Blog El xanu’l caborniu
Toos persabemos les tirries ancestrales que nos profesamos los que tamos d’esta mano del sucu que separta los que quieren un futuru pa esta nación de los que la quieren camudar nuna fastera atlántica col futuru peslláu.
Nesi aperrillanos de contino practicamos xeres abondes. Dende sopelexar bilordios dayuri, pasando por escurrir toa mena de llevantos y acabando pol insultu llisu y llanu. Poner exemplos ye fato y pérdida de tiempu, asina que voi aforrame amesoriar dellos.
Y, magar pueda suponer dar voces en castañéu otra vegada más, quiciabes seya’l momentu de parar d’una vez y enfotanos en mirar caún los trapos puercos que tenemos en casa p’abogadalos, envede rebuscar nes cases ayenes los de so p’asoleyalos perende.
Podíamos entamar guapamente por axeitar una “xermandía de non agresión”, esbrexando por enterrar vieyes zunes y poniendo tol remangu por zarrar feríes engafentaes cuantayá. Camiento que toos díbamos salir ganando col cambiu.
Pensái qué prestoso tien de ser pasar per delantre la casa d’esi vecín que siempre isaba’l perru pa contra ti y comprobar que yá nun lo fai y, pa detrás, hasta cuando ta pa la mano, pue da-y por apurrite un canxilonáu d’agua pa que mates el secañu.
El casu ye qu’últimamente arruxida enforma tol tema de los alcuerdos de mínimos, xuntances y demás. Pero almeyor fai falta una premisa previa. Entamala con una xermandía, un pactu non esplícitu, de non agresión. Camudar darréu y dafechu los comportamientos y discursos belixerantes y enterrar definitivamente les gafures, obleros, mexacanes y tentaciones de toa mena pola apurridiella, palu nuna mano y chaqueta na otra, recordando’l final de les vieyes romeríes.
El camín pa entendenos toos ta ehí delantre esperando pola sestaferia. La verdá ye qu’andamos endagora en pañales. A ver si puxamos pa iguar esa xermandía a la que me refiero y entamamos a facer galantes. Dempués a caminar. Y hasta pue que dalgún día hasta a entainar y too.
Artículu espublizáu en http://elxanulcaborniu.blogspot.com/2009/09/xermandia-de-non-agresion-acuei.html
8 respuestes a “Xermandía de non agresión. ¿Acuéi?.”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Octubre 18th, 2009 at 17:37
Paez que nun hai vida d’unos díes p’acá nesti blogue. Qué pasa hom? Yá nun hai esi espíritu de xuntanza? Yá se ve que n’Asturies nun hai nada que facer, namás esperar a esapaecer?
Pues los demás siguen dando exemplu:
Nel psoe “asturianu” el javier fdez apuesta por ser escoyíu en vez del fartón. Yá hai griesa encubierta -y va ser mui dura, como con cagunmimanto-, pero -como siempre- nengunu va colar del partíu. Son fieles al partíu.
El psoe gobierna euskal herria col so mayor enemigu: la derechona que tanto dicen. Más que nada, pol poder y, de pasu, echar del gobiernu a los nacionaliegos vascos. Pero esti día votaron xuntos en madrid pa sacar los presupuestos pnv col psoe. Y a la escontra’l pp. Quién lo pescancia? Ye fácil. Fidelidá al partíu y xuntura pa tener poder.
Equí reina’l refrán de divide y vencerás.
Octubre 19th, 2009 at 9:40
Talamente paez esti vacíu un reflexu del asturianismu/nacionalismu políticu, tomate. Per una parte una masa ta cansao de nun pintar un res y ta desilusionao. Per otra parte, hai xente a lo qu’eso paez que-yos importa bien poco.
Octubre 19th, 2009 at 9:46
Estimáu Tomate: Nós emburriamos con esti blog, diximos les verdaes, sacamos anuncies ya editoriales. Pero como pudisti lleer nel últimu, la xente azorró y calló. Pocos fixeron comentarios. En nome del blogue pido aída pa “dar vida” a esti enfotu pola xuntanza. Les organizaciones directamente implicaes callen, los militantes pola xuntanza callen, y nun aprofitaron la oportunidá de la nuesa esistencia.
Los medios con que cuenten la FSA y el PP son descomanaos en comparanza colos nuestros esfuerzos. De los demás depende qu´esto siga. Tamos a la espera de más reacciones y escritos, sofitos de blogues y particulares. Creamos l´espaciu y yá nun se rellena más. Ye hora del pueblu, nun podemos ser “cuatro gatos” los que llevemos el procesu a cabu.
Octubre 19th, 2009 at 10:20
Voi ser críticu con vos; y ye que ( dame la impresión) que o se ta cola vuesa opinión o se ta escontra Asturies. Yo per sofitar a ciertu partíu asturianu (AA) que podrán facelo bien o mal tener o non autocrítica; pero al fin y al cabu ye la mio opinión y paez nun respetase recibo palos per tolos llaos, per eso dexé d’escribir porque cansé d’ínsultos y bilordios que nun lleven a nengún lláu; opiniones nesti foru, que fain reise a los que nos mal gobiernen PSOE-IU-BA-LV, y al PP.
Octubre 19th, 2009 at 10:33
Iyán: ¿nun te referirás a la web “Polaxuntanza”? Equí respetemos toles opiniones. Los palos recibiríalos d´otros comentaristes anónimos, pero la web (y yo) nun tuvimos nada que ver coles crítiques que tu recibieras,
Octubre 19th, 2009 at 12:40
Yo digo más. Equí, que yo sepa, nun s’insultó a naide nin se faltó al respetu, Iyán. Pue defendese una posición (o facer crítica d’otra) d’un mou más o menos visceral, pero esta web nun permite los insultos.
Octubre 19th, 2009 at 15:17
Pa tar siempre los mesmos diciendo casi a diario lo mesmo hai que tener dedicación absoluta y al final acaba ún asemeyando a un discu rayáu. Si nun se provoca más movimientu en xente, organizaciones, etc. hai que concluir qu’esto ye lo qu’hai. Esta ye una puerta abierta. Pero yá vemos que los partíos, militancia, y organizaciones que xiren alredor del nacionalismu tán mui a gusto dixebraos (con dalgún movimientu que creó espectatives apocayá) y con un pie de contino (a veces los dos) fuera de la realidá cotidiana.
El puxu social y electoral del nacionalismu asturianu sabemos el que ye. La posibilidá de variar les coses tamién sabemos la que ye. ¿Que por fin se mueve ficha pa cambiar esta dinámica?. Fantástico. ¿Que se quier siguir los 30 prósimos años igual qu’estos 30 que yá colaron?. Pues allá cadún.
Lo que pensaba muncha xente quedó plasmao nesta web y felicito por ello públicamente a los sos entamadores. Sirvió y sirve pa da-y voz a un ruxerrux al que-y faltaba una referencia comunicativa visible. Pero por ello nun dexa de ser una web del mundu virtual. Camudar a fondo les coses depende yá d’otra xente.
Acabo con un exemplu: estos díes ta entamada una bona pola mor de querer convertir El Musel nuna especie basureru de catástrofes marítimes. ¿Quién retrucó hasta güei a tal despropósitu?. Pues Ovidio y Pardo en dambos casos del PP. Y nun añado más nada.
Octubre 19th, 2009 at 22:26
Evidentemente eso quise dicir quiciabes m’espresé mal.