Editorial de «Pola Xuntanza»
Dimos la mano. Y pa bien poco sirvió.
Esta web yá va tiempu funcionando. Delles persones axuntáronse a ella y al so enfotu principal con esperanza, cuasi con alliviu. Otres reburdiaron y dexaron constancia de la so rocea con mensaxes de despreciu. Tamién hubo escépticos a esgaya y otros que, cenciellamente, participaron nos alderiques y contribuyeron colos sos puntos de vista.
A tolos participantes hai que-yos dar les gracies. Tamién, los que sofitaron a la web dende los sos blogues, un ensame d’ellos que tenemos enllazaos a la esquierda. Toos formamos un garrapiellu na rede que puxamos o, al menos, simpatizamos con una mesma causa.
Quiciás nun siamos una bayura de xente. Pero dientro de los que pensamos qu’Asturies ye nación y que tien mester d’una opción política propia a la esquierda, ensin dependencies nin concesiones coles sucursales españoles, nesi ámbetu camentamos, yá somos una voz qu’ha de tenese en cuenta.
Hai sigles cégares, hai grupos políticos sordos, y hai medios dixitales que tiren p’alantre absurdamente como si nun esistiéramos.
A les dos fuercies directamente implicaes na xuntanza (y ensin esclusión d’enfotos más amplios pal futuru), empobinamos nuestra convidada: a AA y a UNA. Solamente d’Unidá Nacionalista Asturiana algamamos una respuesta. Ye una llaceria empezar tan mal, y el públicu tien que lo saber. El grupu d’AA que nun ta integráu na coaliciòn UNA tien que saber qu’esta web taba abierta a ellos pa esplicar les sos postures, el so puntu de vista sobre’l pleitu xudicial y sobre posibles xuntances futures. Dexar pa prau la nuestra convidada qu’incluyía una neutralidá sobre l´asuntu xudicial de les sigles «Andecha Astur» (neutralidá estratéxica a nivel «Pola Xuntanza», pero non a nivel individual, yá que los albidros de caún son personales y ehí nun mos metemos) ye, sinceramente, un error pa ellos. Esta negativa a la nuestra invitación nun sirve más que pa torpedear el nacionalismu asturianu. Ha de sabese: Asturies fúndese como nación, y el silenciu de della parte tien que sintise, y poro, nós facémoslo constar equí. Pa que’l silenciu se sienta, pa que se note. Allá caún coles sos responsabilidaes.
Silenciu y falta de retruque al nuestru nacimientu y convite tamién se dio colos medios dixitales Infoasturies.com y con Asturies.com. Ellos sabrán de la so política editorial. Tenemos d’agradecer a Aruelu.com, Asturnews, Les Noticies y Asturbulla que, polo menos, espublizaren los nuestros comunicaos iniciales pa danos a conocer.
Aruelu, inda más, asoleyó la entrevista estensa a ún de los nuestros voceros, pa conocer en más profundidá la nuestra postura. Postura quiciás equivocada ya inxenua, pero llexítima. Gracies a tolos redactores de los medios mencionaos, y n’especial al mencionáu Aruelu. Por embargu, Infoasturies sigui faciendo –a fecha de güei y como fai AA– como que nun esistimos.
Asina tán les coses. N´Asturies hai xente que nun ta faciendo como ye mandao’l so deber: Trabayar pol País. Azorrar, callar y enfotase nel aislamientu nun da creitu pa construyir una alternativa que camude les coses.
Pero tampoco nun paez que la coalición UNA sía yá la xuntanza, nin siquier paez que sía una fuercia real nes cais que se reclame «nacionalista». Si lo quier ser, más alló de la falta de militantes espardíos notres sigles, tien que facer un trabayu más real y efectivu de crítica al Réxime, que se note que se trata d’una fuercia d’oposición tanxible. Por desgracia, nun paez una xuntanza dafechu algamada, más bien forciada, y nun tien muncha vida más allá d’internet.
De l’Andecha nun amestada n’UNA solamente podemos decir que son poca fuercia pa ser teníos en cuenta na política verdadera del País, y que si nun se xunten nun van a ser nada, otra vuelta, más allá d’internet o de los papeles llegales. Pa encima, tán endolcaos nun conflictu xudicial que nós, xenerosamente, quiximos sobrevolar.
Nun hai nacionalismu asturianu ensin xuntanza. Primero, esti nacionalismu puede desapaecer d’equí a poco organizativamente falando. Depués, pueden llegar les criminalizaciones fáciles dende España énte l’atomización creciente. Y pa finar: llegará’l día en qu’Asturies (non la llingua namás, non, Asturies) desapaeza. Responsables: munchos, por nun dicir toos.
Equí tuvieron un foru, una mano espurrida pa facer dalgo, p’ayudar. Y esa mano nun atopó a munches, la verdá. Que piensen n’ello. Equí siguimos.
2 respuestes a “Nun hai nacionalismu asturianu ensin xuntanza”
Dexar un comentariu
Esta páxina ufre la posibilidá d'abrir un alderique inxertando comentarios embaxo la condición de facer un usu respetuosu y nun inxerir mensaxes ofensivos asina como aceutar la moderación y, llegáu'l casu, eliminación de comentarios insultantes (si l'alministración de la web asina lo considerare) pa caltener un alderique granible
Octubre 3rd, 2009 at 19:03
Prestame enforma que se digan les coses d’una forma tan xenerosa y ensin ambigüedaes.
Un movimientu de contestación ciudadanu con claros componentes políticos como ye “pola xuntanza…” tien de llegar a tener una estructura organizada nun futuru, porque de lo contrariu pue llegar a quedar simplemente nuna declaración d’intenciones na redé de redes.
Ni la UNA ye la solución, nin muncho menos AA.
Ye normal, nun querer metese en “camises d’once vares” col tema de les sigles d’AA. Pa muncha xente, la implicada, ye cuestión sicasi de principios el llevar l’asuntu a bon términu. Esto nun quier dicir qu’a otru nivel ye dicir propuestes d’aición conxuntes se puean facer coses.
D’AA (la que tien les sigles) tan solu pueden salir propuestes d’aicion onde AA seya la referente. De la UNA lo mesmu y del UAS-PAS más de lo mesmu, porque los sos llideres camenten coses como esta:
Nel 2011, el PAS-URAS creye que va algamar diputáu, en base a que cuando le va mal al PSOE, medrá’l PAS (mira-y los resultaos electorales).
La UNA cree que ye’l nuevu “gallu de la quintana” de la quintana nacionalista asturiana y va querer demostralu nel 2011.
AA (los que caltienen les sigles) van se siempre los “referentes” anque saquen malos resultaos ya tiene la escusa, yos quieren quitar les “sos supuestes” sigles y ello-yos debilita. Los malos son los otros, nunca nós, nós somos los “puros”.
Que se pue facer con too esto. Dende’l mio puntu de vista veo tres soluciones una a curtiu plazu, otra a mediu y otra a largu plazu.
A curtiu plazu. Creyar un movimientu organizativu reivindicativu contestataríu politicu (pero ensin querer presentase a elecciones), daque tipu ACA pero con enfotu políticu, que puxe pola xuntanza de les organizaciones polítiques ya esistentes nuna coalición electoral, creo que con dos grandes bloques, unu interclasista rexonalista/asturianista (URAS-PAS) y otru nacionalista d’izquierdes (UNA,les dos AA, agrupaciones llocales, fai, Bpa, Valedoristes,…). Pa ello hai de da-y forma darréu y alcontrar xente suficiente pa tirar d’ello.
A mediu plazu. Esperar al focicazu que vamos metenos nel 2011 de dir separtaos, y la entrada d’UPyD n’Asturies. A partir d’equí, ómina de reflexón, dimisiones si procede, y puesta a puntu d’una futura coalición nacional pal 2015
A llargu plazu. Esperar a que muerran o se retiren tolos “reis del ghettu”, esto sedrá si la esperanza de vida ye d’unos 90 años, sobro l’añu 2050, y si entá vivimos y nun españo nengun bomba ñuclear, nin tamos en La Lluna, facer daque nuevu coles nueves xeneraciones que ya nun se van alcordar de les tochures de los sos güelos.
Octubre 3rd, 2009 at 23:43
Toma-y nota. Igual facieis más presión con una asociación política, que non un partíu políticu.
Na política ta too inventáu, ye cuestión d’esportar coses y llevalas a la situación política esistente del territoríu en cuestión. Valga la pena intentalu.
http://www.avui.cat/cat/notices/2009/10/joan_carretero_es_proclamat_president_de_reagrupament_independentista_73674.php