello.
¿crear otru partíu saliente de la mocedá? No, home non, lo que faltaba. La fragmentación partidista solo beneficia al más votáu.
Noviembre 7th, 2009 at 10:11
Táis tocando un puntu clave.
Enantes del veranu señalárase yá un puntu de trabayu a comuña: los conceyos. Pero de más altor ye la xuntanza ente les organizaciones de Mocedá, de les que, por ciertu, hai delles que son TRESVERSALES, ye decir, que nun nacieron pa competir coles hermanes d´elles, y menos pa competir electoralmente. Yo, que yá nun soi mozu, quixera convidar estes organizaciones a facer más y más aiciones xunitaries si ye que nun quieren tovía embarcase nuna plataforma orgánica nueva y única (onde tampocu teníen por qué perder la so independencia orgánica inicial, yá que formules hai munches).
LA MOCEDÁ TIEN QUE TOMAR EL RELEVU del nacionalismu asturianu. Si Fai!, Darreú, UNAMocedá etc. dan un pasu con independencia de los pseudodirixentes mayores que puedan torgar la xuntanza, taríamos nun puntu d´inflexón. Facéime casu. Sedría un momentu hestóricu pa paoder medrar. Habría un llugar de verdá onde encuadrase ya ilusionar.
ESA PLATAFORMA DE MOCEDÁ unitaria diba poder crear los sos propios cuadros de cabezaleros, diba poder programar nueves prioridaes de llucha y de trabayu, al marxe de los que ponen trabancos anguaño. Esos “mayores” y otros mozos pero siguidistes d´ellos, podríen quedar sobrepasaos polos fechos.
Dende esti blog hai que facer un brinde a eses organizaciones de mocedá pa que dean esi pasu: CREAR UNA PLATAFORMA UNITARIA de defensa d´ASturies. Y que n´ella figuren persones con nome y apellíos que den exemplos y ánimos dé sa xuntanza.
Los que nun podemos tar ehí (por edá, por falta de afiliación) solo podemos CONVIDAR a que lo faigan, proponelo encarecidamente. Pero hai xente mui activo nesos grupos y xente mui intelixente: HAN SABER QU´ESTI YE´L MOMENTU. Valledor y sus coroques “asturianistes”, ta claro, nun van a dengún lláu.
XUNTANZA MOZA YÁ.
Noviembre 7th, 2009 at 15:32
Trabayu nos conceyos y xuntanza de les organizaciones de mocedá nacionaliegas, esto salvando les distancies son dos de los pilares de les Candidatures d’Unidá Popular (CUP) catalanas, xunto cola democracia participativa, transparencia política y defensa de les señes d’identidá propies. Esta xuntanza tien de ser daque proyeutáu cola idiosincrasia propia d’Asturies. en política ta too inventáu, pero cada nación tien de refacer los sos propios mecanismos organizativos. Lo qu’en Cataluña sal bien, non necesariamente pue salir bien n’Asturies, anque ya hai trabayu caleyáu.
¿ye posible una xuntanza asina?.
Noviembre 7th, 2009 at 18:30
D´alcuerdu en too, Wallace
Noviembre 8th, 2009 at 2:55
Paezme interesante lo que se comenta equí, pero namás dicir que Fai! ye una organización qu’anguaño ta formada por xente mozo pero que nun ye de mocedá estrictamente.
Saludinos
Noviembre 8th, 2009 at 20:32
Darréu, los mesmos noreños que nun se quixeron xuntar na UNA.
FAI!, los mesmos que siendo MIAS marcharon de la xuntaza d’UNA.
¿quereis que siga? Tais falando de la mocedá como camín d’igües, y fueron eses mocedaes les que más ficieron pa que güei sigamos sofriendo milenta sigles.
Sois unos frikis.
Noviembre 8th, 2009 at 21:13
Pin y Pon, ¿eso de los de FAI ónde te lu cuntaren? Porque pillónos a toos col pasu cambiáu lo de que colaren, llevábenlo como hai que lo facer: callandino y trabayando. Y marcharen ensin armar xareos (a los qu’otros tan muy avezaos a montar) pa siguir trabayando igual. Otros nun podéis dicir lo mesmu.
Noviembre 8th, 2009 at 23:18
A “Pin y Pon”-y rogamos que dexe los sos diagnósticos de frikismu pa otres webs, si nun quier recibir de lo mesmo qu´él da.
Y ye nidio que la xente mozo ye la única que mos puede sacar d´esti via crucis.
Noviembre 8th, 2009 at 23:32
paez qu’esti filu ta llevantando sarpullios.
N’otru post más enrriba falaba de “La vuesa propuesta de xuntanza nun ta calndo nos partios porque nun-yos interesa, asina de nidiu. Son les bases les que deben reaccionar”.
Esta ye la tipica reacción cuando ún camenta que van a desmonta-y’l so chiringuitu particular.
Si los “noreños” nun foron a xuntase y los de Fai! colaron (y dalgun más) de la UNA, de xuru que parte de culpa tienen, pero igual ye que la UNA tal como se ta faciendo nun-yos val como “referente” del nacionalismu asturianu.
La xuntanza del nacionalismu asturianu requier más dialogu y sobro too, da-y a cada grupin la so parte. Les histories de equí tamos nós, el que quiera xuntanza que venga con nós, escuchelu ya nel PAS,AA y UNA.
A ver si se dan cuenta estes organizaciones que les xuntances se fain 1/ si ún quier y 2/ nun siendo sectarios.
La mocedá considero que tien la capacidá de decidir sobro’l primer puntu. Nel segundu puntu dependera de los sos respectivos cabezaleros. L’ERA ye un exemplu de que les coses pueden salir alantre con un pocu de voluntá política.
Por ciertu l’ERA fizose gracies a les mocedaes de les diferentes organizaciones polítiques.
Noviembre 9th, 2009 at 10:13
Cuando salió lo del ERA l´añu pasáu, punxe grandes esperances pa una xuntanza. Facía falta que medrara en númberu d´asistentes a les convocatories, y que la so presencia nun se llendara a la Manifestación añal d´ochobre contra los Premios. L´ERA ye una vía pa la xuntanza si fuera a más.
Noviembre 9th, 2009 at 12:25
1. Que yé l’ERA hom?
2. Yo toi cada vegada más convencíu que los que se dicen nacionaliegos asturianos nun lo son talmente. Sí tienen a Asturies como referente y a la llingua asturiana como ún de los finxos primordiales, pero nun ye lo que más-yos esmuel. Enantes tienen otros principios (comunismu, marxismu, qué sé yo) que son infranqueables, inabordables, indestructibles, inquebrantables, etc y depués Asturies. Sinon, porqué baxo los dos “axiomes” qu’equí falamos de lo que tien que ser un nacionaliegu (llingua y autogobiernu) nun hai forma de que se pongan d’alcuerdu?
Si una persona antepón como cuestión indiscutible que’l partíu nel que te ha llevar el color rosa nes sos sigles y como nun te en rosa nun forma parte d’esi partíu, realmente creyeis qu’ama la llingua?
3. Too esto da muncha murnia. Añu trés añu ye lo mesmo. Y l’asturianu cada vegada peor. Y, nun creo tracamundiame, podíamos tener un partíu grande con varios miles de votos 20.000 ó 30.000 mínimo.
Noviembre 9th, 2009 at 13:25
Mister T, nun sé’n qué mundu vives tu nin qué rellación tienes nin cómo de directa ye, o cada cuántu tiempu, coles organizaciones asturianistes-nacionalistes, pero lo que dices nel to mensaxe ye FALSO. Los de MIAS dieron completa publicidá de la so disolución, y amás de forma inoportuna, poco enantes de les eleiciones del 2008. En primer llugar sacáronlo ELLOS MESMOS na páxina web oficial de MIAS. Nun se puede poner el vínculu a esa páxina porque cuando los d’IAS lo vieron quitáronlo a toda priesa. Pero pa cuando ficieron eso yá yera tardi, porque daquién pegó’l comunicáu oficial de MIAS en Glayíu.org. Cuasi al mesmu tiempu volvió apaecer esi mesmu comunicáu tamién nos foros d’Infoasturies. Nun tengo tiempu p’andar buscando’l comunicáu en Glayíu (que de xuru sigue tando nel archivu de noticies vieyes), pero sí atopé una reaición al pasu dáu na mesma páxina, que ye ésta:
http://www.glayiu.org/?accion=ver&tipo=noticia&id=5721
Y tamién atopé lo referío al casu nel foru d’Infoasturies, que ye esto otro:
http://infoasturies.mforos.com/1176640/7226511-disuelvese-mias/
Polo demás nun sé ónde tá lo positivo de l’actividá de FAI! que nun pudieren siguir desendolcando como MIAS o con cualisquier otru nome, pero dientro de la UNA. Lo que sí sé son delles coses negatives, como por exemplu, el contribuyir a la fragmentación del asturianismu-nacionalismu y el suxerir votar a Iniciativa Internacionalista (”paezmos una opción interesante”), compitiendo directamente con AA y UNA. Vamos, que nin marcharon “callandino” nin “ensin armar xareos”, a nun ser que te refieras a que nun insultaren a naide, pero políticamente nun pudieron facelo peor. Éstes y otres munches coses son les que a mi me faen repartime ente’l cabréu y l’escepticismu.
Noviembre 9th, 2009 at 13:52
Mira, tampoco tardé tanto n’alcontralo:
http://www.glayiu.org/?accion=ver&tipo=noticia&id=5740
http://www.glayiu.org/?accion=ver&tipo=noticia&id=5758
Estos dos mensaxes tienen fecha del 25 de xineru del 2008, y el del comentariu del Frente Xudaicu curiosamente del día anterior. Y too eso a un mes de les eleiciones, que si nun recuerdo mal fueron en marzu d’esi añu. Tamién ye curioso lleer les palabres de MIAS, coles que vienen dicir que nun comparten la estratexa de xuntanza con IAS (la coalición Unidá), y que pa nun molestar quítense d’enmediu. Si d’esta triba de xente va ser d’onde vengan les aniciatives de xuntanza, vamos daos. ¿Tengo o nun tengo bones razones pa ser escépticu?
Noviembre 12th, 2009 at 23:08
Nun toi mui al tantu d´esi enguedeyu que mos desplica Xuan Canas, pero lo que sí quiero decir ye qu´una Mocedá Nacionalista/Asturianista xunida diba ser un pegoyu clave, y una espolleta de la Xuntanza más xeneral. Yo tamién llamento, como Xuan Canas, que FAI! (respetando como respeto los sos determinos internos)asoleyare esi comunicáu de sofitu a Iniciativa Internacionalista (que yollamé equí “Paracaidista”) xusto antes de les Ellecciones , espardiendo y dividiendo más el votu soberanista de lo que yá taba antes. Y eso qu´hebo un BRINDE ESPLÍCITU A LA XUNTANZA empobináu a ellos, directamente, ellos que podríen tener xugao un papel bien guapu combináu cola modesta iniciativa nuestra …Despreciaron el nuestru llamáu y en cambeu afalaron entós I.I. Asina tamos, llamentable.
Pero Espero tovía qu´esa organización xire´l rumbu, y collabore con nós. Si dalgún d´ellos me llee que sepa que tamos equí colos brazos abiertos a pesar de too. Esti blogue pueden facelo suyu, si quieren una xuntanza daveres.
Noviembre 13th, 2009 at 20:47
Xuan Canas da per fixes delles coses que me paecen sintomátiques de lo que sofre esti movimientu:
Primeru, fala como si hubiere un escenariu perfechu pa que dauqién marche d’una organización. Vaya, home, si ye enantes de les eleiciones ye malo porque se dexa mal enantes, si ye dempués tamién porque debilita dempués d’unos malos resultaos, si ye tando de puta madre porque entós paez que nun ye too tan guapo y asina hasta l’infinitu. Enxamás hai un bon momentu pa qu’una organización pierda a parte de la so militancia. Y sinón dímelu tú.
En segundu llugar, yes tu mesmu’l qu’aprofita pa cuntar lo democrático d’esos dirixentes d’ias, que cuandu xuben una noticia aprobada democráticamente (si nun foy asina y tienes prebes podíes dales) garren tola cara pa quitar lo espuesto soberanamente por una Asambleya.
En tercer llugar, yes incapaz de ver que, independientemente de les esplicaciones qu’a ti nun te dieron (lo meyor ye entrugá-yos, a mi cuntáronmeles) esta xente coló pero nun se dedicó a tar años y años siguiendo col ruxe ruxe de los andechos y los unitarios, prohibíendose manifestaciones, denunciándose unos a otros d’una manera impresentable etc etc. Ye dicir, colaron, dixeron que colaben y ehí morrió l’asuntu. Y por cierto, polo que yo sé les rellaciones con xente de la UNA y d’Andecha son perbones, ehí ta l’ERA y cuántes coses más.
Pa finar, habríes d’entrugar tú a los d’IAS por qué dexaron que colaran ensin facer res pa impedilo. O qué razones hubo pa ello.
Y pa poner les coses guapes tamién contigo, Carlos, podíes averate a dalguna mani amás d’escribir n’internet, ¿eh?. Que muncho sofitar xuntures pero dempués, cuando se vos faen BRINDES ESPLÍCITOS A LA XUNTANZA, anque seyan modestes iniciatives desprecies les convocatories. Y el Xanu? y Ricardo?
Y si tienes dalgún problema con ellos lo meyor ye manda-yos un email. Asina que nun quixeron collaborar con vos?
PUXA ASTURIES LLIBRE Y SOCIALIESTA!
Noviembre 13th, 2009 at 23:07
Lo que diz Xuan Canas ye la versión d’una parte y lo que diz Mr.T de la otra. Toi seguru que dambos tan en formaciones polítiques pola defensa de les sos posiciones.
Creo que Mr.T foi atacáu nel momentu de que dixó qu’ellos colaron ensin más, demientres “otros” ficieron muncho ruxerrux, entós llevanto la espita porque al metese con ún de los “otros”, estos reaccionen y la so defensa ye un bon ataque, más o menos.
Agora llevái esto a los partios políticos d’angüañu asturianos. Ye una situación perasemeyada d’infantilismu cainita como diz perhi creo que Carlos.
Los nacionalistes paez que tan entá en castros astures, desplicome. Cada micropartíu representa un castru. Na domina astur los habitantes de los castros peleabanse ente ellos por algamar alimentos (subvenciones), notoriedá (cabezaleros) o simplemente por llendar el so terriroriu (xuicios de sigles, mias-fai!), esto ye lo mesmu. Amás nel momentu que medrá la población d’un castru, el xefe la tribu ye’l que manda, y el que nun obedezca ye espulsaú (escisiones). Si colen dellos, igual son capaces de facer otru castru n’otru territoríu diferente (ideoloxia política).
Yo solo espero que lleguen los romanos, pa que toos los astures se xunten contra un enemigu común. ¿Los romanos sedrán la UPyD?. Quiciabes ya llevemos colos romanos munchos años n’Asturies y entá los astures nun nos enteremos.
Noviembre 13th, 2009 at 23:45
Pa Mr T:
El comentariu que me dirixes ta de más. Debíes sabes qué papel-y correspuende a caún nesta llucha, polo que veo nun tienes n.p.i
Y escribir fataes n´internet con nomatu nun ye lo mio.
Pongo´l nome y l´apellíu, que ye lo que nun fai nin el ún por cientu de los supuestos nacionalistes d´esti País.
Nun teo problemes con Fai!, nin con naide. Namás dicite que foi pa min desafortunáu´l so sofitu a Iniciativa Paracaidista. Igual que nun teo problemes con AA nin con UNA.
Con toos ellos, rellaciones bien candiales, pues saben que lluchamos polo mesmo.
A toos ellos crítiques, por nun ser quien a xuntase, cosa yá sabida nesti blog.
Asina que Mr T: polo qu´a min respecta: Alón (a nun ser que vuelvas equí con otru nomatu, claro, pero con esti d´agora, alón y pa siempre).
Noviembre 14th, 2009 at 2:43
Vamos ver, que yo yá nun sé nin de lo que tamos falando.
En primer llugar intervién “Pin y Pon”. Diz que poco hai qu’esperar de cierta mocedá como esperanza pa la xuntanza, concretamente citando a Darréu y a FAI!, y da los sos argumentos, compartíos o non por caún, pero llexítimos. Lo único que yo-y criticaría de la so intervención ye’l llamar a naide “frikis”, lo demás paezme respetable.
A continuación intervién “Mr. T”, que polo visto pícase col anterior y respuende básicamente con:
a) que lo de FAI! ónde-y lo cuntaren
b) que marcharen ensin xareos
c) que lo ficieron pa seguir trabayando igual
Dempués van les mios dos intervenciones retrucando a “Mr. T”, en bas a:
a) Si daquién cuntó la disolución de MIAS fue MIAS, públicamente y na so propia páxina web oficial. Paralelamente apaeció un comentariu críticu (el del Frente Xudaicu) en Glayíu. Y al día siguiente volvió salir como noticia (citando como fonte la páxina web de MIAS), por duplicáu, nuevamente’n Glayíu. Por si eso fuera poco, tamién citando la páxina web oficial de MIAS, apaez n’Infoasturies. 5 vegaes, 5, en mui pocu tiempu y en varios sitios de la rede. Paezme que nestes condiciones tá dafechu de más que “Mr. T” entrugue a “Pin y Pon” qué quién-y lo cuntó. Por eso me sorprende la entruga y pregunto yo a “Mr. T” si acaso tá desconectáu de tou esti mundín, porque pienso qu’igual que m’enteré yo enteraríase tol mundu, sacante polo visto “Mr. T”.
b) Paezme que lo anterior nun s’axusta precisamente a “marchar ensin armar xareos” como diz “Mr. T”, sinon facelo con una bona dosis de publicidá. Eso sí, que yo sepia nun faltaron a naide, a lo menos públicamente.
c) Precisamente pol momentu escoyíu (a un mes d’unes eleiciones) y pola forma na que se fizo público (pudieron comunicalo internamente y asoleyalo públicamente dempués d’eses eleiciones), paezme una mui mala forma de facelo, o por torpeza o a costa fecha, que nun lo sé. Anque seya difícil d’evaluar el dañu efectivamente producíu, tará d’alcuerdu conmigo “Mr. T” qu’esa posibilidá yera real. Si lo lleguen asoleyar dempués de les votaciones, los bonos o malos resultaos nun tendríen nada que ver cola so marcha. Faciéndolo público primero, ye un factor de riesgu mui grande pa socavar la credibilidá d’una candidatura llamada precisamente “Unidá”, qu’entama la so andadura perdiendo xente cuando lo que pretende ye atropala. Ye más, el comunicáu oficial de disolución diz negro sobre blanco que los de MIAS nun comparten con IAS (el so propiu partíu de referencia) la estratexa de xuntanza materializada na coalición Unidá. Si eso nun ye como pa perxudicar a ésta, yá me direis. Paezme lóxico sacar en consecuencia que difícilmente de FAI! pueden sacase esperances de llograr esa xuntanza. Yo nun suxero qu’haiga escenarios perfectos pa que della xente cole d’una organización, pero sí afirmo qu’hai escenarios malos y escenarios peores. Que valore caún.
Y agora delles precisiones. “Mr. T” diz que yo aprofito pa cuntar lo democrático del proceder de los dirixentes d’IAS, supongo que lo de “democrático” dicho con ironía. Yo nin aprofito nin dexo d’aprofitar, nin xulgo si esi proceder foi o nun foi democráticu. Simplemente cunto les coses tal como asocedieron. Lo democrático o non democrático del proceder ye asuntu internu de los afectaos, tanto IAS-Unidá como MIAS-FAI! O polo menos cunto les coses que trescendieron públicamente. Como nin toi nin tuve n’IAS nin MIAS, si ellos quieren cuntalo mos enteraremos, y si non, non.
Y pa terminar, cincante a lo que diz “Rapiega”. Pueu asegurate que soi una persona políticamente independiente, nun pertenezo a dengún de los grupos o sub-grupos asturianistes-nacionalistes anguaño actuantes. Nun tengo polo tanto interés partidista dengún n’atacar o defender a naide, nin ye la mio intención. Cenciellamente veo munches intervenciones d’unos y d’otros (incluyíos los independientes) ciertamente descentraes, en munchos casos por falta de datos que posibiliten entender meyor les coses, n’otros casos por enfoques políticos enquivocaos debíos a coses como’l sectarismu, el maniqueísmu bonos-malos, etc. Cuando tengo datos de los que toi seguru, apúrrolos equí. Cuando veo análisis que me paecen erróneos dígolo y amás faigo los míos propios. Lo que’n dengún momentu fice foi personalizar, atacar, insultar nin nada asemeyao, y si lo fice que me digan ónde y cuándo. Eso sí, entiendo que discutinios y alderiques como los que se dan nesta páxina nun son los normales nel mundín asturianista-nacionalista, nin nel conteníu nin nes formes. Yo nun toi equí pa meteme ente tirios y troyanos, sinon pa, si ye bonamente posible, aportar too lo que pueda a un tema que, pesia lo visto tantos años, sigue esmoleciéndome, como imaxino qu’a toos los demás. Agora bien, si les mios intervenciones van ser mal interpretaes, retírome y santes pascues.
Saludos pa toos y toes.
Noviembre 14th, 2009 at 11:41
Mr T, sabes por qué nun fui les manis que TU DICES que nun fui??
Noviembre 14th, 2009 at 13:37
Xuan les tos aportaciones paecenme interesantes, ye más cualesquier persona que ta un pocu metíu nel mundin asturianista sabe de sobra que les tos aportaciones son muncho más creibles que les de Mr.T.
La mio aportación vien al casu de que’l discutiníu ocasionáu paezme que ye daque normal nós partios politicos nacionalistes, siempre tien la razón el so partíu nun ca se confunde.
Esto creo que ye debíu a la falta d’espiritu criticu nel organigrama de los partios, y cuando esiste, finen n’escisiones, o curiáu, colen pa casa.
Toi seguru a qu’hai más nacionalistes “quemaos” en casa que nes agrupaciones polítiques esistentes. Eso hai de miralu tamién, los motivos y porque los partios nacionalistes/asturianistes alcuentranse estancaos (polo menos nes urnes) dende va más de 30 años.
Noviembre 14th, 2009 at 17:08
Roblo los comentarios de Rapiega. Añado otru míu: puestos a esbillar cuál ye’l mayor de los males del nacionalismu quédome con esti: el sectarismu. Cansáu, percansáu, y frayáu de tantes movides vomitives nel nacionalismu políticu y asturianismu llingüísticu (pertenezo a la triba de los nacionalistes “quemaos” que volvieron a la lluz al traviés d’interntet)namás que vos digo una cosa qu’intento yo, supongo qu’ensin consiguilo, dende hai bien de tiempu: escaecer a los sectarios, escucar pela ventana la cai y dempués salir ehí fuera. Y buscar ente los asturianos la llosa onde pueda biltar una sociedá estremada y ilusionante nel futuru.
Un saludu candial a toos.
Noviembre 15th, 2009 at 17:45
Como militante de Fai! quixera esclariar delles coses:
Los más de los militantes d’esta organización entramos muncho dempués de les escisiones de MIAS y demás. No del apoyu a “Iniciativa Paracaidista” nun foi talu, primero porque los estatutos impídenmos sofitar o pidir el votu haza partíu dalu y segundo porque nun tolos militantes de Fai! tábemos d’alcuerdu en votar a esa candidatura (nos que m’incluyo). Lo únicu que sí amestamos foi que la idega d’ésta abultábanos “interesante” en devanéu nun criticamos la falta de presencia y voz asturiana, etc…
Y nun voi entrar nel tema alrodiu de si Fai! pueda ser o non la llave o la culpa d’una xuntanza o una dixebra del nacionalismu asturianu. Nós trabayamos dende un ámbetu social y políticu, pero non partidista. Si hai proyeutos nos que’l nacionalismu seya quien a participar en comuña, bien.
D’otra miente facer posa en qu’esta organización cunta con xente simpatizante d’estremaos partíos o idegues polítiques d’esquierda (eso sí, encuadraes dientro l’internacionalismu, altermundismu, nacionalismu etc…)
y que pueden aidar o participar físicamente en pro de la org o partíu que gusten (mentanto seya a títulu personal y non en nome de Fai!).
Noviembre 15th, 2009 at 17:53
Gracies Denis poles tos aclaraciones.
Falta agora saber si sabéis la xente de Fai! si esa opción “interesante” d´Iniciativa Paracaidista tien vida tres les elecciones, yá que foi recomendada de della manera por Fai!, o si más bien fue un OVNI. Un obxetu que pasó por esta murnia patria, y llueu salío volando…
Al menos un paracaidista quéda a pie de tierra…
Gracies de nueu.
Noviembre 15th, 2009 at 19:23
Home, nun voi opinar en nome de Fai!, pero sí te voi dicir lo que camiento al respeutu.
Personalmente y como dixi enantes, la “idega” bas prencipal d’esa candidatura; l’internacionalismu exetao nuna esquierda anticapitalista paecionos eso, -interesante- (más que nada porque ye pegoyu de la nuesa definición como org). Agora, voi atociar en que nun foi una recomendación, esi comunicáu fixímolu ente toos y toes.
Al mio mou de ver, dientro d’esi OVNI había muncho estraterreste que de xuro nun vivía nel planeta tierra. Valió con dir a la charra que dieron na Sindical de Xixón pa comprobalo y que mereció una pequeña entrada nel mio blogue:
http://alloriu.nireblog.com/post/2009/06/03/resume-del-actu-diniciativa-internacionalista
Nun ceyo que tenga muncha trescendencia nes próximes elleiciones, más que nada porque n’Asturies como n’otros países nun cuayó eso de que los vascos diben esmolecese poles coses de nós, sabiendo que la imaxe qu’ellos mesmos habíen de nosotros yera enforma probetaya. Ye más, quienes n’Asturies garraron la candidatura metíen mieu polos sos plantegamientos Vilareyistes, pola so ñegación del pueblu cántabru y llionés y pol so sectarismu énte l’afirmación de que solo los veramente independentistes acepten el mapa de Vilareyo, etc…Toes eses pallabres n’AMESTÁU…en fin
Ye nidio qu’II nun va tener vida tres de les elleiciones. Preba d’ello que mentres partíos como AA o UNA siguen faciendo política, a II nin se la recuerda…
Salú!
Noviembre 15th, 2009 at 20:15
Denis,
yá lleera esi post tuyu tan bonu, agora volví a facelo. Nun m´estraña que l´OVNI pasara y nun se supiera más nada. Namás dicite que más nos val escaecenos d´esa xente. Y que qué inxenuidá la de los que lo sofitaron. Pa empezar el mapa d´II en Galiza nun coincidiá col d´I.I. n´Asturies. Había cachos que nun se sabía pa quién quedaben. De risa.
Descartada esa “iniciativa”, taría bien entamar una Plataforma nacionalista/soberanista/asturianista de verdá, ensin torgar nin chocar coles qu´haya a nivel electoral (que pue habeles), nin pretender presentase a elecciones. Una Plataforma pa crear un cultura nacionaliega común.
Oxalá Fai!nos sos conceyos retomaren el nuestru brinde a la xuntanza y pudiéramos amestar el so blog y el so sofitu.
Dende equí quixera apurrivos esi brinde.
Noviembre 16th, 2009 at 20:09
Quedé friu.
Esta tira comentarios ye´l meyor exemplu de lo que mos pasa. Que si esti ye un mentirosu, que si la otra una hijaputa y que si el de más allá un borrachu. Esti ye´l verdaderu debate políticu qu´hai angüañu dientru les “organizaciones” polítiques d´izquierdes asturianes.
En chigre, darréu de tres o cuatro botelles de sidra, “somos un pueblu que queremos a los que matamos”, como dicen n´Irlanda. Ta perbien, esto ye Asturies (dalgunes y dalgunos queremos que seya, más bien), con toles consecuencies, pero paisanos y paisanes: ¡Trátase de política! Trátase de facer un País, de trasformar la nuestra realidá, d´entainar el camín del futuru, trátase d´Asturies, de P-O-L-Í-T-I-C-A. Polo tanto solo mos queda o echanos al monte o facer política. Y pa dambes coses, o pa cualisquier d´elles, ufierto una receta: Responsabilidá, Imaxinación, Compromisu, Coherencia y Autocrítica
Si queremos ser daqué hai de tener altura de mires, sinón yá somos lo que somos. Nada.
¡Salú ya Dixebra!
Noviembre 16th, 2009 at 20:21
Oscar: Nun pescancio nada. Amplía´l to comentario porque sinón ando perdíu. Gracies.
Noviembre 16th, 2009 at 21:23
A ver si soi a desplicame un poquiñín meyor.
Siguiendo la tira de comentarios de más arriba quédame bien de claro que tamos colo de siempre. Caún (y cauna tamién) tirando pal so chiringuitu, pa les sos sigles, organizaciones o lo que seya.
Namai que digo qu´hai que ser un migayín de responsables, toes y toos. Que si los de X marcharon pa Y o los de Z son unos ladrones porque dexaron a los de la L.l vaqueira col culu al aire.
Que non, que yo nun quiero eso, que munchos y bien d´elles, nun queremos eso. Que nagüamos por otra cosa, que queremos ser otra cosa, que queremos facer política, trasformar esto que mos van dexándo los partíos y coaliciones españoles y que entovía llamamos Asturies. Que mos xugamos abondo. Que ta nel aire el nuestru País, el nuestru futuru. Que ya ta bien d´engarradielles d´escolinos.
Y too esto que suelto quiciabes nun venga a cuentu y te enfrentáu dafechu col envís d´esta web, pero encabrónome demientres gastamos les fuerces y el tiempu n´alderiques que queden pa práu.
Y tien muncho que ver colo de “Iniciativa Internacionalista”, por exemplu. Ta mui bien lo de la Solidaridá, ansí, con mayuscules, pero la Solidaridá ye un conceutu recíprocu, de min pa ti, de to pa min, de los dos. Y nesti momentu nun se dan les condiciones pa ser a ufiertar daqué cosa a naide.
Quémame la sangre tar tol día colo mesmo y demientres Asturies (y les asturianes y asturianos, que son los que daveres faen Asturies) nuna precariedá de toa mena que da vergoña solo de pensalo.
Un abrazu bien grande, tamién dende l´exilu.
Noviembre 16th, 2009 at 22:32
Igual taba bien facer una llista de sofitu a la plataforma que se quier facer, claro que tamien hai de poner los entamos de la plataforma. Igual esti post os pue valir pa que vaya apuntandose la xente que ta pola XUNTANZA.
http://petitions.tigweb.org/home/index.html
Noviembre 17th, 2009 at 1:00
Préstenme les tos pallabres,oscar. Toi enforma d’acuerdu.